រាជធានីភ្នំពេញ ៖ តាមប្រភពព័ត៌មានពីមន្ត្រីកងរាជអាវុធហត្ថលើផ្ទៃប្រទេសបានឱ្យ ដឹងថា អាជ្ញាធររាជធានីភ្នំពេញ សហការជាមួយទីបញ្ជាការកងរាជអាវុធហត្ថលើផ្ទៃប្រទេសត្រៀមបញ្ជូន កំលាំងកងរាជអាវុធហត្ថជាកងកុម្មង់ដូពិសេសជាង១.០០០នាក់បន្ថែម ទៀតទៅកាន់សមរភូមិមុខនៃព្រំដែនខេត្តព្រះវិហារ និងដាក់ពង្រាយតាមខ្សែបន្ទាត់ព្រំដែនផ្សេងៗទៀត ការពារទប់ទល់ការឈ្លានពានរបស់ទាហានសៀម បើមិនរសៀលថ្ងៃនេះ គឺព្រឹកថ្ងៃទី៨ កុម្ភៈ ២០១១ ។
តាមមន្ត្រីកងរាជអាវុធហត្ថ ដដែលឱ្យដឹងទៀតថា កំលាំងកងរាជអាវុធហត្ថនៅតាមបណ្តាខណ្ឌទាំង៨ ត្រូវបញ្ចេញក្នុងមួយខណ្ឌៗចំនួន១៥នាក់ ហើយកំលាំងរបស់បញ្ជាការដ្ឋានរាជធានី ភ្នំពេញ ត្រូវបញ្ចេញប្រមាណ២០០នាក់ ដោយឡែកទីបញ្ជាការដ្ឋានលើផ្ទៃប្រទេសត្រូវបញ្ចេញកំលាំងប្រមាណ ១.០០០នាក់ទៀត សរុបទៅជាង១.៣០០នាក់ នឹងធ្វើដំណើរទៅកាន់សមរភូមិមុខតាមការគ្រោងទុក ។ សូមបញ្ជាក់ថា កំលាំងកងរាជអាវុធហត្ថទាំងនេះ គឺជាកងកម្មង់ដូពិសេសបញ្ចប់ការហ្វឹកហ្វឺនច្រើនឆ្នាំ ផ្នែកសឹកសង្គ្រាម មានបទពិសោធន៍ និងជំនាញខាងវាយលុកឆ្មក់វាយប្រហារជំរំខ្មាំង និងខ្លាំងក្លាខាងវាយដណ្តើមកាន់កាប់ទីតាំងរបស់ខ្មាំងសត្រូវ ឥឡូវដល់ពេលដែលពួកគេចេញប្រតិបត្តិការហើយ ។
គួររំលឹកថា ការវាយប្រយុទ្ធអូសបន្លាយជាង១ម៉ោង គេឮស្នូរអាវុធបានផ្ទុះស្ទើរតែគ្រប់កន្លែងនៅតាមខ្សែ បន្ទាត់ព្រំដែន ចាប់ពីស្លាបខាងឆ្វេងទៅដល់ស្លាបខាងស្តាំនៃប្រាសាទព្រះវិហារ ។ គួរបញ្ជាក់ថា ទាហានសៀមបានប្រើល្បិចបោកប្រាស់ទាហានកម្ពុជាផងដែរថា ដោយពួកគេទាក់ទងតាមវិទ្យុថា ស្នើឱ្យឈប់បាញ់...លុះដល់ទាហានកម្ពុជាផ្អាកបាញ់ ស្រាប់តែថៃគេផ្តក់កាំភ្លើងធុនធ្ងន់ចូលមកសំដៅជំរំយោធា កម្ពុជា ប៉ុន្តែមិនចំគោលដៅទេ...គឺថៃគេបាញ់កំញើញ និងការពារដើម្បីឆ្លៀតឱកាសចូលមកយកសព និងអ្នករបួសរបស់គេ ដែលកំពុងរដូករណែលលើសមរភូមិ ។
ឃើញថា ចាប់តាំងពីវេលាម៉ោងជាង៩ព្រឹកថ្ងៃទី៧ កុម្ភៈ ២០១១ ការវាយប្រយុទ្ធគ្នាកាន់តែស្វិតស្វាញឡើង ដោយទាហានសៀមបានទាញយករថក្រោះមកដាក់នៅចំណុចតាថាវ ដើម្បីគាំទ្រទាហានថ្មើរជើងរបស់គេ...លុះពេលកម្ពុជាសួរថា អ្នកឯងស្នើឱ្យឈប់បាញ់ ហេតុម៉េចក៏បញ្ចេញរថក្រោះ? ខាងសៀមគេថា បញ្ចេញឡានទេ មិនមែនរថក្រោះឡើយ។ មន្ត្រីយោធាកម្ពុជានិយាយថា បើទាហានសៀមក្រឡេចក្រឡុចបែបនេះ ការឈប់បាញ់ទំនងជាមិនងាយឈប់ងាយៗនោះទេ ។
សូមបញ្ជាក់ថា ការបាញ់ផ្តក់ទៅវិញទៅមករវាងទាហានកម្ពុជា-សៀម បានចាប់ផ្តើមបញ្ឆេះជាថ្មីទៀត កាលពីវេលាម៉ោង៨និង៣០នាទីព្រឹកថ្ងៃទី៧ កុម្ភៈ ២០១១ បន្ទាប់ពីភាគីសៀមធ្វើការតាំងចិត្តខ្ពស់ថា នឹងវាយកាន់កាប់តំបន់ជុំវិញប្រាសាទព្រះវិហារឱ្យខាងតែបាន នៅយប់មិញនេះ ។ ប៉ុន្តែទីបំផុតមិនដូចការតាំងចិត្តទេ ទាហានសៀមបែរជាបាក់ស្បាតរត់ចោលសមរភូមិទៅវិញ និងចោលសាកសព-អ្នករបួសពាសវាលពាសកាលទៀតផង ៕
http://kohsantepheapdaily.com.kh/art...206-23363.html