រាជធានីភ្នំពេញ ៖ រថយន្តស្ព័រទំនើបម៉ាកវ៉ុលវើហ្គែនមួយគ្រឿង ត្រូវយុវជនស្ទាវចំនួន៣នាក់ប្រដាប់ដោយដុំថ្ម ជើងឆត្រ និងកំាភ្លើងខ្លីបាញ់គំរាម និងវាយកំទេចកញ្ចក់កាលពីវេលាម៉ោង៥ និង៣០នាទីព្រឹកថ្ងៃទី១៦ មករា ២០១១ ខណៈពេលជនពាលទាំងនោះបើករថយន្តកៀរឱ្យរថយន្តស្ព័រឈប់នៅចំណុច កែងផ្លូវ១៥៤ និង៥៣ ស្ថិតនៅក្នុងសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ ។ នៅក្នុងអំពើហិង្សានេះពុំមានអ្នកណាម្នាក់របួសនោះទេ គ្រាន់តែរថយន្តស្ព័រទំនើបម៉ាកវ៉ុលវើហ្គែនត្រូវបែកកញ្ចក់ មុខក្រោយ ហើយជនដៃដល់បាញ់គំរាមពីរគ្រាប់ទៀត មុនពេលចាកចេញ ទំនងខ្លាចមានអន្តរាគមន៍ពីសមត្ថកិច្ច ។
សាក្សីនៅកន្លែង កើតហេតុបានឱ្យដឹងថា មុនពេលកើតហេតុ គាត់បានឃើញរថយន្តមួយគ្រឿងស៊េរីទំនើប ពណ៌ក្រហម ម៉ាកវ៉ុលវើហ្គែន ពាក់ស្លាកលេខប៉ៃលិន 2A-0314 បើកបរដោយបុរសម្នាក់ ហើយមាននារីស្រស់ស្អាតម្នាក់រួមដំណើរ បើកតាមបណ្តោយផ្លូវលេខ១៥៤ឆ្ពោះទៅទិសខាងលិច ។ លុះមកដល់កែងផ្លូវលេខ៥៣ ស្ថិតនៅសង្កាត់ផ្សារថ្មីទី៣ ខណ្ឌដូនពេញ ស្រាប់តែមានរថយន្តពីរគ្រឿង មួយគ្រឿងម៉ាកឡិចស៊ីស៤៧០ ពណ៌ស្លែ និងមួយគ្រឿងទៀតម៉ាកកាមរីឆ្លាម ពណ៌.ស បើកតាមពីក្រោយកៀរឱ្យរថយន្តនេះឈប់ ហើយមានយុវជនស្ទាវ៣នាក់ចុះពីលើរថយន្តមានម្នាក់ប្រដាប់ដោយ កាំភ្លើងខ្លីមិនចាំម៉ាកបញ្ជាឱ្យភាគីម្ចាស់រថយន្តស្ព័រ និងនារីស្រស់ស្អាតម្នាក់ទំនងជាស្រីស្នេហ៍ចុះចេញពីក្នុងរថយន្ត នោះ ។ រួចជនពាលទាំងនោះយកដុំថ្ម និងជើងឆត្រវាយបំបែកកញ្ចក់រថយន្តស្ព័រ បណ្តាលឱ្យបែកកញ្ចក់មុខក្រោយខ្ទេច ព្រមទាំងស្រែកគំរាមមិនឱ្យតបតទៀតផង។
ប្រជាពលរដ្ឋដែលឃើញ ហេតុការណ៍បាននាំគ្នានិយាយថា ពិតជាសាហាវមែនមិនខុសពីក្នុងរឿងវីដេអូចិននោះទេ ក្រោយជនពាលវាយកំទេចទៅលើរថយន្តគូទំនាស់រួចហើយ ពួកគេបានបាញ់ចំនួនពីរគ្រាប់ទៀតគំរាមមុនពេលចាកចេញទៅ ។ រីឯម្ចាស់រថយន្តរងគ្រោះ ដែលចុះរត់ចេញពីរថយន្តមិនហ៊ាននៅក្បែរឡើយ ។ បន្ទាប់ពីជនពាលចេញផុត ទើបស្ទុះមកមើលរថយន្តដែលខូចខាត ព្រមទាំងទំនាក់ទំនងរថយន្តស្ទូចនាំយកទៅបាត់ ។
សមត្ថកិច្ច បាននិយាយថា ក្រោយកើតហេតុបាន១០នាទីកំលាំងនគរបាលល្បាតរដ្ឋបាលផ្សារ ថ្មីទី៣មកដល់ចំណុចកើតហេតុ ប៉ុន្តែយឺតពេលបន្តិច ព្រោះជនពាលចេញផុតទៅហើយ។ ចំណែកម្ចាស់រថយន្តស្ព័រមិនបានដាក់ពាក្យបណ្តឹងនោះទេ តែទោះជាយ៉ាងណា អត្តសញ្ញាណម្ចាស់រថយន្តត្រូវគេស្គាល់ឈ្មោះសន ឌី ភេទប្រុស អាយុ២៨ឆ្នាំ ជាយោធា ស្នាក់នៅខណ្ឌចំការមន រាជធានីភ្នំពេញ ។
ដើមចមនៃអំពើហិង្សាបាញ់គំរាម និងវាយកំទេចរថយន្តនៅចំណុចខាងលើ ទំនងផ្តើមចេញពីរឿងស្រីស្នេហ៍ ដែលសង្ស័យកើតឡើងប្រហែលជានៅក្នុងក្លឹបកំសាន្តណាមួយ ទើបភាគីដៃដល់បើករថយន្តដេញតាមមកដល់កែងផ្លូវលេខ១៥៤ និងលេខ៥៣ សង្កាត់ផ្សារថ្មីទី៣ កៀរឱ្យរថយន្តឈប់រួចនាំគ្នាសំពងទៅលើរថយន្តតែម្តង ។ ជនរងគ្រោះមិនបានដាក់ពាក្យបណ្តឹងនោះទេ នៅព្រឹកថ្ងៃដដែល ហើយមូលហេតុបែបណាក៏ភាគីរងគ្រោះមិនបានបញ្ជាក់ប្រាប់ដែរ គឺ ស្ងាត់រៀងខ្លួន ឬមួយក៏គុំទុកក្នុងចិត្ត ដើម្បីសងសឹកវិញ ?
http://kohsantepheapdaily.com.kh/art...15-203843.html