រាជធានីភ្នំពេញ ៖ យ៉ាងហោចណាស់មានមនុស្ស៤នាក់បានរងរបួសដោយសារការប៉ះទង្គិច គ្នាមួយប្រាវរវាងកំលាំងសណ្តាប់ធ្នាប់ខណ្ឌសែនសុខដែលមានគ្នា ៩នាក់ ជាមួយនឹងកម្មករជាងកញ្ចក់មានគ្នា៧នាក់ ព្រោះតែរឿងបើករថយន្តវ៉ាគ្នា ។ ហេតុការណ៍នេះបានកើតឡើងនៅវេលាម៉ោង៧ព្រឹក ថ្ងៃទី១០ មករា ឆ្នាំ២០១១ ត្រង់ចំណុចស្តុបផ្សារដីហុយ សង្កាត់ទឹកថ្លា ខណ្ឌសែនសុខ ។ ក្រោយពីកើតការប្រទូស្តរ៉ាយគ្នាភាគីទាំង២ត្រូវបានប៉ូលិសខណ្ឌ សែនសុខ នាំខ្លួនទៅសាកសួរទាំងអស់គ្នា ។
ភាគីសណ្តាប់ធ្នាប់៩នាក់មានម្នាក់ឈ្មោះសំ វិចិត្រ អាយុ២៨ឆ្នាំ ត្រូវរបួសបែកក្បាលដេរជាច្រើនថ្នេរ ដោយសារត្រូវភាគីកម្មករវាយនឹងបំពង់ទីព ក្រៅពីនេះគ្មានរបួសទេ ។ ចំណែកភាគីកម្មករជាងកញ្ចក់ត្រូវរបួស៣នាក់ ១-ឈ្មោះវង្ស សុវ៉ាត ភេទប្រុស អាយុ៣១ឆ្នាំ ជាអ្នកបើកបររថយន្ត បានរងរបួសហើមសៀតផ្កាខាងស្តាំ ដោយត្រូវដំបង ២-ឈ្មោះណុប កៅ ភេទប្រុស អាយុ១៧ឆ្នាំ បានរងរបួសចង្កេះ និងពោះ និង៣-ឈ្មោះឈន ចាន់ទី ភេទប្រុស អាយុ២៧ឆ្នាំ បានរងរបួសត្រង់ស្មាខាងក្រោយ និងពោះ ឯកម្មករផ្សេងទៀតមិនមានរងរបួសទេ ។
តាមប្រភពព័ត៌មានពីកន្លែងកើតហេតុបានឱ្យ ដឹងថា ដើមចមនៃការប្រទូស្តរ៉ាយគ្នានេះ គឺមុនពេលកើតហេតុរថយន្តដឹកកម្មករជាងកញ្ចក់ម៉ាកកូរ៉េ បានបើកវ៉ារ៉ឺម៉ក ខណៈពេលរថយន្តបើកដល់ស្តុបផ្សារដីហុយ ក៏បានឈប់ភ្លើងស្តុប។ ពេលនោះរថយន្តដឹកកំលាំងសណ្តាប់ធ្នាប់ក៏បានមកឈប់ពីក្រោយ ហើយបានប្រើសំដីធំៗ ដោយចោទភាគីកម្មករថា បើករថយន្ត �ឌឺ� ពួកគេ ហើយពេលក្រុមកម្មករឆ្លើយតបវិញ ស្រាប់តែក្រុមសណ្តាប់ធ្នាប់ទាំងនោះចុះទៅវាយអ្នកបើកបររថយន្ត ដឹកកម្មករជាងកញ្ចក់ ។ ពេលនោះក្រុមកម្មករជាងកញ្ចក់មិនបានតបតវិញទេ ក៏បានបើករថយន្តទៅមុខទៀត ប៉ុន្តែត្រូវបានកំលាំងសណ្តាប់ធ្នាប់តាមឃាត់រថយន្ត ហើយទាញអ្នកបើកបរចុះមកវាយទៀត ទើបពួកកម្មករទ្រាំមិនបានក៏វាយតបវិញទៅ ។ ទោះបីជាយ៉ាងណា កំលាំងសណ្តាប់ធ្នាប់ខណ្ឌបានឆ្លើយបដិសេធថា ពួកគេមិនបានវាយពួកកម្មករមុនទេ គឺពួកកម្មករទៅវិញទេ ដែលបានវាយកំលាំងសណ្តាប់ធ្នាប់មុន ។
គួររំលឹកថា កំលាំងសណ្តាប់ធ្នាប់ខណ្ឌសែនសុខ ត្រូវគេរិះគន់ច្រើន ព្រោះពេលបំពេញភារកិច្ចច្រើនតែយកអំពើហិង្សាមកប្រើដូចជា ចាប់អ្នករត់រ៉ឺម៉កនៅផ្សារព្រែកព្នៅ ធ្វើឱ្យមានទំនាស់គ្នារហូតដល់ពួករ៉ឺម៉កកែនគ្នារកវាយទៅលើ កំលាំងសណ្តាប់ធ្នាប់ខណ្ឌនេះវិញទៀតផង។ ទោះបីយ៉ាងណា ប្រជាពលរដ្ឋសុំឱ្យលោកអភិបាលខណ្ឌសែនសុខ មេត្តាយកមនុស្សបំរើការងារជាកំលាំងសណ្តាប់ធ្នាប់ទៅរៀនសូត្រ ច្បាប់ផង ៕
http://kohsantepheapdaily.com.kh/art...111-03464.html