ខេត្តកំពង់ឆ្នាំង ៖ វេលាម៉ោងប្រមាណ៨ និង៩យប់ថ្ងៃទី១៨ មករា មានការភ្ញាក់ផ្អើលមួយនៅស្រុករលាប្អៀរ ដោយសារតែគ្រួសារមួយបានបាត់កូនក្រមុំ ដែលនៅសល់តែ៣ខែទៀតត្រូវរៀបការទៅហើយនោះ រួមជាមួយម៉ូតូស៊េរីទំនើបមួយគ្រឿង ។ ការបាត់ខ្លួនកូនក្រមុំរូបនោះធ្វើឱ្យអាណាព្យាបាលមានការព្រួយបារ ម្ភយ៉ាងខ្លាំងពីសុវត្ថិភាពកូនស្រី និងទ្រព្យសម្បត្តិផងដែរ ទើបធ្វើឱ្យមានការតាមរកយ៉ាងសកម្មស្ទើរមិនបានដេកពួន ។
យោងតាមប្រភពពីមន្ត្រីប៉ូលិសស្រុកបាននិយាយថា នាងក្រមុំរូបនោះបានបាត់ពីផ្ទះនៅវេលាម៉ោង៥ល្ងាចថ្ងៃទី១៨ មករា ខណៈដែលសុំម្តាយជិះម៉ូតូស៊េរីថ្មីមកជួលឌីស្កនៅផ្សារព្រៃខ្មែរ ។ លោកនូ ធីរោ អធិការរងស្រុករលាប្អៀរបាននិយាយប្រាប់តាមទូរស័ព្ទថា នាងក្រមុំដែលបានបាត់ខ្លួន ឈ្មោះម.ល អាយុ២០ឆ្នាំ ។
តាមប្រភពដដែលបានបន្តថា នៅវេលាម៉ោងប្រមាណ៤រសៀលថ្ងៃទី១៨ មករា នាងក្រមុំបានជិះម៉ូតូចេញពីផ្ទះ ហើយត្រូវបានម្តាយសួរនាងប្រាប់ថា ទៅជួលឌីស្កនៅផ្សារព្រៃខ្មែរមួយភ្លែត ។ លុះនាងចេញមកបាត់យូរពេក ឪពុកម្តាយមានការបារម្ភ ក៏ទូរស័ព្ទសួរ ហើយត្រូវកូនឆ្លើយប្រាប់ម្តងថា នៅផ្សារព្រៃខ្មែរ ម្តងទៀតថា នៅទីនេះ ឬទីនោះ លុះក្រោយមក ក៏ទូរស័ព្ទលែងចូលតែម្តង ។ ដោយហេតុនេះឪពុកម្តាយមានការបារម្ភយ៉ាងខ្លាំង ក៏បានតាមរកកូនទាំងយប់ប៉ុន្តែមិនបានទទួលលទ្ធផលឡើយ ។
លោកបាននិយាយបន្តទៀតថា រហូតម៉ោងប្រមាណ៩ព្រឹកថ្ងៃទី១៩ មករា ស្រាប់តែកូនស្រីបានទូរស័ព្ទមកប្រាប់ក្រុមគ្រួសារថា រូបនាងត្រូវបានឈ្មោះ �?� ដឹកតាមម៉ូតូរបស់នាងមកដល់ភូមិមួយ ផ្ទះនៅក្រោយវត្តជ្រៃធំ ប៉ុន្តែមិនដឹងថា ជ្រៃធំនោះនៅខេត្តណាទេ ព្រោះម្តងថា នៅខេត្តតាកែវម្តងថា ខេត្តកណ្តាល ។ នាងបានប្រាប់ក្រុមគ្រួសារតាមទូរស័ព្ទថា រូបនាងបានដេកនៅផ្ទះឪពុកធំរបស់បុរសម្នាក់នៅក្រោយវត្តជ្រៃធំ ។
ចំណែកសមាសភាពបុរសម្នាក់នេះត្រូវបានលោកអធិការរង បញ្ជាក់ថា គឺឈ្មោះនេះមានប្រពន្ធកូននៅស្រុកកំពង់ត្រឡាចរួចទៅហើយ ។ ចំពោះករណីនេះលោកមិនទាន់ដឹងថា ជាករណីចាប់ពង្រត់ ឬស្រលាញ់គ្នាបែបណានោះទេ ។ ប៉ុន្តែពេលនាងលួចទូរស័ព្ទសាធារណៈមកប្រាប់ក្រុមគ្រួសារ បានប្រាប់ថា ឱ្យទៅជួយយកនាងផង ។ អធិការរងរូបនេះបន្តថា ម៉ូតូដែលនាងយកទៅជាមួយនោះជារបស់ឪពុកម្តាយនាងក្រមុំជិតរៀបការ រូបនោះ តែលោកមិនច្បាស់ថា ម៉ាកអ្វីទេ ។
ដោយឡែកនៅឯក្រុងកំពង់ឆ្នាំងឯណោះវិញ លោកហ៊ុល វាសនា អធិការរងក្រុងបានប្រាប់ថា កូនចៅគាត់ដែលឈរជើងនៅផ្សារលើប្រាប់ថា បុរសសង្ស័យដែលនាំនាងក្រមុំទៅនោះ កន្លងមកធ្លាប់ជួយលក់ដូរក្រុមគ្រួសារនេះនៅផ្សារលើ ទើបស្គាល់គ្នាជាមួយនាងក្រមុំរូបនោះ ឥឡូវមន្ត្រីរបស់លោករួមជាមួយប៉ូលិសស្រុករលាប្អៀរត្រូវបាន ឪពុកម្តាយនាងក្រមុំរូបនោះជួលរថយន្តជិះទៅតាមរកកូនឯភូមិជ្រៃធំនោះ ហើយ ។ គិតត្រឹមម៉ោង៤ និង៣០នាទីរសៀលថ្ងៃទី១៩ មករា នេះនៅពុំទាន់រកឃើញនៅឡើយទេ ។
លោកស្រីប្រាក់ សៅនី ប្រធានការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តបានប្រាប់តាម ទូរស័ព្ទថា លោកស្រីជាប់រវល់ធ្វើបុណ្យផ្ទាល់ខ្លួនប៉ុន្តែមានសេចក្តីរាយការណ៍ ថា មានបាត់នាងក្រមុំអាយុ២០ឆ្នាំនោះមែន ដែលពេលនេះឪពុកម្តាយនាងបានសុំប៉ូលិសទៅតាមរកហើយ។
តាមព័ត៌មានចុងក្រោយបានឱ្យដឹងថា មន្ត្រីប៉ូលិសបានទាក់ទងតាមទូរស័ព្ទទៅបុរសដែលនាំនាងទៅនោះ ហើយបង្គាប់ឱ្យនាំគ្នាមកវិញ ។ នៅម៉ោងប្រមាណជាង៤រសៀលមានព័ត៌មានថា នាងដែលបាត់ខ្លួនត្រូវបានបុរសនោះនាំគ្នាមកទំលាក់ចោលនៅក្នុង ភូមិសាស្ត្រស្រុកឧដុង្គទាំងមូ៉តូ ទាំងមនុស្ស ហើយបានគេចខ្លួន ៕
http://kohsantepheapdaily.com.kh/art...20-003320.html