ព្រំដែនព្រះវិហារ ៖ ទាហានសៀមឈ្លានពាននៅតែគឃ្លើនប៉ុនប៉ងបញ្ឆេះសង្គ្រាមជាមួយ កម្ពុជាដដែលជាដដែល ដូចយ៉ាងនៅវេលាម៉ោងប្រមាណ៦និង៣០នាទីថ្ងៃទី១០ កុម្ភៈ ២០១១ ម្សិលមិញនេះទ័ពសៀមឈរជើងខ្សែត្រៀមជួរមុខបានបាញ់កាំភ្លើង ប្រភេទ A.K46 និង M79 ជាច្រើនគ្រាប់ទៅលើខ្សែត្រៀមរបស់កងទ័ពកម្ពុជា ត្រង់ចំណុចអូរចាក់ច្រែងទឹកដីកម្ពុជា បង្កឱ្យទ័ពកម្ពុជាមានការព្រួយបារម្ភបំរុងនឹងតបតវិញផងដែរ តែខណៈនោះកងទ័ពកម្ពុជាសុខចិត្តរក្សាភាពស្ងាត់ស្ងៀម មិនតបតវិញទេ ហើយបន្តិចនោះក៏ស្ងាត់ទៅវិញ ។
កាលពីវេលាម៉ោង៩ព្រឹកថ្ងៃទី១១ កុម្ភៈ ២០១១ នេះដែរ លោកវរសេនីយ៍ចាន់ សុឃុន ហៅការ៉េ២ មេបញ្ជាំការវរសេនាតូចលេខ៣៨២ នៃកងពលតូចអន្តរាគមន៍លេខ៨ ប្រចាំការតំបន់ភ្នំទ្រព្យបានឱ្យដឹងតាមទូរស័ព្ទថា នៅមុខខ្សែត្រៀមជួរមុខភ្នំទ្រព្យទ័ពសៀមជាប្រចាំតែងតែគប់ គ្រាប់បែករំខានទ័ពកម្ពុជាជាញឹកញាប់នាវេលាម៉ោង៦ទៅម៉ោង៧ យប់ជាសញ្ញាញុះញង់ឱ្យទ័ពកម្ពុជាតបត តែទោះជាយ៉ាងណា ទ័ពកម្ពុជាឈរជើងមុខភ្នំទ្រព្យមិនតបតទេ ល្គឹកណាទ័ពសៀមធ្វើព្យុះធ្វើភ្លៀងរហូតដល់ដំណាក់កាលចុងក្រោយ ទើបទ័ពកម្ពុជាតបតទៅវិញ ។
តាមប្រភពព័ត៌មានពីមន្ត្រីយោធាប្រចាំលើ ប្រាសាទព្រះវិហារបានឱ្យដឹងអំពីស្ថានការណ៍យោធានៅលើតំបន់ ប្រាសាទព្រះវិហារនាវេលា ព្រឹកម៉ោង១១ ថ្ងៃទី១១ កុម្ភៈ នេះថា តំបន់ប្រា សាទព្រះវិហារមិនមានអ្វីកើតឡើងទេ គឺមានសភាពស្ងាត់ស្ងៀម ប៉ុន្តែទោះជាយ៉ាងណាកងទ័ពកម្ពុជាឈរជើងនៅតំបន់នោះ នៅតែប្រុងជើងការណ៍ជានិច្ច ដើម្បីប្រយុទ្ធប្រឆាំងទាហានសៀមឈ្លានពានការពារទឹកដីមាតុភូមិ អង្គរ ៕
http://kohsantepheapdaily.com.kh/art...11-002222.html