រាជធានីភ្នំពេញ ៖ បុរសជនជាតិវៀតណាមម្នាក់ និងជនជាតិខ្មែរម្នាក់ ដែលជួលបន្ទប់ស្នាក់នៅក្នុងក្រុមទី១ ភូមិទួលគោក សង្កាត់ទួលសង្កែ ត្រូវសមត្ថកិច្ចចំរុះ ខណ្ឌប្ញស្សីកែវឆ្មក់ចូលឆែកឆេរកាលពីវេលាម៉ោង១១ និង៣០នាទីព្រឹកថ្ងៃទី២២ កុម្ភៈ ហើយដកហូតបានថ្នាំញៀនប្រភេទម៉ាទឹកកកចំនួន២០កញ្ចប់តូច ។ ការឆ្មក់ចូលឆែកឆេរនេះ ក៏មានការចូលរួមពីក្រឡាបញ្ជីផងដែរ ។
នៅក្នុងផ្ទះជួលនោះសមត្ថកិច្ចចំរុះឃាត់ខ្លួន ឈ្មោះកាំង យ៉ាំងអ៊ុក ហៅម៉ើយ ភេទប្រុស អាយុ៤០ឆ្នាំ ជាជនជាតិវៀតណាម និងឈ្មោះកែវ សិរី ភេទប្រុស អាយុ៣៦ឆ្នាំ មុខរបរជាអ្នករត់ម៉ូតូឌុបមានលំនៅភូមិព្រៃទា សង្កាត់ចោមចៅ ខណ្ឌដង្កោ ។ តាមលោកចាន់ សាហ៊ុត អធិការរងខណ្ឌប្ញស្សីកែវឱ្យដឹងថា ជនសង្ស័យឈ្មោះកាំង យ៉ាំងអ៊ុក ហៅម៉ើយ ជាមុខសញ្ញាជួញដូរគ្រឿងញៀន ។ ដោយមានការស្រាវជ្រាវពីកំលាំងជំនាញដែលសហការគ្នាជាមួយនគរបាល ប៉ុសិ៍្តទួលសង្កែ សមត្ថកិច្ចបានសុំគោលការណ៍ពីព្រះរាជអាជ្ញាអមសាលាដំបូងរាជ ធានីភ្នំពេញ ចុះឆែកឆេរផ្ទះជនសង្ស័យរកឃើញថ្នាំញៀនប្រភេទម៉ាទឹកកកចំនួន២០ កញ្ចប់ដែលជននេះលាក់នៅក្រោមពូក ។
លោកចាន់ សាហ៊ុត បន្តទៀតថា ដោយមានការណែនាំពីលោកឧត្តមសេនីយ៍ត្រីបែន រ័ត្ន ស្នងការរង និងជាប្រធានការិយាល័យប្រឆាំងបទល្មើសនៃស្នងការដ្ឋាននគរបាលរាជ ធានីភ្នំពេញ ជំរុញឱ្យសមត្ថកិច្ចស្រាវជ្រាវពីមុខសញ្ញាចែកចាយ និងជួញដូរគ្រឿងញៀន ហើយបង្ក្រាប និងទប់ស្កាត់ឱ្យបានទាំងស្រុងនូវការជួញដូរចែកចាយគ្រឿងញៀននៅក្នុង រាជធានីភ្នំពេញ សមត្ថកិច្ចបាននិងកំពុងតែធ្វើសកម្មភាពបង្ក្រាបដូចភ្លៀងរលឹមអ៊ីចឹង ។ ជនសង្ស័យត្រូវបានសមត្ថកិច្ចបញ្ជូនទៅកាន់អធិការដ្ឋានដើម្បី ស្រាវជ្រាវរកបក្សពួកបន្តទៀត ៕
http://kohsantepheapdaily.com.kh/art...22-013723.html