រាជធានីភ្នំពេញ ៖ មេតុងទីនល្បីឈ្មោះម្នាក់នៅផ្សារឯករាជ្យII ភូមិព្រៃព្រីងខាងជើង សង្កាត់ចោមចៅ ខណ្ឌដង្កោ បានប្រមូលប្រាក់ពីកូនតុងទីនដែលភាគច្រើនជាអាជីវករប្រមាណជិត ១០០នាក់បានរាប់សិបម៉ឺនដុល្លារ ហើយវេចបង្វេចរត់គេចខ្លួនបាត់ដោយសុវត្ថិភាព និងចាក់សោផ្ទះទុកចោល។ ទន្ទឹមនឹងការរត់គេចខ្លួននេះ កូនតុងទីនប្រមាណជិត១០០នាក់បាននាំគ្នាភ្ញាក់ផ្អើល ហើយខ្លះនាំគ្នាទៅដាក់ពាក្យបណ្តឹងនៅសមត្ថកិច្ចមូលដ្ឋាន។
មេតុងទីនដែលប្រើល្បិចឆបោកនេះត្រូវអាជីវករ ឱ្យដឹងថា ឈ្មោះលី គីមហួយ ភេទស្រីអាយុ៥៤ឆ្នាំ និងប្តីឈ្មោះសុខណា មានទីលំនៅផ្ទះលេខ១D ផ្សារឯករាជ្យទីII ។ ២នាក់ប្តីប្រពន្ធនេះបាននាំគ្នារត់គេចខ្លួនតាំងពីយប់ថ្ងៃទី ៣១ ខែមករា ឆ្នាំ២០១១ ដោយចាក់សោផ្ទះទុកចោល។ តាមអាជីវករផ្សារឯករាជ្យទីII បានឱ្យដឹងថា មេតុងទីនឈ្មោះលី គីមហួយ បានលេងតុងទីននៅផ្សារឯករាជ្យIIជាច្រើនឆ្នាំមកហើយ ដែលមុនដំបូងធ្វើឱ្យគេទុកចិត្ត ហើយមានអាជីវករនៅ ក្នុងផ្សារ រួមទាំងអ្នកភូមិផងនាំគ្នាលេងប្រមាណជិត១០០នាក់ ដែលមានក្បាល៤០០ដុល្លារ, ១០០ដុល្លារ, ៥០ដុល្លារ, ៤០ដុល្លារ, ៣០ដុល្លារ, ២០ដុល្លារ និង៥មឺុនរៀល ដែលក្បាលខ្លះដេញ៥ថ្ងៃម្តង១អាទិត្យម្តង កន្លះខែម្តង និង១ខែម្តង។
អាជីវករបន្តទៀតថា ការលេងតុងទីននេះទៀតកូនៗមិនស្គាល់គ្នាទេ ស្រាប់តែនៅយប់ថ្ងៃទី៣១ ខែមករា ឆ្នាំ២០១១ មេតុងទីនរូបនោះ រួមទាំងប្តីបានវេចបង្វេចរត់គេចខ្លួនបាត់ដោយចាក់សោផ្ទះទុកចោល ធ្វើឱ្យកូនតុងទីនរកមេមិនឃើញដូចសព្វដងទើបមានការភ្ញាក់ ផ្អើល ។ តាមព័ត៌មានឱ្យដឹងទៀតថា ទឹកប្រាក់ដែលមេតុងទីនប្រមូលយកទៅនោះគឺប្រមាណជិត១លានដុល្លារ។ ការរត់គេចខ្លួននេះ គឺដោយសារមេតុងទីនរូបនេះលង់នឹងល្បែងស៊ីសងដែលគេតែងតែឃើញ ទៅលេងល្បែងនៅកាស៊ីណូណាហ្គា ៕
http://kohsantepheapdaily.com.kh/art...211-01262.html