អាពាហ៍ពិពាហ៍រវាងនាង Mangli ជាមួយនឹងសុនក Sheru ត្រូវបានគេធ្វើឡើងទៅតាមពិធីបុណ្យសាសនា និងទំនៀមទម្លាប់ ក្នុងបំណងកាត់ផ្ដាច់បណ្ដាសា កំពុងតែមានចំពោះនារីវ័យក្មេងម្នាក់នេះ។
នៅក្នុងភូមិដាច់ស្រយាលមួយ ក្នុងរដ្ឋ Jharkhand ភាគខាងកើតប្រទេសឥណ្ឌា មានពិធីរៀបការចម្លែកមួយ ត្រូវបានគេរៀបចំធ្វើឡើង ដោយមានការចូលរួមពីអ្នកភូមិជាច្រើនសិបនាក់ នោះគឺពិធីរៀបការ រវាងនារីវ័យក្មេងរូបស្រស់ម្នាក់ ជាមួយនឹងសុនកមួយក្បាល។ ពិធីរៀបការនេះ ធ្វើ ឡើងដើម្បីដោះបណ្ដាសាឱ្យនារីជាកូនក្រមុំ។
ប៉ុន្ដែ នាង Mangli មិនសប្បាយចិត្តនោះទេ នៅពេលត្រូវរៀបការជាមួយសុនក ប៉ុន្ដែនាងជឿជាក់ថា ពិធីរៀបការនេះ នឹងជួយឱ្យនាងប្ដូរផ្លាស់ស្ថានភាពអាក្រក់នាបច្ចុប្បន្នរបស់ខ្លួន។
លោក Sri Amnmunda ដែលជាឱពុករបស់នាង Mangli ឱ្យដឹងថា តាមទំនៀមទម្លាប់ របស់ជនជាតិលោក ការរៀបការជាមួយសុនក គឺជាវិធីតែមួយគត់ដែលអាចជួយបណ្ដេញនូវភាពចង្រៃឧបទ្រព ឱ្យចេញពីជីវិត។ ក្រៅតែពីសុនក ពិធីនេះ ត្រូវបានធ្វើឡើង ដូចទៅនឹងពិធីរៀបការរវាងមនុស្ស និងមនុស្ស។
គ្រួសារខាងស្រី ក៏ចាត់ទុក និងគោរពស្រឡាញ់សុនក ដូចទៅនឹងកូនប្រសា ក៏ដូចជាសាច់ញាតិរបស់ពួកគេ។ នេះមិនមែនជាលើកដំបូងនោះទេ ដែលមានពិធីរៀបការរវាងនារីម្នាក់ ជាមួយនឹងសុនកមួយក្បាល ពិធីនេះ ត្រូវគេធ្វើឡើងជាហូរហែ នៅពេលមានគេយល់ថា កូនចៅកំពុងជួបរឿងមិនល្អក្នុងជីវិត។
យោងតាមទំនៀមទម្លាប់របស់អ្នកភូមិ ពិធីនេះនឹងមិនមានផលប៉ះពាល់អវិជ្ជមានអ្វីដល់ Mangli នោះឡើយ។ នាងនឹងអាចរៀបការជាមួយបុរសម្នាក់ ដោយមិនចាំបាច់ធ្វើពិធីសុំលែងលះពីសុនក Sheru ។
សុនក Sheru ដែលជាកូនកម្លោះ ក្នុងថ្ងៃរៀបការរបស់ខ្លួន កំពុងជិះរថយន្ដជាមួយមិត្តរបស់វា
នាង Mangli ថ្លែងថា ៖ “នៅថ្ងៃណាមួយ នាងខ្ញុំនឹងបានរៀបការជាមួយបុរសម្នាក់។ ក្ដីប្រាថ្នារបស់នារីទាំងអស់ គឺចង់រៀបការជាមួយបុរសសង្ហាម្នាក់។ ដូច្នេះ នាងខ្ញុំ ក៏កំពុងតែរង់ចាំមនុស្សក្នុងសុបិនរបស់ខ្លួន”៕
ប្រែសម្រួលដោយ ៖ តារាប្រភព ៖ Daily Mail