ខេត្តបន្ទាយមានជ័យ ៖ លោកតាម្នាក់អាយុ៧០ឆ្នាំទៅហើយ បានបើករថយន្តក្រឡាប់ធ្លាក់ពីលើផ្លូវចូលប្រឡាយទឹកបណ្តាលឱ្យ ឈ្លក់ស្លាប់ក្នុងរថយន្តដោយគ្មាននរណាអាចជួយស្រោចស្រង់ជីវិត គាត់បានឡើយ ។ ហេតុការណ៍នេះបានកើតឡើងកាលពីវេលាម៉ោង៨ និង១០នាទីព្រឹកថ្ងៃទី១៨ មករា លើកំណាត់ផ្លូវជាតិលេខ៦ ខាងកើតភូមិរហាល ឃុំរហាល ស្រុកព្រះនេត្រព្រះ ។
តាមព័ត៌មានពីមន្ត្រីនគរបាលចរាចរស្រុក ព្រះនេត្រព្រះបានឱ្យដឹងថា លោកតារងគ្រោះដែលស្លាប់ក្នុងឧប្បត្តិហេតុខាងលើឈ្មោះតាំង ប៊ុនខេង មានទីលំនៅភូមិចុងកៅស៊ូ ឃុំស្លក្រាម ក្រុងសៀមរាប ខេត្តសៀមរាប ។
លោកអនុសេនីយ៍ ឯកកែវ ប៊ុនយឿន អធិការនគរបាលស្រុកព្រះនេត្រព្រះបានឱ្យដឹងដែរថា តាមប្រភពព័ត៌មាននៅកន្លែងកើតហេតុប្រាប់សមត្ថកិច្ច គឺជនរងគ្រោះបានបើករថយន្តម៉ាកតូយ៉ូតាកាមរីចង្កូតឆ្វេងពណ៌ ត្រីឆ្លូញ ស៊េរីឆ្នាំ១៩៩៨ ពាក់ស្លាកលេខភ្នំពេញ 2I 9861 ពីលិចទៅកើតជាមួយអ្នករួមដំណើរម្នាក់ទៀត ។ លុះពេលដល់ចំណុចខាងលើ រថយន្តបានរេចង្កូតទៅរករថយន្តផ្សេងទៀតនៅខាងឆ្វេងដៃដែលបើក បញ្ច្រាសទិសគ្នា ពេលនោះគាត់បួងចង្កូតមកខាងស្តាំរួចក៏បួងទៅខាងឆ្វេងដៃវិញ បណ្តាលឱ្យជ្រុលចង្កូតក្រឡាប់ធ្លាក់ពីលើផ្លូវចូលប្រឡាយឈ្លក់ទឹក ស្លាប់ ចំណែកអ្នករួមដំណើរម្នាក់ទៀតរបួសស្រាល និងបានចេញពីរថយន្តដែលលិចទឹករួច។
លោកអធិការបន្តទៀតថា តាមការឱ្យដឹងពីសាច់ញាតិគឺលោកតាតែងតែធ្វើដំណើរទៅមកពីខេត្ត សៀមរាប មករោងចក្រផលិតទឹកកករបស់កូនគាត់នៅភូមិ១ សង្កាត់ព្រះពន្លា ក្រុងសិរីសោភ័ណ ។ នៅថ្ងៃកើតហេតុគាត់បើករថយន្តត្រឡប់ទៅខេត្តសៀមរាបវិញ ក៏ជួបហេតុការណ៍អកុសលបែបនេះតែម្តង ។ លោកអនុសេនីយ៍ឯកកែវ ប៊ុនយឿន បានបញ្ជាក់ថា រថយន្តត្រូវបានកំលាំងជំនាញស្ទូចយកមករក្សា ទុកនៅអធិការដ្ឋានស្រុករង់ចាំសាច់ញាតិមកទទួលយក ចំណែកសពលោកតារងគ្រោះក៏ត្រូវបានសាច់ញាតិក្រុមគ្រួសារនាំយកទៅ ចាត់ចែងធ្វើបុណ្យតាមប្រពៃណី ៕
http://kohsantepheapdaily.com.kh/art...118-02055.html