រាជធានីភ្នំពេញ ៖ កីឡាករជិះសេះកម្ពុជា៣នាក់ ដែលបានទៅចូលរួមប្រកួតនៅប្រទេសថៃ លើវិញ្ញាសាជិះសេះលោតផ្លោះរបារបានត្រឡប់មកមាតុប្រទេសវិញ ជាមួយចំណាត់ថ្នាក់លេខ១ និងលេខ២ ចំនួន២នាក់ រីឯម្នាក់ទៀតទទួលបានចំណាត់ថ្នាក់ល្អដោយពុំមានកំហុស ។ លោក Philipp Gaccia អគ្គលេខាធិការសហព័ន្ធកីឡាប្រណាំងសេះកម្ពុជា បានថ្លែងឱ្យដឹងនៅក្នុងពិធីជួបសំណេះសំណាលមួយនៅទីលានខេម បូឌា ខនទ្រី ក្លឹប កាលពីថ្ងៃអង្គារ ទី១៨ មករា ថា ការប្រកួតនេះធ្វើឡើងកាលពីខែធ្នូ គឺជាការប្រកួតអបអរថ្ងៃបុណ្យគ្រីស្តស្មាស ដែលមានប្រទេសចូលរួមចំនួន៧ ក្នុងនោះមានថៃជាម្ចាស់ផ្ទះ កម្ពុជា បារាំង អាមេរិក ស៊្វីស ហុល្លង់ និងអង់គ្លេស ។ ការប្រកួតនេះជាលក្ខណៈជិះផ្លោះរបារចាប់ពីកំពស់៥០សង្ទីម៉ែត្រ ៧០សង្ទីម៉ែត្រ និងកំពស់១ម៉ែត្រ ហើយលក្ខណៈពិសេសនៃការប្រកួតនេះទៀតមិនត្រឹមតែបញ្ជាសេះឱ្យលោត ផ្លោះរបារប៉ុណ្ណោះទេ គឺមានកំណត់ពេលវេលាទៀតផង ។
កីឡាករលន់ សុភក្ត្រា ដែលឆ្លងកាត់ការហ្វឹកហាត់ទើបតែបានរយៈពេល២ឆ្នាំនោះ ជាប់ចំណាត់ថ្នាក់លេខ១ លើវិញ្ញាសាជិះផ្លោះរបារកំពស់៥០សង្ទីម៉ែត្រ និងលេខ២ ក្នុងកំពស់៧០សង្ទីម៉ែត្រ ។ រីឯកីឡាករស៊ឹម ណារិទ្ធ ឆ្លងកាត់ការហ្វឹកហាត់អស់រយៈពេល៥ឆ្នាំមកនេះ ទទួលបានចំណាត់ថ្នាក់លេខ១ក្នុងវិញ្ញាសាជិះផ្លោះរបារកំពស់៧០ សង្ទីម៉ែត្រ និងលេខ២ ក្នុងកំពស់១ម៉ែត្រ ។ ដោយឡែកកីឡាករហូយ សុផារិទ្ធ ការប្រកួតទាំងនៅក្នុងប្រភេទកំពស់៧០សង្ទីម៉ែត្រ និង១ម៉ែត្រ មិនទទួលបានចំណាត់ថ្នាក់ទេ ប៉ុន្តែត្រូវគណៈកម្មការផ្តល់ចំណាត់ល្អប្រសើរមួយផ្សេងទៀតគឺ សំរាប់អ្នកជិះល្អ ដោយពុំមានកំហុស ។
លោក Philipp Gaccia បានឱ្យដឹងទៀតថា នេះគឺជាលើកទី១ហើយសំរាប់កម្ពុជាចាប់តាំងពីវិញ្ញាសាកីឡា ប្រណាំងសេះនេះបានបាត់ស្រមោលតាំងពីឆ្នាំ១៩៥៦មកនោះ ។ បច្ចុប្បន្ន កម្ពុជាមានកីឡាករខ្មែរសុទ្ធចំនួន២០នាក់ កំពុងធ្វើការហ្វឹកហាត់ជារៀងរាល់ថ្ងៃ ។ ដូច្នេះ ទាំងនេះគឺជាមោទនភាពខ្លាំងណាស់សំរាប់ជនជាតិខ្មែរយើងដែល ត្រូវបានគេរំពឹងទុកថា វិស័យកីឡាមួយនេះអាចងើបឡើងវិញ យ៉ាងឆាប់រហ័សបំផុតជាមួយនឹងការជួយបង្ហាត់បង្រៀនអស់ពីកំលាំង ចិត្តពីលោក LARIVAIN ជនជាតិបារាំង ដែលលោកគឺជាមនុស្សតែម្នាក់គត់រស់នៅតែជាមួយសេះ ស្ទើរអស់១ជីវិតរបស់លោកទៅហើយ ។
បច្ចុប្បន្ន វិញ្ញាសាមួយនេះនៅមិនទាន់ចាត់បញ្ចូលឱ្យពេញសិទ្ធិទៅក្នុងគណៈ កម្មាធិការជាតិអូឡាំពិក កម្ពុជាទេ តែមិនយូរមិនឆាប់នោះវិញ្ញាសានេះអាចនឹងក្លាយជាសមាជិកពេញ សិទ្ធិមិនខាន ។ លោក Philipp Gaccia កំពុងតែគិតថា នឹងខិតខំជំរុញធ្វើយ៉ាងណាឱ្យវិញ្ញាសាកីឡាប្រណាំងសេះខ្មែរយើង បានទៅចូលរួមកីឡាស៊ីហ្គេម នៅប្រទេសឥណ្ឌូណេស៊ី លើកទី ២៦ ខាងមុខនេះ ។ ជាមួយនេះ លោកក៏សូមជូនពរដល់សហការីទាំងអស់ ជាពិសេសកីឡាករប្រណាំងសេះកម្ពុជាមានសុខភាពល្អ និងនៅតែជាកីឡាករជិះសេះល្អរហូតដល់អាយុ៥០ឆ្នាំ ៕
http://kohsantepheapdaily.com.kh/art...19-205644.html