ខេត្តស្ទឹងត្រែង ៖ នារីវ័យក្មេងចំនួន២នាក់ជាសិស្សនៃវិទ្យាល័យព្រះរាជបូជនីយ កិច្ចខេត្តស្ទឹងត្រែងត្រូវនគរបាលច្រកទ្វារព្រំដែនត្រពាំងក្រៀល (ស្ទឹងត្រែង) ចាប់ឃាត់ខ្លួនក្នុងករណីដឹកជញ្ជូនគ្រឿងញៀនឆ្លងដែនខុសច្បាប់ពី ប្រទេសឡាវមកកម្ពុជា ។ យោងតាមរបាយការណ៍របស់ស្នងការដ្ឋាននគរបាលខេត្តឱ្យដឹងថា នគរបាលច្រកទ្វារអន្តរជាតិត្រពាំងក្រៀល (ស្ទឹងត្រែង) បានបង្ក្រាបករណីដឹកជញ្ជូនគ្រឿងញៀនឆ្លងដែនខុសច្បាប់នៅច្រកទ្វារ កាលពីវេលាម៉ោង១១ និង២៣នាទីព្រឹក ថ្ងៃទី១៥ មករា ។
ចំពោះការដឹកជញ្ជូនគ្រឿងញៀនឆ្លងដែនខុសច្បាប់ នេះ គឺសមត្ថកិច្ចត្រួតពិនិត្យឃើញ ខណៈពេលសិស្សស្រី២នាក់នោះកាន់យួរពីឡាវឆ្លងកាត់ច្រកទ្វារព្រំ ដែន ។ ថ្នាំញៀននោះប្រភេទមេតំហេ្វតាមីនចំនួន៩.៩៥៤គ្រាប់ ។ នារីសង្ស័យទាំង២នាក់នោះ ម្នាក់ឈ្មោះវ៉ាន ចាន់ ឬថុង លីម អាយុ១៩ឆ្នាំ និងម្នាក់ទៀតឈ្មោះលីន ដា អាយុ១៩ឆ្នាំ ។ អ្នកទាំង២ រស់នៅភូមិស្ពានថ្ម សង្កាត់ស្ទឹងត្រែង ។ ក្រោយពេលចាប់ខ្លួននារីសង្ស័យទាំង២នាក់ ត្រូវសមត្ថកិច្ចនគរបាលច្រកទ្វារព្រំដែនអន្តរជាតិត្រពាំងក្រៀល បញ្ជូនទៅនាយកដ្ឋានកណ្តាលសន្តិសុខក្រសួងមហាផ្ទៃដើម្បីចាត់ការ តាមនីតិវិធី ។ មិនមានមន្ត្រីផ្លូវការណាមួយទំលាយឱ្យដឹងថា ការចាប់ខ្លួនសិស្សស្រីទាំង២នាក់នោះ តើហេតុអ្វីបានជាបញ្ជូនទៅក្រសួងមហាផ្ទៃទៅវិញ ។ តាមមន្ត្រីនៅក្រសួងមហាផ្ទៃឱ្យដឹងថា ជនជាប់ចោទទាំង២នាក់ត្រូវបាននាំខ្លួនទៅតុលាការហើយកាលពីថ្ងៃ ទី១៧ មករា ។
ក្នុងករណីដាច់ដោយឡែកនៅវេលាម៉ោង២ រសៀលថ្ងៃទី១៦ មករា នគរបាលការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្ត បង្ក្រាបជនចែកចាយគ្រឿងញៀនចំនួន២នាក់នៅតាមផ្លូវជាតិលេខ ៧៨ក្នុងភូមិផ្ទះ១០០ខ្នង ឃុំក្បាលរមាស ស្រុកសេសាន ។ ជនសង្ស័យទាំងពីរនាក់ពេលទៅដល់ស្នងការដ្ឋាននគរបាលខេត្តបាន សារភាពថា ពួកគេទិញថ្នាំញៀនពីក្រុងស្ទឹងត្រែងក្នុងតំលៃ១គ្រាប់ ១០.០០០រៀល យកទៅលក់បាន២០.០០០រៀលក្នុង១គ្រាប់ ។ ថ្នាំញៀនទាំងនេះយកចែកចាយលក់នៅភូមិខ្សាច់ថ្មី ឃុំតាឡាត ស្រុកសេសាន ។
លោកអនុសេនីយ៍ឯកគឹម ស៊ន អនុប្រធានការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្ត ឱ្យដឹងថា សមត្ថកិច្ចបានតាមដាន និងកំណត់មុខសញ្ញាទើបស្ទាក់ចាប់នៅភូមិ១០០ខ្នង ផ្លូវចូលភូមិខ្សាច់ថ្មី ហើយពិនិត្យឃើញថ្នាំញៀនប្រភេទមេតំហ្វេតាមីនចំនួន៩៨គ្រាប់ ។ ជន២នាក់នោះ ម្នាក់ឈ្មោះរស់ ចាន់ពិសិដ្ឋ ភេទប្រុស អាយុ២១ឆ្នាំ មុខរបរមិនពិតប្រាកដ រស់នៅភូមិខ្សាច់ថ្មី ឃុំតាឡាត ស្រុកសេសាន និងឈ្មោះវ៉ន ធី ភេទប្រុស អាយុ១៩ឆ្នាំ ជាកសិករ រស់នៅភូមិខ្សាច់ថ្មី ឃុំតាឡាត ស្រុកសេសាន ។ ការឃាត់ខ្លួននេះជាមួយម៉ូតូម៉ាកវ៉េវអាល់ហ្វា ពណ៌ខ្មៅចំនួន១គ្រឿង ។ សមត្ថកិច្ចបានកសាងសំណុំរឿងបញ្ជូនជនសង្ស័យ និងវត្ថុតាងទៅសាលាដំបូងខេត្តតាមនីតិវិធី ៕
http://kohsantepheapdaily.com.kh/art...17-191953.html