ខេត្ត ព្រះសីហនុ ៖ ស្ត្រីអ្នកចំរៀង២នាក់បងប្អូន និងបុរសម្នាក់ស្លាប់នៅនឹងកន្លែង និងអ្នករបួសធ្ងន់ម្នាក់បានស្លាប់ ហើយមនុស្សចំនួនជាង១០នាក់ផ្សេងទៀតរងរបួសធ្ងន់ក្នុងឧបទ្ទវ ហេតុគ្រោះថ្នាក់ចរាចរណ៍ដ៏រន្ធត់មួយកើតឡើងរវាងរថយន្តដឹក ក្រុមតន្ត្រីសម័យនឹងរ៉ឺម៉កម៉ូតូកង់បីដឹកប្រេងយ៉ាងច្រើនប៊ីដុង បណ្តាលឱ្យមានការឆាបឆេះយានយន្តទាំង២យ៉ាងសន្ធោរសន្ធៅ។ ហេតុការណ៍គ្រោះថ្នាក់ចរាចរណ៍គួរឱ្យរន្ធត់នេះបានកើតឡើងកាលពី ថ្ងៃទី១៩ កុម្ភៈ ២០១១ វេលាម៉ោង៩ និង៤៥នាទីព្រឹកនៅតាមបណ្តោយផ្លូវជាតិលេខ៤ត្រង់ចន្លោះគីឡូ ម៉ែត្រលេខ១៨៦ទៅ១៨៧ស្ថិតក្នុងភូមិត្រពាំងស្អុយ ឃុំអណ្តូងថ្ម ស្រុកព្រៃនប់។
ព័ត៌មានពីកន្លែងកើតហេតុបានឱ្យដឹងថា រថយន្តដឹកក្រុមតន្ត្រីសម័យអូរសេតេដែលជាក្រុមតន្ត្រីល្បីមួយ នៅក្រុងព្រះសីហនុត្រូវបានគេជួលមកប្រគំកំដរក្នុងពិធីអាពាហ៍ ពិពាហ៍មួយនៅចំការដូងប្រេង។ តាមព័ត៌មានពីមន្ត្រីសមត្ថកិច្ចស្រុកដែលចុះទៅដល់កន្លែងគ្រោះ ថ្នាក់ចរាចរណ៍នោះបានឱ្យដឹងថា រថយន្តដែលដឹកក្រុមតន្ត្រីអូរសេតេនោះម៉ាកហ៊ីយ៉ាន់ដាយចំណុះ២ តោនកន្លះពណ៌សគ្មានស្លាកលេខបានផ្ទុកឧបករណ៍ភ្លេង និងក្រុមតន្ត្រីចំនួន១២នាក់បើកបរក្នុងទិសដៅ ពីខេត្តព្រះសីហនុតាមដងផ្លូវជាតិលេខ៤។
លុះមកដល់ចំណុចកើតហេតុបានបុកជាមួយម៉ូតូ រ៉ឺម៉កកង់បីដែលបើកបរ បញ្រ្ចាសទិសគ្នាយ៉ាងពេញទំហឹងលើផ្លូវជាតិលេខ៤ ។ អ្នកឃើញហេតុការណ៍និយាយថា ពេលបុកលាន់ដូចរន្ទះនោះ រថយន្តឆាបឆេះបណ្តើរបើកទៅមុខបណ្តើរហើយធ្លាក់ពីលើផ្លូវជាតិ ទើបឆាបឆេះខ្លាំងនៅចំងាយប្រហែល១០ម៉ែត្រពីផ្លូវជាតិ ។ រីឯមនុស្សខ្លះឆេះស្លាប់ក្នុងកាប៊ីន ខ្លះខ្ទាតចេញមកស្លាប់ក្រៅរថយន្ត និងខ្លះរបួសត្រូវភ្លើងឆេះដួលដេករដូករណែល ។ ចំណែកអ្នកបើកបររ៉ឺម៉កម៉ូតូត្រូវរថយន្តអូសទៅជាមួយដែលគេឃើញ មនុស្សជាប់ក្រោមរថយន្ត រីឯម៉ូតូឆេះខ្ទេចជាមួយរថយន្តដែរ។ ហេតុការណ៍បុកគ្នានេះ សមត្ថកិច្ចនៅពុំទាន់សន្និដ្ឋានយ៉ាងណានៅឡើយទេ ព្រោះកំពុងតែស្រាវជ្រាវរកការពិត ។
អ្នករងគ្រោះដែលជិះក្នុងរថយន្តចំនួន១២នាក់ មាន១-ឈ្មោះឡេង សុខនី ភេទប្រុស អាយុ៣១ឆ្នាំ ជាអ្នកបើកបររថយន្ត របួសធ្ងន់, ២-ឈ្មោះភួង សានីកា ភេទស្រី អាយុ២១ឆ្នាំ ជាអ្នកចំរៀង ពេលកើតហេតុបានខ្ទាតចេញពីរថយន្តស្លាប់នៅនឹងកន្លែង, ៣-ឈ្មោះភួង ម៉ារ៉ា ភេទស្រី អាយុ២០ឆ្នាំ ជាអ្នកចំរៀង និងជាប្អូនត្រូវភ្លើងឆេះខ្លោចស្លាប់នៅនឹងកន្លែង, ៤-ឈ្មោះសូរ សារ៉េត ភេទប្រុស អាយុ២២ឆ្នាំ រស់នៅក្រុងព្រះសីហនុ របួសធ្ងន់ និងស្លាប់នៅព្រឹកថ្ងៃទី២០ កុម្ភៈ ។ ៥-ឈ្មោះម៉ែន រស្មី ភេទស្រី អាយុ២៥ឆ្នាំ របួសធ្ងន់, ៦-ឈ្មោះអ៊ឹម សោភ័ណ ភេទប្រុស អាយុ៣០ឆ្នាំ រស់នៅក្រុម១០មណ្ឌល៣ សង្កាត់២ ខណ្ឌមិត្តភាព របួសធ្ងន់, ៧-ឈ្មោះរឿង កុសល ភេទប្រុស អាយុ២៥ឆ្នាំ របួសធ្ងន់, ៨-ឈ្មោះធន សំអុល ភេទប្រុស អាយុ២២ឆ្នាំ របួសធ្ងន់, ៩-ឈ្មោះស៊ុន សុតាល់ ភេទប្រុស អាយុ៣១ឆ្នាំ របួសធ្ងន់, ១០-ឈ្មោះខេត រ៉ា ភេទប្រុស អាយុ៣៤ឆ្នាំ របួសធ្ងន់, ១១-ឈ្មោះតែង អន ភេទស្រី អាយុ២៩ឆ្នាំ របួសធ្ងន់ និង១២-បាត់អត្តសញ្ញាណ រកមិនឃើញឈ្មោះ។ ចំណែកខាងម៉ូតូរ៉ឺម៉កមានតែអ្នកបើកម្នាក់ឯងទេ ឈ្មោះនាក់ សារ៉ាត ហៅវ៉ាត ភេទប្រុស អាយុ៣០ឆ្នាំ មានទីលំនៅភូមិភ្នំតូច ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ ត្រូវរថយន្តអូសទាំងមនុស្ស ទាំងម៉ូតូដាច់ចេញពីរ៉ឺម៉កជាប់ពីក្រោមរថយន្តស្លាប់នៅនឹង កន្លែង ហើយម៉ូតូត្រូវឆេះខ្ទេច។
http://kohsantepheapdaily.com.kh/art...19-203349.html