ខេត្តកំពង់ចាម ៖ បុរសម្នាក់ឈ្មោះសេន សាត អាយុ៥៨ឆ្នាំ រស់នៅភូមិ២៥ ឃុំព្រះធាតុ ស្រុកអូររាំងឪ ត្រូវបានកូនប្រសាប្រុសផឹកស្រាស្រវឹងទាញខ្វេវបក វាយសំពង (វាយខាងខ្នង) ត្រូវចំក្បាលផ្នែកខាងក្រោយរយះហូរឈាមស្រោចពេញខ្លួន កាលពីវេលាម៉ោង៧យប់ថ្ងៃទី១៩ មករា ២០១១ បង្កឱ្យមានការភ្ញាក់ផ្អើល និងដឹកយកទៅសង្គ្រោះនៅមន្ទីរពេទ្យចំការកៅស៊ូពាមជាំង តែដោយស្ថានភាពរបួសធ្ងន់ធ្ងរពេក ក៏បញ្ជូនបន្តទៅកាន់មន្ទីរពេទ្យខេត្តដេរចំនួន១១ថ្នេរ ចំណែកកូនប្រសាត្រូវបានកំលាំងនគរបាលប៉ុស្តិ៍រដ្ឋបាលឃុំ ព្រះធាតុ ធ្វើការឃាត់ខ្លួន ។
ព័ត៌មាននៅកន្លែងកើតហេតុបានឱ្យដឹងថា កូនប្រសាចិត្តភ្លើងនេះឈ្មោះភិន ប្រុស អាយុ២៨ឆ្នាំ នៅថ្ងៃកើតហេតុ គេបានផឹកស្រាស្រវឹងតាំងពីក្បាលព្រលប់ជាមួយនឹងមនុស្សពីរនាក់ ទៀតនៅលើគ្រែខាងមុខផ្ទះ រហូតមកដល់ម៉ោង៧យប់ ក៏ស្រវឹងធ្លាក់ភ្នែក ហើយបានទាញយកព្រនង់មកវាយកំទេចម៉ូតូវ៉េវអាល់ហ្វា ពណ៌ក្រហម ១គ្រឿង បំផ្លាញចោលលាន់ឮប្រាវៗ ។ ភ្លាមនោះឪពុកក្មេកឈ្មោះសេន សាត បានចុះទៅឃាត់កូនប្រុស កុំឱ្យវាយម៉ូតូបន្តទៀត ក៏កើតទៅជាការប្រវាយប្រតប់គ្នា ។ ពេលនោះកូនប្រសាស្ទុះទៅយកខ្វេវបកមកវាយត្រូវក្បាលឪពុកក្មេក ពីក្រោយតែម្តង ។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព.
http://kohsantepheapdaily.com.kh/art...20-004242.html