បុរសជនជាតិកម្ពុជាម្នាក់ និងថៃម្នាក់ត្រូវបានសមត្ថកិច្ចកម្ពុជាចាប់ឃាត់ខ្លួន កាលពីថ្ងៃអាទិត្យសង្ស័យពីបទធ្វើចារកម្មឲ្យប្រទេសថៃ ក្រោយពេលពួកគេចូលមូលដ្ឋានយោធាកម្ពុជា នៅសង្កាត់អូរស្មាច់។
លោក ពុធ ធីង៉ុក ស្នងការរងនគរបាលខេត្តឧត្តរមានជ័យ បានមានប្រសាសន៍ កាលពីថ្ងៃចន្ទម្សិលមិញថា ពួកគេត្រូវបានចាប់ខ្លួន នៅពេលពួកគេចូលបន្ទាយកងយោធពលខេមរភូមិន្ទ។ លោក បន្តថា៖ �ពួកគេប្រាប់យើងថា ពួកគេចូលបន្ទាយកងទ័ព ដើម្បីសុំធ្វើការកាប់ដើមឈើតូចៗ យកទៅសាងសង់ផ្ទះឲ្យបុរសថៃដែលមានប្រពន្ធខ្មែរ នៅឃុំអូរស្មាច់ តែយើងមិនទាន់បានព័ត៌មានអ្វីពីពួកគេនៅឡើយទេ ខណៈយើងកំពុងសួរចម្លើយពួកគេ�។ ជនសង្ស័យទាំងពីរនាក់នេះ ត្រូវបាននាំយកទៅឃុំខ្លួននៅស្នងការដ្ឋាននគរបាលខេត្ត។
លោក ប៉ិច សុខិន អភិបាលខេត្តឧត្តរមានជ័យ បានថ្លែងកាលពីថ្ងៃចន្ទថា លោកពុំមានព័ត៌មានអ្វី អំពីជនជាតិកម្ពុជា និងថៃដែលត្រូវបានចាប់ខ្លួន សង្ស័យពីបទធ្វើចារកម្មនោះទេ តែថាបន្ទាយយោធា ជាកន្លែងហាមឃាត់។ លោកគូសបញ្ជាក់ថា៖ �មនុស្សសាមញ្ញ មិនត្រូវបានអនុញ្ញាតឲ្យចូលបន្ទាយទាហានទេនៅពេលកងកម្លាំងប្រដាប់ អាវុធ កំពុងប្រឈមមុខគ្នានោះ។ នៅពេលពួកគេបំពានបម្រាមនេះ ពួកគេនឹងត្រូវប្រឈមមុខនឹងការចាប់ខ្លួន ពីបទធ្វើចារកម្ម�។
លោក សៅ សុជាតិ មេបញ្ជាការរងកងយោធពលខេមរភូមិន្ទភូមិភាគ ៤ បានថ្លែងបញ្ជាក់កាលពីថ្ងៃចន្ទអំពីការចាប់ខ្លួនជនសង្ស័យទាំងពីរនាក់នេះថាការស៊ើបអង្ក េតកំពុងបន្តធ្វើ ដើម្បីឲ្យដឹងថា តើពួកគេពិតជាបានធ្វើចារកម្មឲ្យប្រទេសថៃមែន ឬមិនមែន។ ទាក់ទងទៅនឹងស្ថានការណ៍នៅតំបន់ប្រាសាទតាមាន់ និងតាក្របី លោក សៅ សុជាតិ បានឲ្យដឹងថា មានសភាពស្ងប់ស្ងាត់ជាធម្មតា មិនមានការផ្ទុះអាវុធទៀតទេ។
ចំណែក លោក យឹម ពឹម មេបញ្ជាការកងពលតូចលេខ ៨ ប្រចាំនៅតំបន់ព្រំដែនប្រាសាទព្រះវិហារបាននិយាយ កាលពីម្សិលមិញថា ស្ថានភាពនៅព្រំដែនមានសភាពស្ងប់ស្ងាត់។ លោកឲ្យដឹងទៀតថា កងទ័ពថៃមួយចំនួនបានដកចេញពីខ្សែត្រៀមជួរមុខអស់រយៈពេលមួយ សប្តាហ៍មកហើយ។
(ប្រភព៖ ppp)