ព្រំដែនភាគពាយ័ព្យ ៖ បើទោះណាការវាយប្រយុទ្ធគ្នាដ៏កក្រើកស្វិតស្វាញនៅតាមខ្សែ បន្ទាត់ព្រំដែនខេត្តព្រះវិហារយ៉ាងណាក៏ដោយ ក៏កិច្ចដំណើរការចេញ-ចូលរបស់ភ្ញៀវទេសចរ ការដឹកជញ្ជូនទំនិញ តាមច្រកទ្វារអន្តរជាតិប៉ោយប៉ែត នៅតែប្រព្រឹត្តទៅធម្មតា ខណៈស្ថានទូតថៃប្រចាំរាជធានីភ្នំពេញឯណោះវិញ ត្រូវបានឯកអគ្គរាជទូតរបស់គេកោះហៅអាជីវករ ពាណិជ្ជករ វិនិយោគិន ដែលកំពុងរកស៊ីក្នុងប្រទេសកម្ពុជាទាំងអស់ជួបប្រជុំពិភាក្សាគ្នា នៅវេលាម៉ោង៣រសៀលថ្ងៃទី៧ កុម្ភៈ ២០១១ នេះ។
គេមិនទាន់ដឹងថា ការជួបប្រជុំក្រុមពាណិជ្ជកររបស់ថៃនេះនឹងលើកឡើងអំពីបញ្ហា អ្វីខ្លះនោះទេ...ប៉ុន្តែក្រុមអ្នកតាមដានព្រឹត្តិការណ៍ ក្តៅគគុករវាងកម្ពុជា-សៀមបានសន្និដ្ឋានថា គ្មានអ្វីក្រៅពីលោកឯកអគ្គរាជទូតថៃ លើកឡើងពីការបំពាក់បំប៉នស្មារតីដល់ក្រុមអ្នកជំនួញថៃ ឱ្យមានការប្រុងប្រយ័ត្នចំពោះស្ថានការណ៍បច្ចុប្បន្ននោះទេ... អាចថា ផ្អាកចរាចរទំនិញសេវាកម្មជួញដូររយៈពេលខ្លី ឬយ៉ាងណានោះក៏ស្ថិតនៅក្នុងវេលារសៀលនេះដែរ ។ ខុសគ្នាពីច្រកទ្វារអន្តរជាតិប៉ោយប៉ែតដែលកំពុងដំណើរការចេញចូល ធម្មតានោះ ច្រកទ្វារអន្តរជាតិអូរស្មាច់ និងអន្តរជាតិជាំ ត្រូវបានបិទដំណើរការចេញ-ចូលបណ្តោះអាសន្ន បន្ទាប់ពីកើតការវាយប្រយុទ្ធ គ្នាខ្លាំងក្លានៅតាមខ្សែបន្ទាត់ព្រំដែនខេត្តព្រះវិហារ តាំងពីក្បាលព្រលប់ថ្ងៃទី៦ កុម្ភៈ នឹងបន្តមកដល់ព្រឹកថ្ងៃទី៧ កុម្ភៈ ២០១១ នេះ ។
សូមបញ្ជាក់ថា ច្រកទ្វារអន្តរជាតិអូរស្មាច់ ស្ថិតក្នុងសង្កាត់អូរស្មាច់ ក្រុងសំរោង ខេត្តឧត្តរមានជ័យ ទល់មុខស្រុកកាប់ជើង ខេត្តសុរិន្ទ ប្រទេសថៃ ចំណែកច្រកអន្តរជាតិជាំ ស្ថិតក្នុងឃុំត្រពាំងប្រីយ៍ ស្រុកអន្លង់វែង ទល់មុខស្រុកភូស៊ីង ខេត្តស៊ីសាកេត ប្រទេសថៃ ៕
http://kohsantepheapdaily.com.kh/art...07-011852.html