មួយថ្ងៃក្រោយពីកាសែត Financial Times បានចុះផ្សាយព័ត៌មានថា Huawei មានបំណងចង់ទិញយកក្រុមហ៊ុន Nokia ពេលនេះ Huawei បានចេញមុខបដិសេធជាផ្លូវការ ចំពោះព័ត៌មានចចាមអារាមនេះ។
នៅក្នុងសេចក្តីប្រកាសដែលទើបតែបង្ហាញ ខាង Huawei បានបង្ហាញនូវសារមួយយ៉ាងច្បាស់លាស់ថា ក្រុមហ៊ុនមិនមានបំណងចង់ទិញ ក្រុមហ៊ុន Nokia ដូចដែលកាសែត Financial Timesបានចុះផ្សាយឡើយ។ Huawei បានបញ្ជាក់ថា ពួកយើងមិនមានគំរោងក្នុងការទិញ ក្រុមហ៊ុនNokia ទេ។ សំរាប់យុទ្ធសាស្រ្ត និងគោលដៅជំនួញរបស់ពួកយើង គឺបន្តច្នៃប្រឌិតផលិតផល និងបច្ចេកវិទ្យាថ្មីៗ ដើម្បីផ្តល់ជូនដល់អតិថិជន ទូទាំងពិភពលោក នូវបណ្តាផលិតផល និងបច្ចេកវិទ្យា ដ៏ល្អៗបំផុត។
មុននេះមួយថ្ងៃ នៅឯព្រឹត្តិការណ៍បង្ហាញណែនាំស្មាតហ្វូនស្តើងជាងគេបំផុត នៅលើពិភពលោកAscend P6 ប្រធានសាជីវកម្ម Huawei គឺលោក Richar Yu បានឲ្យដឹងថា Huawei កំពុងតែពិចារណា លើការទិញដូរមួយ ហើយលទ្ធភាពជោគជ័យ នៃការទិញដូរនេះ គឺវាអាស្រ័យទៅលើ កំរិតនៃការត្រៀមខ្លួន របស់ Nokia។
ពាក់ព័ន្ធនឹងបញ្ហា Nokia នេះដែរ បើតាមប្រភពពី Wall Street Journal (WSJ) បានបង្ហោះព័ត៌មានមួយឲ្យដឹងថា Microsoft បានអង្គុយធ្វើការចចារ ទិញលក់ជាមួយ Nokia ប៉ុន្តែជាលទ្ធផល គឹបរាជ័យ។ WSJ បានបង្ហើឲ្យដឹងបន្ថែមថា ការចចារទិញនេះលក់នេះ បានធ្វើឡើងនៅទីក្រុង Londonប្រទេសអង់គ្លេស ក្នុងខែមិថុនា ថ្មីៗនេះ ហើយភាគីទាំងពីរ បានចចារគ្នា ដល់ដំណាក់កាលចុងក្រោយ ផងដែរ។ ប៉ុន្តែ ភាគីទាំងសងខាង នៅតែមិនអាចរកដំណោះស្រាយរួម ក្នុងការទិញលក់នេះទេ ទីបំផុត គឺបរាជ័យ៕
ដោយ៖ សិលាប្រភព៖ Zing