ខេត្តស្ទឹងត្រែង ៖ កំលាំងនគរបាលចរាចរផ្លូវគោកនៃស្នងការដ្ឋាននគរបាលខេត្ត ប្រចាំការនៅតាមផ្លូវជាតិលេខ៧ ចំណុចឃុំអូរឫស្សីកណ្តាល ស្រុកសៀមបូក បានធ្វើការត្រួតពិនិត្យរថយន្តកែច្នៃដែលគ្មានសំណុំឯកសារត្រឹមត្រូវ ដោយសារថា ការធ្វើចរាចរណ៍តាមផ្លូវសាធារណៈយានយន្តត្រូវតែធានាបានសុវត្ថិ ភាព។ ការអនុវត្តការងារនេះ គឺយោងតាមការឯកភាពពីគណៈបញ្ជាការដឹកនាំត្រួតពិនិត្យការអនុវត្ត ច្បាប់ចរាចរណ៍ខេត្ត ដែលបានឱ្យនគរបាលចរាចរប្រចាំទិសដៅនីមួយៗធ្វើការត្រួតពិនិត្យរថយន្ត កែច្នៃដែលគ្មានឯកសារ។ សមត្ថកិច្ចចរាចរបានចាប់ផ្តើមធ្វើការត្រួតពិនិត្យគ្រប់យាន យន្តកែច្នៃ កាលពីថ្ងៃទី១៧ មករា ឆ្នាំ២០១១ តាមផ្លូវជាតិលេខ៧ ចំណុចឃុំអូរឫស្សីកណ្តាល និងឃើញមានរថយន្តកែច្នៃមួយគ្រឿងសណ្តោង រថយន្ត១គ្រឿងទៀត ម៉ាកហ៊ីយ៉ាន់ដាយ ចំណុះ៥តោន ដែលផ្នែកខាងក្បាលខូចខាតស្ទើរទាំងស្រុងបើកចេញពីខេត្តរតនគិរី សំដៅទៅខេត្តក្រចេះ ហើយត្រូវសមត្ថកិច្ចចាប់ឃាត់ និងធ្វើការពិនិត្យ។
លោកវរសេនីយ៍ទោ គង់ រតនា នាយការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តបាន ឱ្យដឹងថា កំលាំងចរាចរប្រចាំទិសដៅទីនោះបានចាប់ឃាត់រថយន្តកែច្នៃ១គ្រឿងដែល សណ្តោងរថយន្ត១គ្រឿងទៀត ដើម្បីត្រួតពិនិត្យឯកសារ។ មុនពេលឃាត់រថយន្តនេះ សមត្ថកិច្ចបានហៅឱ្យឈប់តែអ្នកបើកបរមិនព្រមឈប់ ថែមទាំងបន្ថែមល្បឿនទៅមុខទៀត ហើយកំលាំងសមត្ថកិច្ចក៏បានដេញតាមទាន់ហួសចំណុចឈរជើងប្រហែលជា ៥០០ម៉ែត្រ។ ឆ្លងតាមការត្រួតពិនិត្យឃើញថា រថយន្តកែច្នៃនេះមានលក្ខណៈខុសបច្ចេកទេស ប្រព័ន្ធហ្រ្វាំង និងភ្លើងមិនគ្រប់គ្រាន់ និងគ្មានឯកសារអ្វីទាំងអស់ពាក់ព័ន្ធនឹងរថយន្ត។ ចំណែករថយន្តមួយគ្រឿងទៀតដែលសណ្តោងពីក្រោយរថយន្តកែច្នៃនោះឃើញថា មានការខូចខាតផ្នែកខាងមុខទាំងអស់ ទើបសនិដ្ឋានថា អាចជាប់ពាក់ព័ន្ធនឹងគ្រោះថ្នាក់ចរាចរណ៍ ម្យ៉ាងទៀតរថយន្តចំណុះ៥តោននេះ គឺគ្មានលិខិតស្នាមបញ្ជាក់ពីសមត្ថកិច្ចខាងណាថា ដោះស្រាយរួចរាល់ដែរ។
លោកគង់ រតនា បានបន្តថា ម្ចាស់រថយន្តកែច្នៃនោះឈ្មោះស៊ុំ ភី ភេទប្រុស អាយុ២៩ឆ្នាំ ជាអាជីវករទិញកសិផល រស់នៅភូមិ១ សង្កាត់ឡាបានសៀក ក្រុងបានលុង ខេត្តរតនគិរី ឯម្ចាស់រថយន្តហ៊ីយ៉ាន់ដាយ ឈ្មោះម៉េង ហ៊ាង ភេទប្រុស អាយុ៤៨ឆ្នាំ ជាអាជីវករទិញកសិផលដែរ រស់នៅភូមិ១ សង្កាត់ឡាបានសៀកជាមួយគ្នា។ លោកបានបញ្ជាក់ទៀតថា រហូតមកដល់ថ្ងៃទី១៨ មករា ទើបម្ចាស់រថយន្តហ៊ីយ៉ាន់ដាយ យកឯកសារពាក់ព័ន្ធមកធ្វើការដោះស្រាយ និងឱ្យរថយន្តផ្សេងសណ្តោងរថយន្តនេះបន្តដំណើរទៅមុខ។ ចំណែករថយន្តកែច្នៃដែលខុសលក្ខណៈបច្ចេកទេស មិនទាន់អនុញ្ញាតឱ្យធ្វើចរាចរណ៍ទេ គឺបាននាំយកមករក្សាទុកនៅស្នងការដ្ឋាននគរបាលខេត្ត រង់ចាំបញ្ជា និងការយល់ព្រមពីគណៈបញ្ជាការដឹកនាំត្រួតពិនិត្យការអនុវត្តច្បាប់ ចរាចរណ៍ខេត្តសិន៕
http://kohsantepheapdaily.com.kh/art...20-010545.html