ភ្នំពេញ៖ រថយន្តដឹកកងកម្លាំងនគរបាលចំនួន ១០ គ្រឿង និងរថយន្តសម្រាប់ដឹក ពិរុទ្ធជនចំនួន ០១ គ្រឿងទៀត ត្រូវបាន ឯកឧត្តម កែប ជុតិមា អភិបាល រាជធានីភ្នំពេញ ប្រគល់ជូនស្នងការដ្ឋាននគរបាលរាជធានីភ្នំពេញ បន្ទាប់ពីអង្គប្រជុំបូកសរុបការអនុវត្តគោលនយោបាយ ភូមិ-សង្កាត់ មានសុវត្ថិភាព នៅរាជធានីភ្នំពេញ រយៈពេល ០៦ ខែ ដើមឆ្នាំបានបញ្ចប់ នា ព្រឹកថ្ងៃទី១៣ ខែសីហា ឆ្នាំ២០១២ ដើម្បីធ្វើជាមធ្យោបាយសម្រាប់ប្រើប្រាស់ ក្នុងកិច្ចប្រតិបត្តិការថែរក្សាសន្តិសុខ សណ្តាប់ធ្នាប់ នៅក្នុងរាជធានីភ្នំពេញ។
ថ្លែងក្នុងពិធីប្រគល់-ទទួលនេះ ឯកឧត្តម កែប ជុតិមា បានសម្តែងនូវ ការកោតសសរសើរចំពោះកងកម្លាំងនគរបាល ក៍ដូចជាកងកម្លាំង អាវុធហត្ថរាជធានី ដែលកន្លងមកបានខិតខំប្រឹងប្រែងបំពេញការងារក្នុងការធានានូវសន្តិសុខ សុវត្ថិភាព សណ្តាប់ធ្នាប់ជូនប្រជាពលរដ្ឋ ទោះបីជា លទ្ធភាពនៅ មិនទាន់ពេញបរិបូរណ៍ យ៉ាងណាក៏ដោយ តែជាលទ្ធផលការងារ កងកម្លាំង របស់យើងសម្រេចបានស្នាដៃជាច្រើន ក្នុងការបំពេញភារកិច្ច ជូនជាតិ ទាំងការរៀបចំសន្តិសុខក្នុងរាជធានីភ្នំពេញ ក៏ដូចជាការទទួលថ្នាក់ ដឹកនាំ ប្រទេសជាមិត្តផងដែរ ព្រោះថា ភ្នំពេញគឺជាកន្លែងប្រជុំធំៗ ដូចជាកិច្ចប្រជុំកំពូលអាស៊ានជាដើម។
ជាមួយគ្នានេះ ឯកឧត្តមអភិបាល បានធ្វើការផ្តាំផ្ញើដល់កងកម្លាំងនគរបាលនៃស្នងការដ្ឋាននគរបាលរាជធានីភ្នំពេញ ត្រូវចេះថែទាំ រថយន្តដែលទទួលបាននេះ ឲ្យបានម៉ត់ចត់ ធ្វើយ៉ាងណាឲ្យមធ្យោបាយទាំងនេះ ប្រើប្រាស់បានយូរអង្វែងក្នុងការបំពេញ ភារកិច្ច ហើយត្រួវចាត់ទុកថា សម្បត្តិរបស់រដ្ឋ ក៏ដូចជាសម្បត្តិយើងដែរ ព្រោះថា សាលារាជធានីភ្នំពេញ ក៏នៅមានការ លំបាកចំពោះថវិកាក្នុងការដោះស្រាយនៅឡើយ ហើយការផ្តល់មធ្យោបាយនេះ ក៏ជាការលើកទឹកចិត្តដល់កងកម្លាំង នគរបាលក្នុងការបំពេញភារកិច្ចឲ្យប្រកបដោយប្រសិទ្ធភាពផងដែរ៕
ដោយ៖ វណ្ណៈប្រភព៖ គេហទំព័រសាលារាជធានីភ្នំពេញ