ព្រំដែន ប្រាសាទព្រះវិហារ ៖ ព្រះសង្ឃ៧អង្គ និងកូនសេក្ខលោកច្រើននាក់ទៀតនៅតែតស៊ូក្រាញននៀលគង់នៅក្នុងវត្ត កែវសិក្ខាគិរីស្វារៈរបស់កម្ពុជា មុខប្រាសាទព្រះវិហារដដែល បើទោះណាកំពុងរងការបាក់បែកស្ទើរខ្ទេចខ្ទីដោយសារគ្រាប់កាំ ភ្លើងធុនធ្ងន់របស់ទាហានសៀមឈ្លានពានវាយប្រហារផ្ទួនៗរយៈពេល ៤ថ្ងៃ និងប្រើអាវុធគីមីផ្សែងធ្វើឱ្យប៉ះពាល់ដល់សុខភាពក៏ដោយ ។
នៅព្រឹក ថ្ងៃទី៨ កុម្ភៈ ២០១១ ក្រុមមន្ត្រីអាជ្ញាធរ និងយោធាកម្ពុជាច្រើននាក់បានចូលទៅពិនិត្យមើលស្ថានភាពខូចខាត នៅក្នុងទីវត្ត ដើម្បីសំរួលដល់ព្រះសង្ឃគង់នៅបន្តទៀត និងរៀបចំកន្លែងខូចខាតបាក់បែកខ្លះឱ្យបានស្រួលបួលផងដែរ ប៉ុន្តែត្រង់ថា ជួសជុលឱ្យល្អឡើងវិញនោះ គឺមិនទាន់អាចធ្វើបានទេ ស្ថិតក្នុងកាលៈទេសៈបែបនេះ ទាល់តែរង់ចាំការបញ្ចប់ជំលោះដោះស្រាយគ្នារវាងភាគីសៀម និងកម្ពុជាឱ្យត្រឹមត្រូវសិន ។
គួររំលឹកថា ស្ថានការណ៍ផ្ទុះអាវុធនៅតាមខ្សែបន្ទាត់ព្រំដែនខេត្តព្រះវិហារ ត្រូវបានស្ងប់ស្ងាត់ហើយកាលពីវេលាម៉ោង១១ព្រឹកម្សិលមិញរហូតមកដល់ ព្រឹកថ្ងៃទី៨ កុម្ភៈ ២០១១នេះ ដោយចាប់តាំងពីមេបញ្ជាវរៈ មេបញ្ជាការភូមិភាគ និងមេបញ្ជាការជាន់ខ្ពស់រវាងភាគីកម្ពុជា-សៀមបានព្រមព្រៀង គ្នាបញ្ឈប់ការបាញ់ផ្តក់ទៅវិញទៅមក រក្សាទីតាំងឱ្យនឹងន៎ ហាមចល័តទ័ពពីតំបន់មួយទៅតំបន់មួយ ចៀសវាងការមន្ទិលសង្ស័យនាំឱ្យមានការវាយប្រយុទ្ធគ្នាតទៅទៀត ។
សូមបញ្ជាក់ ថា ការបាញ់ផ្តក់ទៅវិញទៅមករវាងទាហានកម្ពុជា-សៀម បានចាប់ផ្តើមបញ្ឆេះឡើង កាលពីវេលាម៉ោង៣និង៣០នាទីនាទីរសៀលថ្ងៃទី៤ កុម្ភៈ ហើយបន្តរហូតដល់វេលាម៉ោង៨និង៣០នាទីព្រឹក ថ្ងៃទី៧ កុម្ភៈ ២០១១ គឺរយៈពេល៤ថ្ងៃជាប់ៗគ្នាបង្កឱ្យទាហានសៀមស្លាប់រាប់សិបនាក់ រងរបួសច្រើនរយនាក់ និងឆេះលេណដ្ឋានយោធាជាច្រើនកន្លែង ព្រមទាំងរថក្រោះ រថយន្ត-គ្រឿងចក្រជាច្រើនគ្រឿងទៀត ។ ចំណែកទាហានកម្ពុជាស្លាប់និងរងរបួសតិចតួច ហើយខូចលេណដ្ឋានយោធាក៏តិចតួចដែរ ។ ការប្រយុទ្ធគ្នានេះដែរ គឺភាគីសៀមធ្វើការតាំងចិត្តខ្ពស់ថា នឹងវាយកាន់កាប់តំបន់ជុំវិញប្រាសាទព្រះវិហារឱ្យខាងតែបាន ប៉ុន្តែទីបំផុតមិនដូចការតាំងចិត្តទេ ទាហានសៀមបែរជាបាក់ស្បាតរត់ចោលសមរភូមិទៅវិញ និងចោលសាកសព-អ្នករបួសពាសវាលពាសកាលទៀតផង ៕
http://kohsantepheapdaily.com.kh/art...07-233333.html