រាជធានីភ្នំពេញ ៖ បុរសម្នាក់ស្លាប់នៅក្នុងមន្ទីរពេទ្យព្រះកុសុមៈដោយសាររងរបួស ក្នុងហេតុការណ៍វាយតប់គ្នារវាងក្រុមយុវជន២ក្រុមដែលមួយក្រុម មានគ្នាជិត១០នាក់ កាលពីវេលាម៉ោង១០ និង១៥នាទីយប់ថ្ងៃទី១០ មករា នៅតាមផ្លូវលេខ២៧១ មុខមន្ទីរពេទ្យព្រះកុសុមៈសង្កាត់ទឹកល្អក់ទី២ ខណ្ឌទួលគោក ។ បន្ទាប់ពីបង្កឱ្យមនុស្សស្លាប់មកជនដៃដល់ឈ្មោះគុយ ហេង ភេទប្រុស អាយុ២០ឆ្នាំ ជាសិស្សវិទ្យាល័យជា ស៊ីម សន្ធរម៉ុក រួមទាំងបក្សពួកប្រមាណ៦ទៅ៧នាក់ទៀតរត់គេចខ្លួនបាត់ ។ ជនរងគ្រោះត្រូវសមត្ថកិច្ចឱ្យដឹងថា ឈ្មោះជា ហ៊ុល ហៅតឿ អាយុ២៣ឆ្នាំ ស្នាក់នៅផ្ទះជួល តាមផ្លូវលេខ២៧១ សង្កាត់ទឹកល្អក់ទី១ ខណ្ឌទួលគោក បានរងរបួសក្បាល ត្រចៀកស្តាំ ហើយស្លាប់នៅវេលាម៉ោង៣ និង៤៥នាទីនាទីរំលងអធ្រាត្រថ្ងៃទី១១ មករា ។
សមត្ថកិច្ចឱ្យដឹងថា នៅយប់កើតហេតុជនរងគ្រោះរួមទាំងបងប្អូនចំនួន៣នាក់ទៅផឹកទឹកត្នោត ជូរនៅអតីតសួនច្បារតោពីរ ហើយជួបជុំជាមួយមិត្តភក្តិប្រមាណ៦ ទៅ៧នាក់ ។ ពេលស្រវឹង ជនរងគ្រោះនិងបងប្អូនធ្វើដំណើរត្រឡប់មកផ្ទះវិញ ហើយពេលជិតដល់ផ្ទះមានទំនាស់ពាក្យសំដីជាមួយមនុស្សមួយក្រុមមានគ្នា ប្រមាណ៦ ទៅ៧នាក់ ។ ជំលោះនោះឈានទៅដល់ការវាយ និងគប់ដុំថ្មដាក់គ្នាទៅវិញទៅមកបណ្តាលឱ្យរងរបួសម្នាក់ បញ្ជូនទៅព្យាបាលនៅមន្ទីរពេទ្យព្រះកុសុមៈ ហើយក្រោយមកបានស្លាប់ ។
តាមសាក្សីនៅកន្លែងកើតហេតុឱ្យដឹងថា មនុស្សចំនួន២ក្រុមបានដេញគប់ និងវាយគ្នាពេញដងផ្លូវ ហើយជនរងគ្រោះត្រូវភាគីម្ខាងដេញចាប់បានក៏វាយរហូតរងរបួសធ្ងន់ ។ បន្ទាប់ពីបង្ករបួស រួចជនដៃដល់គេចខ្លួនបាត់ ។
សមត្ថកិច្ច ប៉ូលិសខណ្ឌទួលគោកស្រាវជ្រាវស្គាល់អត្តសញ្ញាណក្រុមជនបង្ករបួសម្នាក់ ឈ្មោះគុយ ហេង ភេទប្រុស អាយុ២០ឆ្នាំ ជាសិស្សវិទ្យាល័យជា ស៊ីម សន្ធរម៉ុក តែគេចខ្លួនបាត់ទៅហើយ ។ នៅព្រឹកថ្ងៃទី១១ មករា សមត្ថកិច្ចបានស្រាវជ្រាវឃាត់ខ្លួនជនម្នាក់ឈ្មោះផាត់ កុមារ អាយុ២៤ឆ្នាំ ជាកម្មករសំណង់ រស់នៅតាមផ្លូវលេខ១៣៨សង្កាត់ទឹកល្អក់ទី១ ដើម្បីសាកសួរ ។ ស្ត្រីឈ្មោះឆាយ សាវី អាយុ៥២ឆ្នាំ ជាម្តាយជនរងគ្រោះឱ្យដឹងថា ពេលកូនប្រុសរបស់គាត់ត្រឡប់ទៅផ្ទះវិញ ស្រាប់តែត្រូវជនម្នាក់ស្ទុះវាយ ដូច្នេះហើយគេក៏ដេញវាយវិញ ។ បន្ទាប់មកជនម្នាក់នោះទៅហៅបក្សពួកមកដេញវាយ និងចាប់វាយកូនប្រុសរបស់គាត់បណ្តាលឱ្យរងរបួសធ្ងន់ ហើយស្លាប់នៅមន្ទីរពេទ្យ ៕
http://kohsantepheapdaily.com.kh/art...11-024426.html