ប្រទេសកម្ពុជា បានច្រានចោលព័ត៌មានដែលបាននិយាយនៅក្នុងកាសែត Pattaya Mail ថា កម្ពុជាកំពុងជ្រើសរើសកងទ័ពបន្ថែមទៀត ដើម្បីធ្វើសង្គ្រាមប្រឆាំងនឹងថៃ និងបានចាត់ទុកព័ត៌មាននេះ ជាការបំផ្លើសការពិតពីសំណាក់ប្រព័ន្ធផ្សព្វផ្សាយថៃ។
លោក ទិត សុធា អនុប្រធាន និងជាអ្នកនាំពាក្យ នៃអង្គភាពព័ត៌មាន និងប្រតិកម្មរហ័ស ទីស្តីការគណៈរដ្ឋមន្ត្រី បានថ្លែងប្រាប់ភ្នំពេញ ប៉ុស្តិ៍ នៅថ្ងៃច័ន្ទនេះថា៖ �នេះគឺជាការបំផ្លើសព័ត៌មានរបស់ប្រព័ន្ធផ្សព្វផ្សាយថៃ ហើយវាជាព័ត៌មានមិនពិត�។
អ្នកនាំពាក្យរូបនេះ បានឲ្យដឹងទៀតថា ប្រទេសកម្ពុជាពុំបានជ្រើសរើសទ័ពបន្ថែមនោះឡើយ ប៉ុន្តែ កំពុងតែពង្រឹងកងទ័ព និងមូលដ្ឋានទ័ព ដែលមានស្រាប់នៅតាមបណ្តោយព្រំដែន ដើម្បីការពារបូរណភាព និងអធិបតេយ្យភាពកម្ពុជា។
លោកបានថ្លែងបញ្ជាក់ថា៖ �ទោះជាយ៉ាងណា យើងមានកម្លាំងគ្រប់គ្រាន់ក្នុងការការពារទឹកដី និងប្រយុទ្ធប្រឆាំងនឹងការឈ្លានពានរបស់កងទ័ពថៃ�។
លោកនាយករដ្ឋមន្ត្រីកម្ពុជា ហ៊ុន សែន កាលពីថ្ងៃទី២៣ ខែកុម្ភៈកន្លងមក បានថ្លែងថា រដ្ឋាភិបាលរបស់លោកគ្មានគោលការណ៍ជ្រើសរើសយុវជន សិស្ស និស្សិត ចូលធ្វើទាហានឡើយ ដោយលោកបានបញ្ជាក់ថា កម្លាំងទ័ពរបស់កម្ពុជា លើសពីចំនួនគ្រប់គ្រាន់សម្រាប់ការប្រយុទ្ធទៅទៀត។
ផ្ទុយទៅវិញ លោក ហ៊ុន សែន លាតត្រដាងថា កម្ពុជាមានបំណងកាត់រំសាយកងទ័ពបន្ថែមទៀត ប៉ុន្តែ កម្ពុជាបានរក្សាទុកកងទ័ពរបស់ខ្លួនវិញ ដោយសារតែការឈ្លានពានរបស់ថៃមកលើអធិបតេយ្យភាពកម្ពុជា។
(ប្រភព៖ ភ្នំពេញប៉ុស្តិ៍)