ខេត្តព្រះវិហារ ៖ នៅមិនទាន់មានសេចក្តីរាយការណ៍ពីចំនួនអ្នកស្លាប់នៅឡើយទេ ជុំវិញការបាញ់គ្នាដ៏កក្រើយនៅតាមខ្សែបន្ទាត់ព្រំដែនខេត្ត ព្រះវិហារ ខណៈទាហានសៀមបានបាក់ទ័ពរត់ចូលទៅក្នុងទឹកដីរបស់គេវិញ គឺរត់ហួសផ្ទះក្រហមសៀមខ្លួនឯងទៅទៀត ហើយផ្ទះក្រហមសៀមនេះក៏ត្រូវបានឆេះរួចហើយដោយសារតែ គ្រាប់កាំភ្លើងធុនធ្ងន់បាញ់ទៅបាញ់មកបង្កជាអណ្តាតភ្លើង សន្ធោសន្ធៅ ។
សូមបញ្ជាក់ថា ស្នូរកាំភ្លើងតូច-ធំបានផ្ទុះលាន់កក្រើកឡើងផ្ទួនៗគ្នា កាលពីវេលាម៉ោងប្រមាណ៣រសៀលថ្ងៃទី៤ កុម្ភៈ ២០១១ ការផ្ទុះអាវុធស្របច្បាប់របស់ទាហានកម្ពុជា ដើម្បីការពារទឹកដីត្រូវបានធ្វើឡើងយ៉ាងម៉ឺងម៉ាត់បណ្តេញទាហានថៃ ឱ្យដកថយទៅវិញ ខណៈទាហានសៀមឈ្លានពាននេះធ្វើផ្លូវឈូសឆាយចូលទៅកាន់តំបន់ សំបុកឃ្មុំទឹកដីកម្ពុជាដែលជាដែនបំរាមចុងក្រោយ ។
មន្ត្រីយោធាកម្ពុជាបាននិយាយឱ្យដឹងថា មុនពេលផ្ទុះអាវុធគឺទាហានកម្ពុជាបានដាក់បំរាមរួចហើយ កុំឱ្យទាហានថៃឈូសឆាយផ្លូវចូលមកដល់ចំណុចសំបុកឃ្មុំ ឱ្យសោះ ព្រោះថា នេះជាទឹកដីរបស់កម្ពុជា ប៉ុន្តែទាហានសៀមនៅតែក្បាលរឹង រុលចូលដដែល គឺមានបំណងឈ្លានពានទឹកកម្ពុជាយ៉ាងពិតប្រាកដ ដែលបំណងរបស់គេគឺចូលមកឈរជើងក្នុងរង្វង់ផ្ទៃដី៤,៦គីឡូម៉ែត្រការ៉េ និងវត្តកែវសិក្ខាគិរីស្វារៈ ដូច្នេះទាហានកម្ពុជាដាច់ខាតត្រូវតែប្រើសិទ្ធិស្វ័យការពារ ជាកំហិត ទោះជាស្លាប់រស់ក៏ដោយ ។
ការផ្ទុះបានចាប់ផ្តើមចេញពីតំបន់សំបុកឃ្មុំ ហើយរាលដាលតៗគ្នាទៅដល់តំបន់ភ្នំទ្រព្យ វាលឥន្ទ្រី និងតាសឹម ព្រមទាំងនៅតាមខ្សែបន្ទាត់ព្រំដែនជាច្រើនកន្លែងទៀត ស្ថិតនៅស្លាបខាងឆ្វេងប្រាសាទព្រះវិហារ គឺទាហានកម្ពុជាបានប្រើកាំ ភ្លើងធុនធ្ងន់ និងស្រាលជាច្រើនសន្ធាប់ទៅលើទាហានសៀមឱ្យបាក់ទ័ពបត់ចូលទៅ ដល់ចំណុចផ្ទះក្រហមវិញដែលថៃអះអាងថា ជាទឹកដីរបស់ពួកគេ ។ ចំណែកនៅតាមបន្ទាត់ព្រំដែនខេត្តឧត្តរមានជ័យឯណោះវិញ តំបន់ប្រាសាទតាមាន់ធំ ពុំមានការផ្ទុះអាវុធកើតឡើងនោះទេ បើទោះណាទាហានទាំង២ភាគីកម្ពុជា-ថៃកំពុងរំជើបរំជួលត្រៀម ជើងការប្រយុទ្ធរៀងៗខ្លួនក៏ដោយ ៕
http://kohsantepheapdaily.com.kh/art...204-02369.html