ខេត្តសៀមរាប ៖ វីរយុទ្ធជនដ៏អង់អាចដែលរងរបួសក្នុងពេលប៉ះប្រយុទ្ធគ្នាជាមួយ សៀមឈ្លានពាននៅសមរភូមិព្រះវិហារកាលពីពេលកន្លងទៅថ្មីៗនេះ ហើយកំពុងសំរាកព្យាបាលនៅមន្ទីរពេទ្យយោធភូមិភាគ៤ និងមន្ទីរពេទ្យខេត្ដសៀមរាប ត្រូវបានមន្ដ្រីអាជា្ញធរអប្សរា ចុះសួរសុខទុក្ខនិងផ្ដល់ថវិកាក្នុងម្នាក់ៗចំនួន១៩ម៉ឺនរៀល លោករដ្ឋលេខាធិការផៃ ស៊ីផាន អ្នកនាំពាក្យទីស្ដីការគណៈរដ្ឋមន្ដ្រីក៏បានឧបត្ថម្ភចំនួន៨ម៉ឺន រៀលក្នុងយុទ្ធជនម្នាក់ៗផងដែរ។ ការចុះសួរសុខទុក្ខនិងផ្ដល់ថវិកាដល់វីរយុទ្ធជនរងរបួសនេះ បានធ្វើឡើងកាលពីព្រឹកថ្ងៃទី៧ ខែកុម្ភៈ ដឹកនាំដោយលោកស្រីម៉ៅ ល្អ ប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជា្ញធរអប្សរា និងរួមដំណើរដោយមន្ត្រីជាច្រើនរូបទៀត ។
នៅក្នុងឱកាសចុះសួរសុខទុក្ខនោះលោកស្រីម៉ៅ ល្អ បានមានប្រសាសន៍ថា ទឹកប្រាក់ដែលនាំមកផ្ដល់ជូនយុទ្ធជនរបួសនាពេលនេះមានចំនួនតិច តួចក៏ពិតមែន ប៉ុន្ដែបានបង្កប់នូវអត្ថន័យស្រឡាញ់យ៉ាងជ្រាលជ្រៅបំផុតពីយើង ទាំងអស់គ្នានៅសមរភូមិក្រោយ ចំពោះវីរភាពដ៏អង់អាចរបស់យុទ្ធជនយើងក្នុងភារកិច្ចការពារបូរណភាព ទឹកដីពីការរំលោភឈ្លានពានរបស់សត្រូវសៀម ។
នៅក្នុងដំណើរចុះសួរសុខទុក្ខនោះ វីរយុទ្ធជនម្នាក់ៗត្រូវបានឧបត្ថម្ភថវិកាចំនួន១៩ម៉ឺនរៀល ដោយក្នុងនោះលោកស្រីម៉ៅ ល្អ បានឧបត្ថម្ភចំនួន៦០ម៉ឺនរៀល លោករដ្ឋលេខាធិការផៃ ស៊ីផាន ឧបត្ថម្ភចំនួន៩៦ម៉ឺនរៀល លោកលឹម ស្រ៊ូ ចំនួន២៤ម៉ឺនរៀល បុគ្គលិកនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជា្ញធរអប្សរារួមគ្នាឧបត្ថម្ភចំនួន២៤ម៉ឺន រៀល និងបុគ្គលិកអគ្គិសនីអាជ្ញាធរអប្សរា ២៤ម៉ឺនរៀល ។
សូមបញ្ជាក់ថា ក្រៅពីថវិកាឧបត្ថម្ភតាមរយៈលោកស្រីម៉ៅ ល្អ នាពេលនេះ កាលពីថ្ងៃទី៥ កុម្ភៈ ក្នុងដំណើរបេសកកម្មចុះទៅស្រង់ទិន្នន័យខូចខាតប្រាសាទព្រះវិហារដែលរង ការបាញ់គ្រាប់កាំភ្លើងធុនធំដោយយោធាសៀមក្នុងអំឡុងពេលប៉ះទង្គិច គ្នាកាលពីរសៀលថ្ងៃទី៤ ខែកុម្ភៈកន្លងទៅ លោករដ្ឋលេខាធិការផៃ ស៊ីផាន ក៏បាននាំយកអំណោយជាគ្រឿងឧបភោគ-បរិភោគមួយចំនួនផងដែរ ទៅជូនដល់កងយោធពលខេមរភូមិន្ទឈរជើងនៅខ្សែត្រៀមជួរមុខសមរភូមិព្រះ វិហារ ដែលកំពុងត្រៀមលក្ខណៈចាំទប់ទល់ពីការរំលោភឈ្លានពានបូរភាពទឹកដីពី សំណាក់សត្រូវសៀម។
លោក សេង ផៃ មន្ត្រីប៉ូលិសបេតិកភណ្ឌការពារលើប្រាសាទព្រះវិហារ ដែលស្ថិតនៅក្នុងចំណោមកងកំលាំងរងរបួសដោយសារតែគ្រាប់កាំភ្លើងចោរ ឈ្លានពានសៀមកាលពីថ្ងៃទី៤ ខែកុម្ភៈកន្លងទៅ ហើយបច្ចុប្បន្នកំពុងសំរាកព្យាបាលក្នុងមន្ទីរពេទ្យយោធភូមិភាគ៤ បានសម្ដែងនូវអំណរគុណយ៉ាងក្រៃលែងចំពោះការ ឧបត្ថម្ភនូវថវិកាផ្ទាល់ខ្លួនរបស់លោកផៃ ស៊ីផាន រួមទាំងមន្ដ្រីអាជា្ញអប្សរា ក៏ដូចជនរួមជាតិទាំងអស់។ លោកចាត់ទុកថា នេះជាកាយវិការបង្ហាញពីទឹកចិត្ដស្នេហាជាតិខ្ពស់មួយនៅគ្រាដែល យើងទាំងអស់គ្នាជួបការរំលោភឈ្លានពានពីសៀម។
យុទ្ធជនពីរនាក់ទៀតដែលសុទ្ធតែរងរបួសដាច់ដៃ ម្ខាង និងកំពុងត្រូវបានយកចិត្ដទុកដាក់ព្យាបាលពីក្រុមគ្រូពេទ្យនៃ មន្ទីរពេទ្យខេត្ដសៀមរាបហើយបានទទួលប្រាក់ឧបត្ថម្ភនាពេលនោះដែរ បានរៀបរាប់បញ្ជាក់ពីជំហរស្នេហាជាតិរបស់ខ្លួនថា ពួកខ្ញុំពិតជាសោកស្ដាយខ្លាំងណាស់ចំពោះការបាត់បង់ដៃជាទីស្រឡាញ់ នេះ ប៉ុន្ដែអ្វីដែលសំខាន់បំផុតសំរាប់យើងទាំងអស់គ្នាគឺជាតិ ដូច្នេះយើងខ្ញុំមិនតូចចិត្ដទេក្នុងការលះបង់ដើម្បីការពារជាតិ ៕
http://kohsantepheapdaily.com.kh/art...209-01008.html