រាជធានីភ្នំពេញ ៖ អគ្គីភ័យបានឆាបឆេះយ៉ាងសន្ធោសន្ធៅទៅលើផ្ទះប្រជាពលរដ្ឋលក់គ្រឿង ទេសមួយខ្នង ធ្វើអំពីឈើ បណ្តាលឱ្យមានការភ័យតក់ស្លុត និងសម្រែករញៀវ ប្រកាសឱ្យជួយផងៗ ច្របូកច្របល់នឹងការជញ្ជូនអីវ៉ាន់យ៉ាងប្រញាប់ប្រញាល់កាលពីវេលាម៉ោង ៧និង២០នាទីព្រឹកថ្ងៃទី៩ កុម្ភៈ ២០១១ ស្ថិតក្នុងក្រុម១ តាមបណ្តោយផ្លូវ២០០៤ (ណតប្រ៊ីដ) ទល់មុខសាលាដុនបូស្កូ ភូមិស្លែងរលីង សង្កាត់ទឹកថ្លា ខណ្ឌសែនសុខ ។
ស្ត្រីម្ចាស់ផ្ទះឈ្មោះហេង គឹមសឿន អាយុ៤៨ឆ្នាំ ជាអ្នកលក់គ្រឿងទេសក្នុងផ្ទះនេះតែម្តង បានឱ្យដឹងថា មូលហេតុនៃការឆាបឆេះគឺបណ្តាលមកពីទុស្សេខ្សែភ្លើង ព្រោះមុនពេលកើតហេតុនេះ អ្នកស្រីបានដាក់ដាំបាយឆ្នាំខ្សែភ្លើង (ឆ្នាំងអគ្គិសនី) ដោតឌុយចោល និងចាក់សោផ្ទះចេញទៅក្រៅមួយភ្លែត ស្រាប់តែគេទូរស័ព្ទប្រាប់ថា ភ្លើងឆេះផ្ទះហើយ ធ្វើឱ្យគាត់ស្លុតប្រមាពន់ពេកប្រមាណ។
អ្នកស្រីហេង គឹមសឿន បានឱ្យដឹងថា រូបគាត់ ព្រមទាំងអ្នកជិតខាងមិនបានយកអីវ៉ាន់ធំដុំណាមួយចេញទាន់ទេ ព្រោះអណ្តាតភ្លើងបានវាយលុយពេញទំហឹងទៅហើយ យកបានតែសំបុកសម្បត្តិអាជ័យតែប៉ុណ្ណោះ (អីវ៉ាន់កំប៉ិកកំប៉ុក) ។ អគ្គីភ័យនេះមិនបណ្តាលឱ្យរាលដាលដល់ផ្ទះអ្នកជិតខាងតទៅទៀតទេ ហើយការបង្កឱ្យមនុស្សរបួស និងស្លាប់ក៏ទេដែរ... ដោយគ្រាន់តែរោលផ្សែងខ្មៅទៅលើផ្ទះជាប់ៗនោះតិចៗប៉ុណ្ណោះ និងឆេះខ្សែភ្លើងតាមផ្លូវខូចខាតច្រើន ។
ភ្លាមៗនោះ រថយន្តពន្លត់អគ្គីភ័យបានចេញទៅធ្វើអន្តរាគមន៍បាញ់ទឹកពន្លត់ យ៉ាងសកម្ម ទើបភ្លើងមិនអាចមានឥទ្ធិពលឆេះរាលដាលតទៅទៀត ហើយបានរលត់ជាស្ថាពររយៈពេលប្រមាណ១ម៉ោង ក្រោមអំណាចការបាញ់ទឹករបស់សមត្ថកិច្ចរថយន្តពន្លត់អគ្គីភ័យ ប្រើប្រាស់ចំនួន៤គ្រឿង និងរថយន្តត្រៀមនៅទីនោះ៤គ្រឿងទៀត ៕
http://kohsantepheapdaily.com.kh/art...08-184413.html