សម្តេចនាយករដ្ឋមន្ត្រី ហ៊ុន សែន បានថ្កោលទោសរដ្ឋាភិបាលថៃ ដោយសម្តីខ្លាំងៗ
ចំពោះការបង្កសង្គ្រាមឈ្លានពានជាថ្មីលើទឹកដីកម្ពុជា នៅចំណុចប្រាសាទតាមាន់ និង
ប្រាសាទតាក្របី នាប៉ុន្មានថ្ងៃជាប់ៗគ្នានេះ។
ក្នុងមហាសន្និបាតវិសាមញ្ញសមាគមនារីកម្ពុជា ដើម្បីសន្តិភាព និងអភិវឌ្ឍន៍ឆ្នាំ1999-2011
នៅវិមានសន្តិភាព នាព្រឹកថ្ងៃទី27មេសា ឆ្នាំ2011 សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា រដ្ឋាភិបាលអាប់ភិស៊ីត ជារដ្ឋាភិបាលថៃទី1ហើយ នៅក្នុងប្រវត្តិសាស្ត្រ ដែលធ្វើសង្គ្រាមឈ្លានពានបង្កើតរឿងនៅក្នុងផ្ទៃក្នុងខ្លួនឯង មិនចប់ ហើយផ្ទេររឿងផ្ទៃក្នុង
ខ្លួនឯង មកជារឿងព្រំដែនកម្ពុជា-ថៃ។ បង្ក្រាបប្រជាជនខ្លួនឯងមិនអស់ចិត្ត ហើយមក
សម្លាប់ប្រជាជនកម្ពុជាទៀត។ មេដឹកនាំថៃបច្ចុប្បន្ននេះ បង្កសង្គ្រាម ហើយបញ្ជូនបញ្ហា
ផ្ទៃក្នុងរបស់ខ្លួន មកជាសង្គ្រាមព្រំដែន។
សម្តេច ហ៊ុន សែន បានបញ្ជាក់ថា ចរិតឈ្លានពាននេះមិនចោលទេ នៅក្នុងដំណាក់កាល ប្រវត្តិមេដឹកនាំថៃកន្លងមក មានតែនាយករដ្ឋមន្ត្រីថៃនេះតែមួយគត់ ដែលសម្លាប់ប្រជាជន
ខ្លួនឯងមិនអស់ចិត្តហើយ មកសម្លាប់ប្រជាជនប្រទេសជិតខាងទៀត។
ប្រសាសន៍របស់សម្តេចនាយករដ្ឋមន្ត្រី ហ៊ុន សែន យ៉ាងដូច្នេះ បានធ្វើឡើងជាសាធារណៈ
ក្រោយពីកងទ័ពថៃ បានបើកការវាយប្រហារជាបន្តបន្ទាប់លើកម្ពុជា ចាប់តាំងពីថ្ងៃទី22មេសា
ឆ្នាំ2011 នៅព្រំដែនប្រាសាទតាមាន់ និងប្រាសាទតាក្របី ក្នុងខេត្តឧត្តរមានជ័យ៕
(ប្រភពពី cen)