ខេត្តកណ្តាល ៖ បុរសម្នាក់ឃើញព្រះភិក្ខុសង្ឃមួយអង្គដោះស្បង់ចីវរស្រង់ទឹក និងដកបច្ច័យដាក់កណ្តាលវាលរួចស្រង់ទឹកភ្លេចខ្លួន ឆ្លៀតឱកាសល្អធ្វើសកម្មភាពលួចយកបច្ច័យនោះ ហើយព្យាយាមជិះម៉ូតូគេចខ្លួន ប៉ុន្តែត្រូវភិក្ខុសង្ឃអង្គនោះឃើញទាន់បានស្រែកថាចោរៗ បង្កការភ្ញាក់ផ្អើលដល់សាមណេរនៅក្នុងវត្តនាំគ្នារត់ទៅបិទទ្វារ របងវត្តជាប់ និងប្តឹងប៉ូលិសព្រហ្មទណ្ឌស្រុកស្នួលចាប់ខ្លួនបានតែម្តង ។
ហេតុការណ៍នោះបានកើតឡើងកាលពីវេលាម៉ោង៣និង ២០នាទីរសៀលថ្ងៃទី១៧ ខែមករា ឆ្នាំ២០១១ នៅក្នុងវត្តយសមេត្រី ភូមិយសមេត្រី ឃុំលំហាច ស្រុកអង្គស្នួល ខេត្តកណ្តាល ។ ជនមិនខ្លាចបាបលួចបច្ច័យព្រះសង្ឃរូបនេះឈ្មោះនួន ថា អាយុ៤៩ឆ្នាំ ជាអ្នករត់ម៉ូតូឌុប មានស្រុកកំណើតនៅភូមិក្រាំងចេក ឃុំក្រាំងចេក ស្រុកឧដុង្គ ខេត្តកំពង់ស្ពឺ សព្វថ្ងៃស្នាក់នៅផ្ទះជួលភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ជិះម៉ូតូ១គ្រឿងធុនសេ១២៥ ស៊េរីឆ្នាំ២០០៨ ពណ៌ខ្មៅ ពាក់ស្លាកលេខភ្នំពេញ 1AF-4185 ។ ចំណែកឯភិក្ខុសង្ឃដែលជាម្ចាស់បច្ច័យនិងដាក់ពាក្យប្តឹងឱ្យ ប៉ូលិសចាប់ខ្លួនជនសង្ស័យនោះ ព្រះនាម លី ហុក ព្រះជន្ម៨៤វស្សា គង់នៅក្នុងវត្តខាងលើ ហើយបច្ច័យដែលត្រូវជននោះលួចមានចំនួន១៩៥ដុល្លារអាមេរិក ។
តាមប្រភពព័ត៌មានបានឱ្យដឹងថា នៅមុនពេលកើតហេតុខាងលើ២ទៅ៣ថ្ងៃ ជនសង្ស័យបានធ្វើដំណើរទៅលេងស្រុកកំណើតឯខេត្តកំពង់ស្ពឺ លុះដល់ថ្ងៃកើតហេតុក៏បានជិះម៉ូតូក្នុងបំណងត្រឡប់ទៅផ្ទះជួលនៅ ឯភូមិដំណាក់ធំ សង្កាត់ស្ទឹងមានជ័យវិញ ។ ពេលជិះម៉ូតូទៅដល់ចំណុចភូមិខាងលើ ជននោះបានឆៀងចូលលេងផ្ទះមិត្តភក្តិរបស់ខ្លួន ហើយក្រោយមកបានឈឺបត់ជើងធំរូបគេក៏បានលាមិត្តភក្តិរួចជិះ ម៉ូតូចូលក្នុងវត្តដើម្បីសុំបង្គន់ព្រះសង្ឃបត់ជើង ។
ប្រភពដដែលបានបន្តទៀតថា បន្ទាប់ពីបត់ជើងធំរួចជននោះចេញមកវិញឃើញភិក្ខុសង្ឃអង្គនោះ ស្រង់ទឹកហើយទុកបច្ច័យធ្វេសប្រហែសនៅជាមួយវត្ថពន្ធចង្កេះ ឃើញឱកាសល្អជននោះក៏បានលួចបច្ច័យនោះរួចឡើងជិះម៉ូតូដើម្បីគេច ខ្លួន ។ ប៉ុន្តែបាបកម្មដែលរូបគេបន្ទោបង់ដាក់វត្តហើយលួចបច្ច័យព្រះសង្ឃ ទៀតនោះ ត្រូវភិក្ខុសង្ឃអង្គនោះឃើញទាន់ក៏បានស្រែកថាចោរៗ បង្កឱ្យមានការភ្ញាក់ផ្អើល ហើយសាមណេរនៅក្នុងវត្តនាំគ្នារត់ទៅបិទទ្វាររបងវត្តជាប់មិនឱ្យ ជននោះចេញរួចឡើយ ។
ប្រភពដដែលបានបន្តទៀតថា បន្ទាប់ពីត្រូវសាមណេរបិទទ្វារជាប់ចេញមិនរួចបែបនេះ ជននោះក៏បានបត់ម៉ូតូត្រឡប់ក្រោយវិញរួចយកលុយដែលខ្លួនលួចបាន នោះទៅប្រគល់ឱ្យភិក្ខុសង្ឃអង្គនោះវិញនិងសុំរួចខ្លួន ។ ក្រោយមកប៉ូលិសបាននាំទៅកាន់អធិការដ្ឋានស្រុកសាកសួរនិងកសាងសំណុំ រឿងបញ្ជូនទៅតុលាការដើម្បីវិនិច្ឆ័យទោសតាមច្បាប់ ៕
http://kohsantepheapdaily.com.kh/art...19-040146.html