គេមិនមានការភ្ញាក់ផ្អើលប៉ុន្មាននៅពេលបណ្ដាតារាស្រីពិភពលោក ដូចជា Celine Dion , Mariah Carey ឬកំពូលតារាចម្រៀងស្រីស្បែកខ្មៅ Aretha Franklin ជាដើម ហាក់បីកំពុងសាបរលាបកេរឈ្មោះដ៏ល្បីល្បាញ របស់ខ្លួន ហើយអាជីព និងតំណែងឯករបស់ពួកគេកំពុងទទួលការគំរាមពីបណ្ដាតារាស្រីវ័យក្មេងថ្មីៗ ដូចជា Rihanna ដែលប្រកបដោយភាពទាក់ទាញ។
នៅពេលគេនិយាយដល់ពិភពចម្រៀង R&B នោះឈ្មោះ Beyoncé Knowles ត្រូវគេស្គាល់ថាជា តារា ចម្រៀងស្រីដែលធ្លាប់ទទួលបានជោគជ័យបំផុតក្នុងពិភពលោក ប៉ុន្ដែកាលពី ប៉ុន្មានឆ្នាំមុន Beyoncé Knowles ត្រូវបាត់បង់តំណែងកំពូលនេះ ហើយវាក៏ធ្លាក់ទៅលើកណ្ដាប់ដៃតារាវ័យ ២៥ឆ្នាំ គឺនាង Rihanna ។ ដោយក្លាយជាអ្នកល្បីឈ្មោះខ្នាតអន្ដរជាតិតាំងពីអាយុ ១៥ឆ្នាំ Rihanna ត្រូវបានគេស្គាល់តាមរយៈចម្រៀង Caribbean របស់ R&B ។ ក្រុមអ្នកជំនាញការនិយាយថា Rihanna មានសម្លេងពិរោះ នៅ ពេលនាងច្រៀងជាមួយបទដែលប្រើប្រាស់ឧបករណ៍ភ្លេងបុរាណ(acoustic)។ នេះគឺជាសំដីលើកទឹកចិត្តមួយដែលមានប្រសិទ្ធិភាព ព្រោះថាក្រោយមក Rihanna ទទួលបានជោគជ័យយ៉ាងត្រចះត្រចង់ពីកម្រងចម្រៀង Music of the Sun (២០០៥), A Girl Like Me (២០០៥), Good Girl Gone Bad (២០០៧), Rated R (២០០៩), Loud (២០១0) និង Talk That Talk (២០១១)។ល។លើសពីនេះ tour សម្ដែងដែលមានឈ្មោះថា 777 របស់ Rihanna ដែលបានធ្វើដំណើរទៅកាន់ប្រទេសចំនួន ៧ ដើម្បីសម្ដែងលើឆាកចំនួន ៧ រយៈពេល ៧ថ្ងៃ ក្នុងបំណងឃោសនាឱ្យកម្រងចម្រៀងទី ៧របស់នាង ដែលមានចំណងជើងថា Unapologetic បាននាំមកនូវភាពអស្ចារ្យជាច្រើនសម្រាប់ទស្សនិកជននៅជុំវិញពិភពលោក។ Rihanna ត្រូវគេមើលឃើញថា ជាមនុស្សហ៊ានស៊ីហ៊ានសង ដោយនាងបានធ្វើដំណើរដោយយន្ដហោះ Boeing 777 ក្នុង tour សម្ដែង 777 របស់នាង។ ក្រៅពីនេះ នាងក៏បានផ្ដល់ជំនួយដល់ក្រុមអ្នកគាំទ្រសំខាន់ៗរបស់នាង ក៏ដូចជាអ្នកកាសែតចំនួន ១៥០នាក់ ដែលតំណាងឱ្យប្រទេសចំនួន ៨២ នៅជុំវិញពិភពលោក ដើម្បីឱ្យពួកគេបានចូលរួមទស្សនាការសម្ដែងផងដែរ។
យោងតាមទំព័រ hollywood.com កំពូលតារាស្រី Rihanna កំពុងស្ថិតនៅក្នុងដំណើរសម្ដែងជុំវិញពិភពលោកឆ្នាំ ២០១៣ របស់នាង មានឈ្មោះថា “2013 Diamonds World Tour”។ ដំណើរសម្ដែងលើកទី ៤ របស់ Rihanna នឹងតម្រូវឱ្យ នាង ឡើងឆាកជាច្រើននៅ អាមេរិកខាងជើង, អឺរ៉ុប, អូស្ដ្រាលី, មជ្ឈឹមបូព៌ា និងញ៉ូហ្ស៊ីឡែន។មូលហេតុអ្វី ធ្វើឱ្យ Rihanna បង្កើតបានជាការកក្រើកក្នុងវិស័យតន្ដ្រី ហើយសាងកេរឈ្មោះល្បីល្បាញ ដោយបទចម្រៀងទាំងឡាយរបស់នាងតែងតែស្ថិតក្នុងលំដាប់កំពូល ដែលមិនមែនតារាចម្រៀងណាក៏អាចធ្វើបាន? តាមការឱ្យដឹងពីតារាចម្រៀង Jay Z មូលហេតុគឺស្ថិតនៅលើសម្លេងច្រៀងដ៏មាំមួនប្លែក និងពេញដោយមនោសញ្ចេតនារបស់ Rihanna ។ចំណែក Rihanna ក៏បានទទួលស្គាល់ថា កាលពីដើមឡើយ នាងតែងស្រមៃថា ថ្ងៃណាមួយនឹងក្លាយជាតារាចម្រៀងមួយរូប ហើយពេលនេះ ក្ដីប្រាថ្នារបស់នាងក្លាយជាការពិត។ ប៉ុន្ដែ Rihanna អះអាងថា ខ្លួននៅតែចាត់ទុកខ្លួនឯងជាអ្នកគាំទ្ររបស់តារាជើងចាស់ដែលខ្លួនចូលចិត្ត។
បច្ចុប្បន្ន ទ្រព្យសរុបរបស់តារាស្រី វ័យ ២៥ឆ្នាំរូបនេះ ត្រូវបានគេគន់គូរឃើញថា មានចំនួនដល់ទៅជាង ២៤៥ លានដុល្លារអាមេរិក នេះបើតាមទំព័រ mediamass ៕
ដោយ ៖ តារាប្រភព ៖ Hollywoodlife