ភ្នំពេញ៖ ដំរីមួយក្បាលដែលគេដឹងថាមានឈ្មោះសំបូរនៅរមណីយដ្ឋានវត្តភ្នំ ត្រូវបានម្ចាស់របស់វាធ្វើពិធីខួបកំណើតគម្រប់អាយុ៥១ ឆ្នាំឲ្យ កាលពីល្ងាចថ្ងៃទី១៧ ខែមករា ឆ្នាំ២០១១ ហើយពិធីនេះធ្វើនៅរមណីយដ្ឋានវត្តភ្នំ។
យើងធ្លាប់ដឹងថា ពិធីខួបកំណើតគេធ្វើសម្រាប់តែមនុស្សប៉ុណ្ណោះ ហើយគេធ្វើពិធីនេះដើម្បីរំលឹកដល់ថ្ងៃ ខែ ដែលអ្នកនោះបានកើតជារូបរាង ជាពិសេសគេធ្វើពិធីដើម្បីសុំសេចក្តីសុខ សេចក្តីចំរ៉ុង ចំរើន ឲ្យបានអាយុវែង ។ នៅក្នុងពិធីនោះដែរក៏មានការហូបចុក និងផឹកស៊ី ដែលធ្វើឲ្យពិធីនេះកាន់តែមានភាពសប្បាយរីករាយបានជួបជុំបង ប្អូន មិត្តភក្រ ហើយក៏មានការរាំរែកផងដែរ។
ចំពោះបញ្ហាដែលថាធ្វើពិធីខួបកំណើតឲ្យសត្វដំរីយើងមិនដែលដឹង ឡើយ ថាតើគេរៀបចំយ៉ាងដូចម្ដេច? ហើយគេធ្វើពិធីនេះដើម្បីអ្វី? ដូច្នេះកម្ពុជាថ្មីបានជួបជាមួយលោកស៊ិន ស៊នអាយុ៥៥ឆ្នាំ ជាម្ចាស់ដំរីនៅរមណីយដ្ឋានវត្តភ្នំ បច្ចុប្បន្នគាត់ស្នាក់នៅផ្ទះលេខ២៣៨ផ្លូវព្រះសីហនុ សង្កាត់បឹងកេងកង២ ខណ្ឌចំការមន រាជធានីភ្នំពេញបានប្រាប់ថា ដំរីរបស់គាត់មានឈ្មោះមីសំបូរគាត់ចិញ្ចឹមតាំងវាមានអាយុ៨ឆ្នាំ មកម៉្លេះ រហូតមកដល់ឥឡូវនេះហើយគាត់មករកស៊ីដឹកភ្ញៀវនៅទីនេះតាំងពី ឆ្នាំ១៩៨២។ ចំពោះការរកស៊ីដឹកភ្ញៀវមិនសូវជាកាក់កបប៉ុន្មានទេ។
គាត់បន្តថាថ្ងៃធម្មតាមិនសូវសំបូរភ្ញៀវទេតែបើថ្ងៃសៅរ៌និង ថ្ងៃអាទិត្យមានភ្ញៀវជិះដំរីគ្រាន់បើដែរគឺគាត់អាចរកចំណូលបាន ប្រាក់ពី១០ម៉ឺនទៅជាង១០ម៉ឺនក៏មានដែរហើយលុយទាំងនេះមួយចំណែក យកទៅទិញចំណីឲ្យវាស៊ី និងមួយចំនួនទៀតយកទុកខ្លួនឯងសម្រាប់ចិញ្ចឹមគ្រួសារ។
លោកស៊ិន ស៊នបាននិយាយថា ដំរីរបស់គាត់បានធ្វើពិធីខួបកំណើតចំនួនពីរលើកហើយ នៅក្នុងពិធីខួបកំណើតនេះមិនមានការផឹកស៊ីនិងមានកាត់នំដូចជា មនុស្សនោះទេ គ្រាន់តែមានរៀបចំ ទៀនធូប ផ្កាភ្ញី និងមានព្រះសង្ឃ អាចារ្យចូលរួមសូត្រមន្តប្រោះព្រំ សុំឲ្យមីសំបូរបានសេចក្តីសុខ សប្បាយនិងអាយុវែង ហើយគាត់ចេះធ្វើពិធីខួបកំណើតឲ្យដំរីនេះតាមឪពុកម្តាយរបស់គាត់។
លោក ស៊នបញ្ជាក់ថា នេះគឺជាថ្ងៃខួបកំណើតគម្រប់៥១ឆ្នាំសម្រាប់ដំរីរបស់គាត់ ហើយនៅក្នុងពិធី នេះក៏មានភ្ញៀវជាតិ និងភ្ញៀវអន្តរជាតិចូលរួមជាច្រើននាក់ផងដែរ៕
http://www.kampucheathmey.com/local-...-09-56-47.html