ប្រភពពីមន្ត្រីយោធាកម្ពុជា បានឲ្យដឹងថា មេបញ្ជាការសមរភូមិកម្ពុជា និងថៃ គ្រោងនឹងជួបចរចាគ្នាជាថ្មីទៀតនៅថ្ងៃស្អែក នៅនឹងមូលដ្ឋានផ្ទាល់ ដើម្បីស្តារស្ថានការណ៍ព្រំដែនឲ្យវិលត្រឡប់ទៅដូចមុនថ្ងៃទី២២ មេសាឡើងវិញ បន្ទាប់ពីទាហាននៃប្រទេសទាំងពីរបានវាយប្រយុទ្ធគ្នាយ៉ាងបង្ហូរឈាមអស់រយៈពេលជាង ១០ថ្ងៃមកនោះ។
មន្ត្រីយោធាម្នាក់ប្រចាំការនៅតំបន់ព្រំដែនខេត្តឧត្តរមានជ័យ ទល់មុខនឹងខេត្តសុរិន្ទរបស់ថៃ បានថ្លែងប្រាប់ភ្នំពេញ ប៉ុស្តិ៍ នៅរសៀលថ្ងៃពុធនេះថា ជំនួបចរចាមួយទៀត ត្រូវបានគ្រោងធ្វើឡើងនៅថ្ងៃស្អែក នៅតំបន់ប្រាសាទតាមាន់ និងតាក្របី ជាទីដែលទាហាននៃប្រទេសជិតខាងនឹងគ្នានេះ បានបាញ់ផ្លោងដាក់គ្នាទៅវិញទៅមកចាប់តាំងពីថ្ងៃទី២២ មេសា រហូតដល់ថ្ងៃទី០៣ ឧសភាម្សិលមិញ។
មន្ត្រីដដែលបាននិយាយថា ជំនួបចរចាថ្នាក់មេបញ្ជាការសមរភូមិនេះ ដែលគ្រោងធ្វើឡើងនៅវេលាម៉ោង ៨ព្រឹកស្អែកនេះ នឹងពិភាក្សាគ្នាអំពីការដកចម្រូង ការសម្អាតលេនដ្ឋាន ការរក្សាទុកទាហានម្ខាង ២នាក់ និងការកែប្រែតំបន់ប្រាសាទបុរាណទាំងពីរនេះ ទៅជាតំបន់ទេសចរណ៍ដូចមុនថ្ងៃទី២២ មេសាវិញ។
ប្រទេសកម្ពុជា និងថៃ បានឈានទៅដល់មានជម្លោះនឹងគ្នា បន្ទាប់ពីប្រទេសថៃបានបញ្ជូនទ័ពចូលមកឈ្លានពានទឹកដីកម្ពុជា កាលពីខែកក្កដា ឆ្នាំ២០០៨ តែប៉ុន្មានថ្ងៃក្រោយពីប្រាសាទព្រះវិហារចំណាស់ ៩០០ឆ្នាំរបស់កម្ពុជា ត្រូវបានចុះក្នុងបញ្ជីបេតិកភណ្ឌពិភពលោក។
ទាហានកម្ពុជា និងថៃ បានវាយប្រយុទ្ធគ្នាយ៉ាងបង្ហូរឈាមយ៉ាងខ្លាំងក្លាបំផុតនៅចាប់តាំងពីថ្ងៃទី២២ មេសា រហូតមកដល់ថ្ងៃទី០៣ ឧសភាថ្ងៃនេះ ដោយបណ្តាលឲ្យមនុស្សយ៉ាងតិច ១៨នាក់ បានស្លាប់នៅក្នុងការវាយប្រយុទ្ធអស់រយៈពេលជាង ១០ថ្ងៃនេះ ខណៈមនុស្សរាប់សិបនាក់ទៀតបានរងរបួស ព្រមទាំងបង្ខំឲ្យប្រជាពលរដ្ឋរាប់ម៉ឺននាក់នៃភាគីទាំងសងខាងធ្លាក់ខ្លួនទៅជាជនភៀសស ឹក៕
(ដោយ៖ ភ្នំពេញប៉ូស្តិ៍)
ដោយ៖ មិនា