បន្ទាប់ ពីប្រគល់-ទទួលឈ្លើយសឹកសៀមម្នាក់ជូនដល់សេនានុព័ន្ធប្រចាំ ស្ថានទូតថៃ ដែលរៀបចំឡើងនៅក្រសួងការពារជាតិកាលពីព្រឹកមិញនេះរួចមក ឈ្លើយសឹកសៀមម្នាក់នេះត្រូវបានគេដឹងថា នឹងធ្វើដំណើរតាមរថយន្តស្ថានទូតថៃទៅកាន់ច្រកទ្វារអន្តរជាតិ ប៉ោយប៉ែត រួចហើយធ្វើពិធីប្រគល់-ទទួលនៅទីនោះម្តងទៀត លើស្ពានមិត្តភាពកម្ពុជា-ថៃនាវេលាម៉ោងប្រមាណ៤ទៅម៉ោង៥ល្ងាច ថ្ងៃទី៨ កុម្ភៈ ២០១១ ជាសក្ខីភាពនៃការឆ្លងកាត់ទឹកដី។
សូមបញ្ជាក់ ថា មុននេះ នៅក្រសួងការពារជាតិ មានរៀបចំពិធីជួបជុំសេនានុព័ន្ធរបស់ស្ថានទូតគ្រប់ទាំងអស់ ប្រចាំនៅកម្ពុជា និងពិធីប្រគល់ឈ្លើយសឹកសៀមម្នាក់ផង ដែលចាប់បាននៅលើសមរភូមិប្រយុទ្ធគ្នាតាមខ្សែបន្ទាត់ព្រំដែន ខេត្តព្រះវិហារកន្លងមក ។
ពិធីនេះបានចាប់ផ្តើមឡើងកាលពីវេលាម៉ោង ៨ព្រឹកថ្ងៃទី៨ កុម្ភៈ ២០១១ នៅក្រសួងការពារជាតិកម្ពុជាតែម្តង ក្រោមអធិបតីភាពលោកនឹម សុវត្ថិ អគ្គនាយកនៃអគ្គនាយកដ្ឋានទំនាក់ទំនងអន្តរជាតិរបស់ក្រសួង ការពារជាតិ និងមានការអញ្ជើញចូលរួមពីមន្ត្រីសេនានុព័ន្ធរបស់ស្ថានទូត ជាច្រើនប្រចាំនៅកម្ពុជា ដើម្បីស្តាប់សភាពការណ៍ជុំវិញការផ្ទុះអាវុធនៅតាមខ្សែ បន្ទាត់ព្រំដែនខេត្តព្រះវិហារ និងធ្វើជាសាក្សីចំពោះកម្ពុជាចាប់បានឈ្លើយសឹកសៀម និងប្រគល់ឈ្លើយសឹកនេះទៅឱ្យសេនានុព័ន្ធយោធាសៀមវិញ ៕
http://kohsantepheapdaily.com.kh/art...07-234635.html