កីឡាករ​សំខាន់​ៗ អាល្លឺ​ម៉ង់​របួស ៣​នាក់ មុន​ប៉ះ​បារាំង ថ្ងៃ​​ព្រហស្បតិ៍ វគ្គ​ពាក់​កណ្តាល​ផ្តាច់​....

(ប៉ារីស)៖ កីឡាករខ្សែប្រយុទ្ធជួរមុខ Marion Gomez និងមិត្តរួមក្រុមខ្សែបម្រើ Sami Khedira រួមជាមួយ Bastian Schweinsteiger សុទ្ធតែស្ថិតក្នុងបញ្ជីរបស់គ្រូបង្វឹក Joachim Loew នៃក្រុមជម្រើសជាតិអាល្លឺម៉ង់ ដែលត្រៀមប្រជែងកៅអីវគ្គផ្តាច់ព្រ័ត្រ ទល់នឹងម្ចាស់ផ្ទះបារាំង នារាត្រីថ្ងៃព្រហស្បតិ៍សប្តាហ៍នេះហើយនៅក្នុងទីក្រុង Marseille នៃយុទ្ធនាការ Euro 2016។

សារព័ត៌មាន BBC បានផ្សាយឲ្យដឹងថា កីឡាករវ័យ ៣០ឆ្នាំ ដែលស៊ុតបញ្ចូលទីបាន ២គ្រាប់ពីការចូលលេងនៅ Euro 2016 បាន៤ប្រកួតនោះ ត្រូវបានប្តូរចេញភ្លាមៗ បន្ទាប់ពីបញ្ជូនបាល់ឲ្យបាល់មិត្តរួមក្រុម Mesut Oezil ស៊ុតបញ្ចូលទី នាំមុខអ៊ីតាលី កាលពីរាត្រីថ្ងៃសៅរ៍សប្តាហ៍មុនក្នុងវគ្គ ៨ក្រុមចុងក្រោយ ដោយសារតែរងរបួសរមួលសាច់ដុំ។

ទន្ទឹមគ្នានោះ១ថ្ងៃបន្ទាប់ សហព័ន្ធកីឡាបាល់ទាត់អាល្លឺម៉ង់ (DBF) ក៏បានចេញសេចក្តីថ្លែងការណ៍ថា អតីតខ្សែប្រយុទ្ធ ក្លឹប Bayern Munich រូបនេះ នឹងខកខានក្នុងក្រុមឥន្រ្ទីដែកអាល្លឺម៉ង់ រហូតដល់ចប់ Euro 2016 ដោយមិនអាចចូលលេងបានទេ ពេលម្ចាស់ពាន World Cup 2014 មួយនេះ ត្រូវបានប្រកួតជាមួយម្ចាស់ផ្ទះមាន់គកបារាំងនៅវគ្គ ៤ក្រុមចុងក្រោយ។

បន្ថែមពីលើនេះ សហព័ន្ធអាល្លឺម៉ង់ ក៏បានបង្ហាញពីមន្ទិលសង្ស័យសម្រាប់កីឡាករ ២រូបទៀតមាន កីឡាករខ្សែបម្រើមក ពីក្លឹប Juventus, Sami Khedira របួសសាច់ដុំ និងកីឡាករមកពីក្លឹប Manchester United, Bastian Scheinsterger រងរបួសជង្គង់៕

width=730