ខេត្តកំពង់ចាម ៖ យុវជនឈ្មោះចេង ដារ៉ូ អាយុ២២ឆ្នាំ រស់នៅភូមិចំការថ្មី ឃុំគគីរ ស្រុកមេមត់ ត្រូវប៉ូលិសឃុំរំចេកឃាត់ខ្លួនទៅតាម ពាក្យបណ្តឹងរបស់ស្ត្រីជាថៅកែដំឡូងពីបទបៀតបៀនកេរ្តិ៍ខ្មាស កូនស្រីអាយុ១៤ឆ្នាំ នៅក្នុងផ្ទះចាំចំការក្នុងឃុំរំចេក កាលពីវេលាម៉ោង១២ និង៥នាទីរំលងអធ្រាត្រថ្ងៃទី១៥ មករា ២០១១ ហើយបញ្ជូនទៅកាន់អធិការដ្ឋាននគរបាលស្រុកដើម្បីសួរនាំ ។ លោកវរសេនីយ៍ត្រីឯម កុសល អធិការនគរបាលស្រុកមេមត់ឲ្យដឹងថា ឈ្មោះដារ៉ូ ធ្វើជាកម្មករដកដំឡូងឱ្យថៅកែស្រីម្នាក់ ហើយស្នាក់នៅក្នុងផ្ទះចាំចំការជាមួយមនុស្ស៣នាក់ទៀត ក្នុងនោះមានក្មេងស្រីម្នាក់អាយុ១៤ឆ្នាំជាកូនថៅកែដំឡូងផងនាយប់ថ្ងៃទី១៤ មករា ២០១១ ។
នៅវេលារំលងអធ្រាត្រយុវជនដារ៉ូ បានក្រោកចេញពីកន្លែងរបស់ខ្លួនទៅដេកជាមួយកូនស្រីរបស់ថៅកែ ហើយបានបៀតបៀនកេរ្តិ៍ខ្មាសនាង ។ លុះព្រឹកថ្ងៃទី១៥ មករា បន្ទាប់ពីឪពុកម្តាយរបស់ក្មេងស្រីត្រឡប់មកពីលក់ដំឡូងនៅប្រទេសវៀតណាមវិញ ស្ត្រីអាយុ៣៣ឆ្នាំជាប្អូនបានរ៉ាយរ៉ាប់ប្រាប់រឿងបៀតបៀនកេរិ៍្តខ្មាសនោះ ។ ដឹងរឿងនោះឪពុកម្តាយក្មេងស្រីបានទៅប្តឹងលោកនាយប៉ុសិ៍្តរដ្ឋបាល ឃុំរំចេក ។ ជនសង្ស័យឈ្មោះចេង ដារ៉ូ ឆ្លើយ សារភាពថា នៅថ្ងៃមួយក្នុងឱកាសបុណ្យភ្ជុំបិណ្ឌឆ្នាំ២០១០ រូបគេនិងកូនស្រីថៅកែបានទាក់ទងស្រលាញ់គ្នា តែមិនដែលបានប៉ះពាល់អ្វីទេ ។ ពួកគេក៏ធ្លាប់បានទៅមើលល្ខោនជាមួយគ្នានៅវត្តកំពាន់ ហើយនាងបានទិញក្រវិលកាឡៃ១គូឱ្យរូបគេទុកជាអនុស្សាវរីយ៍ទៀតផង ។
ជនជាប់ចោទបន្តថា ប្រហែលជា៧ថ្ងៃមកហើយ រូបគេបានស៊ីឈ្មួលដកដំឡូងដាក់រថយន្តឲ្យឪពុករបស់នាង ហើយបានជួបនាងនៅកន្លែងដកដំឡូងជារៀងរាល់ថ្ងៃ ។ នៅយប់ថ្ងៃទី១៤ មករា កម្មករ៥នាក់ដេកនៅខាងក្រោមផ្ទះ ចំណែករូបគេឡើងទៅដេកនៅលើផ្ទះឈើមានគ្នា៥នាក់ដែរ ។ ក្នុងពេលនោះកូនស្រីថៅកែបានហៅរូបគេឲ្យទៅដេកជាមួយ តែគេមិនបានប្រព្រឹត្តអ្វីជ្រុលជ្រួសខ្លាំងទេ គ្រាន់តែអោបថើបប៉ុណ្ណោះ ។ លុះដល់ពេលយប់ជ្រៅម្តាយមីងរបស់នាងក្រោកឃើញក៏ស្តីបន្ទោស ហើយបន្ទាប់មកបានប្រាប់រឿងនេះដល់ឪពុកម្តាយរបស់នាង ។ លោកវរសេនីយ៍ត្រីឯម កុសល អធិការនគរបាលស្រុកមេមត់បញ្ជាក់ថា ករណីបៀតបៀនកេរ្តិ៍ខ្មាសនេះស្ត្រីជាម្តាយរបស់ក្មេងស្រីរងគ្រោះ ដាក់ពាក្យបណ្តឹងទាមទារសំណងជំងឺចិត្តចំនួន៣.០០០ដុល្លារ និងសូមឲ្យផ្តន្ទាទោសទៅតាមច្បាប់ ៕
http://kohsantepheapdaily.com.kh/art...119-00572.html