រាជធានីភ្នំពេញ ៖ រថយន្តឡិចស៊ីសមួយគ្រឿង ស៊េរី៤៧០ ពណ៌ស ពាក់ស្លាកលេខ ភ្នំពេញ 2M-1961 ត្រូវកំលាំងប៉េអឹម ខណ្ឌដូនពេញ តាមប្រមាញ់ និងឃាត់បាននៅចំណុចកែងមហាវិថីព្រះនរោត្ត និងផ្លូវលេខ១០៨ ស្ថិតក្នុងសង្កាត់វត្តភ្នំ ខណ្ឌដូនពេញ កាលពីវេលាម៉ោង៥និង៣០នាទីល្ងាចថ្ងៃទី៦ កុម្ភៈ ក្រោយពីមានការប្រដេញរថយន្តយ៉ាងអនាធិបតេយ្យបង្កឱ្យមានការ ភ្ញាក់ផ្អើល ហើយសង្ស័យថា មានការផ្ទុះអាវុធផងដែរ ។
តាមសាក្សីនិយាយថា មុនពេលកើតហេតុគេឃើញរថយន្តបួនគ្រឿងជាប្រភេទរថយន្តទំនើប ប្រដេញគ្នាតាមបណ្តោយផ្លូវលេខ៧២ ឆ្ពោះទៅទិសខាងលិច ក្នុងនោះមានរថយន្តម៉ាកកាមរីបាឡែន ឡិចស៊ីស ស៊េរី៥៧០ អេស្កាឡែត និងឡិចស៊ីសស៊េរី៤៧០ ។ ពេលកំពុងធ្វើសកម្មភាពនោះ គេឃើញភាគីរថយន្តអេស្កាឡែតដកកាំភ្លើងពីក្នុងរថយន្តកាន់ លើកឡើងលើ ហើយខាងរថយន្តឡិចស៊ីសស៊េរី៤៧០ ពណ៌ស ដេញតាមពីក្រោយទំនងជាមានទំនាស់ពាក្យសំដីក្នុងហាងផឹកស៊ី ណាមួយ ។ ស្របពេលនោះក៏មានសមត្ថកិច្ចទាក់ទងតាមវិទ្យុសុំឱ្យជួយ អន្តរាគមន៍ឃាត់រថយន្តអេស្កាឡែត និងរថយន្តឡិចស៊ីសស៊េរី៤៧០ ពណ៌ស ដែលបានដកកាំភ្លើងវាយកញ្ចក់ចំហៀងរថយន្តកាមរីបាឡែន ផ្នែកខាងស្តាំ រួចបើកគេចខ្លួន ។ ភ្លាមនោះកំលាំងប៉េអឹមខណ្ឌដូនពេញ តាមប្រមាញ់ ហើយឃាត់រថយន្តឡិចស៊ីស ពណ៌ស ស៊េរី៤៧០ ខាងលើនៅចំណុចកែងផ្លូវព្រះនរោត្តម និង១០៨ សង្កាត់វត្តភ្នំ ហើយបានឃាត់ខ្លួនស្ត្រីម្នាក់ និងបុរសម្នាក់មកស្នាក់ការប៉េអឹម ដើម្បីសាកសួរ ។
តាមប្រភពពីប៉េអឹមបានបញ្ជាក់ថា យោងតាមពាក្យបណ្តឹងម្ចាស់រថយន្តកាមរីបាឡែនឈ្មោះឡី សុភាព ភេទប្រុស អាយុ២៤ឆ្នាំ ស្នាក់នៅសង្កាត់ស្រះចក ខណ្ឌដូនពេញ បានឱ្យដឹងថា មុនពេលកើតហេតុ ជនរងគ្រោះបានបើករថយន្តមកឈប់នៅមុខផ្ទះលើកំណាត់ផ្លូវលេខ៩១ ស្រាប់តែមានរថយន្ត៣គ្រឿង បើកមកឈប់ក្រោយរថយន្តរបស់ខ្លួន ហើយម្នាក់ៗកាន់កាំភ្លើងក្នុងដៃ តែមិនបានបាញ់ទេ ។ ពេលនោះមានបុរសម្នាក់មកវាយកញ្ចក់រថយន្តខ្លួនផ្នែកចំហៀង ក្រោយខាងឆ្វេង បណ្តាលឱ្យបែករួចនាំគ្នាជិះរថយន្តគេចខ្លួនអស់ ។ ទោះជាយ៉ាងណា ភាគីម្ចាស់រថយន្តឡិចស៊ីស ស៊េរី៤៧០ ពណ៌ស ពាក់ស្លាកលេខ ភ្នំពេញ 2M-1961 មិនបានសារភាពថា ខ្លួនប្រព្រឹត្តខុសរឿងអ្វីនោះទេ ។
សាក្សីបញ្ជាក់ថា ម្ចាស់រថយន្តម៉ាកអេស្កាឡែត ដែលបំផ្លិចបំផ្លាញរថយន្តកាមរីបាឡែន នោះត្រូវបានគេស្គាល់លេខរថយន្តផងដែរ ។ បច្ចុប្បន្នរថយន្តសង្ស័យមួយគ្រឿងនិងរថយន្តរងគ្រោះ ត្រូវបានរក្សាទុកនៅស្នាក់ការប៉េអឹមខណ្ឌដូនពេញ ដើម្បីចាត់ការបន្តតាមនីតិវិធី ៕
http://kohsantepheapdaily.com.kh/art...06-202346.html