សៀមរាប ៖ ហេតុការណ៍គ្រោះចរាចរមួយបានធ្វើអោយមានការភ្ញាក់ផ្អើលដល់ ប្រជាពលរដ្ឋដែលរស់នៅក្នុងភូមិដោយសារតែមានម៉ូតូមួយគ្រឿង បើកជ្រុលចង្កូតផ្លោងទៅទើរនឹងរបងផ្ទះអ្នកភូមិ បណ្តាលអោយមនុស្សសន្លប់ និងរបួសគរជើងគ្នា។
ហេតុការណ៍នេះបានកើតឡើងនៅលើកំណាត់ផ្លូវ ដែលលាតសន្ធឹងពីថ្នល់ចែក ទៅឃុំកំពង់ឃ្លាំង នៅត្រង់ចំណុចភូមិថ្នល់ចែក ឃុំគៀនសង្កែ ស្រុកសូទ្រនិគម ខេត្តសៀមរាប កាលពីវេលាម៉ោង ៣.៣០ នាទីរសៀល ថ្ងៃទី៧ ខែកុម្ភៈ ឆ្នាំ២០១១ បណ្តាលឲ្យមានមនុស្សសន្លប់ធំចំនួន៣នាក់នៅនឹងកន្លែងកើតហេតុ ។
ជនរងគ្រោះត្រូវបានគេស្គាល់ឈ្មោះ វណ្ណៈភេទប្រុស និងពីរនាក់ទៀតពុំស្គាល់អត្តសញ្ញាណ ក្នុងនោះមានស្រីពីរនាក់ ត្រូវបានសន្លប់ទាំងអស់គ្នា។ បើតាមប្រភពព័ត៌មានមុនពេលកើតហេតុបានអោយកម្ពុជាថ្មីដឹងថា ជនរងគ្រោះទាំងបីនាក់ធ្វើការនៅក្នុងទីរួមខេត្តសៀមរាប ហើយថ្ងៃកើតហេតុអ្នកទាំងបីបើកបរម៉ូតូមកពីពិធីមង្គលការ មួយកន្លែងនៅក្នុងឃុំកំពង់ឃ្លាំង ដោយបានពិសាជាតិសុរាដល់កំណត់ ក៏នាំគ្នាត្រឡប់មកខេត្តសៀមរាបវិញ។ ដោយម៉ូតូបើកក្នុងល្បឿនលឿនគោលបំណងបង្ហោះម៉ូតូអោយដល់មុនម៉ោង ចូលធ្វើការ ក៏ជ្រុលទៅបុករបងផ្ទះអ្នកស្រុកម្នាក់ឈ្មោះ ម៉ាប់ ម៉េង យ៉ាងពេញទំហឹងបណ្តាលអោយម្នាក់បាក់ជើងនិងសន្លប់ទាំងបីនាក់ ដោយដង្ហើមចង្រិតគ្រប់ៗគ្នា។
ក្រោយពេលកើតហេតុ ជនរងគ្រោះទាំងបីនាក់ត្រូវបានសមត្ថកិច្ចប៉ូលិសប៉ុស្តិ៍គៀនសង្កែ ជួយធ្វើអន្តរាគមន៍ និងជួយការពារទ្រព្យសម្បត្តិរបស់ជនរងគ្រោះ និងបានរៀបចំដឹកបញ្ជូនជនរងគ្រោះ ទៅកាន់មន្ទីរពេទ្យ ស្រុកសូទ្រនិគម ដើម្បីជួយសង្គ្រោះបន្ទាន់៕
http://www.kampucheathmey.com/local-...-10-54-04.html