ភ្នំពេញ ៖ ការបាញ់ប្រហារមួយបានកើតឡើង កាលពីវេលាម៉ោង២៤និង៤៥នាទី នៅភូមិត្រពាំងថ្លាន់សង្កាត់ពន្សាំង ខណ្ឌដង្កោ រាជធានីភ្នំពេញ ដែលជនបង្កបានប្រើកាំភ្លើងអាកាបាញ់សំដៅជនរងគ្រោះពីរនាក់ ប្ដីប្រពន្ធ ប៉ុន្តែសំណាងល្អជនរងគ្រោះជាប្ដីរត់គេចខ្លួនទើបរួចផុតអាយុ ជីវិត។ ជនរងគ្រោះមានឈ្មោះតឿនសំអូន ហៅយក់ ភេទ ប្រុស អាយុ២៦ និងប្រពន្ធឈ្មោះជា ចាន់ អាយុ២៤ឆ្នាំ ជាកម្មការិនីកាត់ដេរ។
សមត្ថកិច្ចបានឲ្យដឹងថា នៅមុនពេលកើតហេតុ ជនរងគ្រោះពីរនាក់ប្ដីប្រពន្ធបានសំរាកនៅលើផ្ទះ ហើយមានជនដៃដល់ម្នាក់ បានយកកាំភ្លើងអាកាមកគោះខាងក្រោមផ្ទះទារលុយ ពេលនោះប្រពន្ធជនរងគ្រោះ ឆ្លើយ ថាមិនមានលុយនោះទេ។ ស្របពេលនេះជនរងគ្រោះជាប្ដីក៏បានឆ្លើយតបថា បើចង់បានលុយទៅ រកអ្នកផ្សេងទៅ គាត់គ្មានលុយទេ គ្រាន់តែឮសម្លេង ជនរងគ្រោះ ជាប្ដីភ្លាម ជនដៃដល់បានទាញកាំភ្លើងអាកា បាញ់សំដៅតែមិនត្រូវ លុះអាមេ គ្រាប់ទីពីរ បាញ់មិនចេញ។ ជនរងគ្រោះឃើញសភាពបែបនេះក៏រត់ចេញពីផ្ទះសំដៅទៅភូមិដើម្បីឲ្យអ្នកស្រុក ជួយ ស្រាប់តែជនដៃដល់ដេញតាមបាញ់ប្រមាណ១៦គ្រាប់ តែសំណាងល្អ ជនរងគ្រោះមិនបានត្រូវគ្រាប់នោះទេ។ ដោយសារខឹងចិត្តបាញ់មិនត្រូវ ជនដៃដល់បានត្រឡប់មកផ្ទះវិញ បាញ់សំដៅទៅលើផ្ទះ៤គ្រាប់ទៀត ប៉ុន្តែមិនបានត្រូវប្រពន្ធជនរងគ្រោះនោះទេ។ បន្ទាប់មកជនដៃដល់បានបាញ់សម្លាប់សត្វគោមួយក្បាលនិងបាញ់ឲ្យរង របួសគោ១ក្បាលផងដែរ។ ក្រោយកើតហេតុជនដៃដល់ បានគេចខ្លួនបាត់។ សមត្ថកិច្ចកំពុងតាមដានស្រាវជ្រាវរកមុខជនល្មើសព្រោះអាចស្គាល់ អត្តសញ្ញាណខ្លះ ហើយ ដោយសារជនរងគ្រោះឆ្លើយថាសង្ស័យជារឿងគំនុំច្រើនជាងប្លន់ ដោយសារជនរងគ្រោះធ្លាប់មានទំ នាស់ជាមួយប្អូនជនដៃដល់នាគ្រាកន្លងមក៕
http://www.kampucheathmey.com/local-...-03-11-54.html