Apple កំពុងតែពិភាក្សាជាមួយក្រុមហ៊ុន Foxconn និង Pegatron ដើម្បីវាយតម្លៃទៅលើលទ្ធភាពនៃការអនុវត្ត បើសិនត្រូវរើរោងចក្រផលិត iPhone ពីចិន ទៅកាន់អាមេរិក។
ប្រធានាធិបតីអាមេរិកដែលទើបតែជាប់ឆ្នោត លោក Donald Trump មានការយកចិត្តទុកដាក់ខ្លាំងទៅលើក្រុមហ៊ុន Apple ។ Donald Trump ធ្លាប់ជម្រុញឱ្យក្រុមហ៊ុននេះ ផលិត iPhone អេក្រង់ធំ អំពាវនាវឱ្យឈប់ប្រើប្រាស់ផលិតផល Apple ព្រោះតែមិនព្រមបើកសោទូរស័ព្ទរបស់ភេរវករ និងបានគំរាមថានឹងយកពន្ធថ្លៃ បើសិន iPhone មិនត្រូវបានផលិតនៅអាមេរិក។
លោក Donald Trump ថ្លែងថានឹងយកពន្ធច្រើន បើសិន iPhone មិនត្រូវបានផលិតនៅអាមេរិក
យោងតាមការគន់គូររបស់ Business Insider បើទោះគេរើរោងចក្រពីចិន ទៅកាន់អាមេរិក ឬApple ព្រមទទួលយកពន្ធ ១៥ទៅ៣៥% នោះ តម្លៃដំបូងរបស់ iPhone ក្រោមជំនាន់ Donald Trump ក៏នៅតែកើនឡើងយ៉ាងតិច ៥០ដុល្លារអាមេរិកក្នុងមួយគ្រឿង។
កាលពីថ្ងៃទី ១៧វិច្ឆិការ ទំព័រ Nikkei Asian Review បានចុះផ្សាយថា Apple ចាប់ផ្ដើមពិនិត្យមើលទៅលើលទ្ធភាពនៃការដំឡើង iPhone នៅក្នុងប្រទេសចាប់ពីខែមិថុនា ពោលគឺ៥ខែបន្ទាប់ពី Trump និយាយអំពីការដែល Apple ត្រូវផលិត iPhone នៅអាមេរិក។ ក្រុមហ៊ុន Apple កំពុងពិភាក្សាជាមួយ Foxconn និង Pegatron ដែលជាដៃគូធំ ទទួលខុសត្រូវក្នុងការដំឡើង iPhone និង iPad ដើម្បីធ្វើការរើរោងចក្រទៅកាន់អាមេរិក។
ប៉ុន្តែ គម្រោងនេះត្រូវបានក្រុមអ្នកជំនាញវាយតម្លៃថា ពិបាកនឹងធ្វើ ព្រោះថា ប្រាក់ខែបុគ្គលិកនៅអាមេរិក ថ្លៃជាងពីរដង បើធៀបនឹងនៅប្រទេសចិន។ ទន្ទឹមនឹងនេះ ការស្វែងរកពលករជំនាញរាប់សែននាក់ នឹងត្រូវចំណាយពេលច្រើន និងជួបការលំបាកផងដែរ។
ប្រែសម្រួល ៖ តារាប្រភព ៖ CNET