រាជធានីភ្នំពេញ ៖ បុរសម្នាក់ជាបុគ្គលិកក្រុមហ៊ុនប្រេងឥន្ធនៈសាវីម៉ិច ត្រូវក្រុមចោរប្រដាប់អាវុធបាញ់គំរាម និងវាយបំបែកកញ្ចក់ចំហៀងរថយន្តរបស់លោកប្លន់យកលុយ៦ម៉ឺនដុល្លារ កាលពីវេលាម៉ោង៩និង១០នាទីព្រឹកថ្ងៃទី៧ កុម្ភៈ ២០១១ ខណៈពេលជនរងគ្រោះបើករថយន្តមកដល់មុខក្រុមប្រឹក្សាអភិវឌ្ឍន៏កម្ពុជា (CDC) វិថីព្រះស៊ីសុវត្ថិ ស្ថិតក្នុងសង្កាត់វត្តភ្នំ ខណ្ឌដូនពេញ ។
ស្ត្រីម្នាក់ដែលឃើញហេតុការណ៍នេះបាននិយាយថា មុនពេលកើតហេតុ គេឃើញរថយន្តមួយគ្រឿងម៉ាកវីហ្គោ ពណ៌ទឹកប្រាក់ ពាក់ស្លាកលេខ ភ្នំពេញ 2K-1688 បើកបរតាមបណ្តោយវិថីព្រះស៊ីសុវត្ថិ ឆ្ពោះទៅទិសខាងត្បូង លុះដល់ចំណុចមុខក្រុមប្រឹក្សាអភិវឌ្ឍន៏កម្ពុជា (CDC) ស្ថិតក្នុងសង្កាត់វត្តភ្នំ ខណ្ឌដូនពេញ ស្រាប់តែមានយុវជនស្ទាវពីរនាក់បើកម៉ូតូម៉ាកសេ១២៥ ស៊េរី២០១០ ពណ៌ខ្មៅ មិនចាំស្លាកលេខ ចូលកៀររថយន្តឱ្យឈប់ ។
ខណៈពេលរថយន្តវីហ្គោឈប់ង៉ក់ យុវជនម្នាក់គ្មានពាក់មួកការពារសុវត្ថិភាព ហើយគ្មានពាក់ម៉ាស់ បានលោតចុះពីលើម៉ូតូ ដកកាំភ្លើងខ្លីភ្ជង់គំរាមឱ្យភាគីរថយន្តប្រគល់ស្បោងប្រាក់ទៅ ឱ្យពួកវា ។ ពេលនោះទំនងម្ចាស់រថយន្តមានការភិតភ័យ ក៏ត្រូវជនដៃដល់យកកាំភ្លើងខ្លីវាយបំបែកកញ្ចក់ចំហៀងខាងឆ្វេង និងស្រែកគំរាមខ្លាំងៗ ព្រមទាំងបាញ់ឡើងលើមួយគ្រាប់ទៀតផង ។ ឃើញដូច្នេះម្ចាស់រថយន្តបានលូកយកស្បោងខ្មៅដាក់ប្រាក់ដុល្លារ នោះហុចទៅឱ្យជនដៃដល់ជាថ្នូរនឹងការរួចផុតពីសេចក្តីស្លាប់ ។ ភ្លាមៗនោះក្រុមចោរបានបើកត្រឡប់ទៅទិសខាងលិចគេចខ្លួនបាត់ស្រមោល ៕
http://kohsantepheapdaily.com.kh/art...07-002328.html