ក្រុមកម្លាំងសមត្ថកិច្ចចម្រុះរបស់សាលាខណ្ឌដូនពេញ និងក្រុមហ៊ុនស៊ូកាគូអ៊ីន ដែលទទួលបានសិទ្ធិពីរដ្ឋាភិបាលកម្ពុជាក្នុងការអភិវឌ្ឍគម្រោង បឹងកក់ដ៏ចម្រូងចម្រាស បានធ្វើការរឹបអូសយកម៉ាស៊ីនថតចំនួនពីរគ្រឿងរបស់ក្រុមអ្នកថតរូប កាសែត ភ្នំពេញ ប៉ុស្តិ៍ នៅព្រឹកថ្ងៃទី ១៤ ខែមករា ឆ្នាំ ២០១១នេះ។ ការរឹបអូសនេះ ធ្វើឡើងក្រោយពេលអ្នកថតរូបកាសែត ភ្នំពេញ ប៉ុស្តិ៍ បានព្យាយាមថតយក រូបភាពនៃការបង្ក្រាបលើការតវ៉ារបស់ប្រជាពលរដ្ឋនៅតំបន់បឹងកក់។
អ្នកព័ត៌មានកាសែត ភ្នំពេញ ប៉ុស្តិ៍ ដែលស្ថិតក្នុងហេតុការណ៍ បានរៀបរាប់ឲ្យដឹងថា នៅក្រោយពេលបំបែកក្រុមប្រជាពលរដ្ឋរួច កម្លាំងសមត្ថកិច្ចចម្រុះប្រមាណ ៧នាក់ បានរត់សំដៅទៅចាប់ក្រៀកអ្នកថតរូបកាសែត ភ្នំពេញ ប៉ុស្តិ៍ លោកសុវណ្ណ ភីឡុង ហាក់ដូចជា សកម្មភាពកម្លាំងសមត្ថកិច្ចចាប់បង្ក្រាបក្រុមចោរយ៉ាងដូច្នោះដែរ។ បើតាមលោកសុវណ្ណ ភីឡុង កម្លាំងសមត្ថកិច្ច បានចាប់ក្រៀក និងក្របួចកអាវលោក មុននឹងចាប់យកម៉ាស៊ីនថតរបស់លោក បើទោះបីជាលោកបានបង្ហាញប័ណ្ណសម្គាល់ខ្លួនជាអ្នកកាសែត ដែលចេញ ដោយក្រសួងព័ត៌មាន និងប័ណ្ណសម្គាល់ខ្លួនរបស់កាសែត ភ្នំពេញ ប៉ុស្តិ៍។
ក្រោយពីមានអន្តរាគមន៍ពីក្រុមអ្នកកាសែត ប្រជាពលរដ្ឋ និងអង្គការសង្គមស៊ីវិល កម្លាំងសមត្ថកិច្ចចម្រុះ និងក្រុមហ៊ុន បានយល់ ព្រមប្រគល់ម៉ាស៊ីនថតទាំងពីរគ្រឿងដល់អ្នកថតរូបកាសែត ភ្នំពេញ ប៉ុស្តិ៍វិញ។ ប៉ុន្តែការប្រគល់នោះ កម្លាំងសមត្ថកិច្ចដែលស្ថិតនៅក្នុងទីស្នាក់ គណៈកម្មាធិការអភិវឌ្ឍន៍បឹងកក់ បានតម្រូវឲ្យអ្នកថតរូបកាសែត ភ្នំពេញ ប៉ុស្តិ៍ លុបរូបថតដែលបានថតនៅក្នុងសកម្មភាពនៅព្រឹកមិញ និង បានតម្រូវឲ្យផ្តិមេដៃ នៅលើលិខិតកំណត់ហេតុមួយ។
ទាក់ទងនឹងទង្វើនេះ ក្រុមអ្នកសង្កេតការណ៍ បានលើកឡើងថា នេះគឺជាការរំលោភបំពានទៅលើសិទ្ធិអ្នកសារព័ត៌មាន និងសិទ្ធិ បញ្ចេញមតិ។ សមាគមកម្ពុជាការពារអ្នកកាសែត បានធ្វើការថ្កោលទោសចំពោះសកម្មភាពរបស់កម្លាំងចម្រុះ និងក្រុមហ៊ុនស៊ូកាគូអ៊ីន ដែល បានរំលោភលើសិទ្ធិសេរីភាពនៃការបញ្ចេញមតិ និងសេរីភាពសារព័ត៌មាន។ សមាគមកម្ពុជាការពារអ្នកកាសែតបានថ្លែងថា៖�ទង្វើនេះគឺប្រាសចាក ពីអ្វីដែលរដ្ឋាភិបាលកម្ពុជាកំពុងតែធ្វើក្នុងការលើកស្ទួយសេរីភាព សារព័ត៌មាន�។ សមាគមបានអំពាវនាវដល់រដ្ឋាភិបាលកម្ពុជា ក្នុងការពង្រឹង ការអនុវត្តសេរីភាពបញ្ចេញមតិឲ្យបានត្រឹមត្រូវ ជាពិសេសនៅក្នុងការអនុវត្តនៅថ្នាក់មូលដ្ឋាន៕
http://khmer.phnompenhpost.com/index...ion&Itemid=102