ខេត្តបន្ទាយមានជ័យ ៖ រថយន្តកាមរីពណ៌សំបកឪឡឹក ពាក់ស្លាកលេខភ្នំពេញ 2C-2115 ស៊េរីឆ្នាំ១៩៩៦ បើកបរដោយជនជាតិកូរ៉េបានបុកអ្នកជិះម៉ូតូចំនួន២នាក់ បណ្តាលឱ្យរងរបួសយ៉ាងធ្ងន់ធ្ងរ ត្រូវបានដឹកយកទៅសង្គ្រោះភ្លាមៗចំណែកឯម៉ូតូបានខ្ទាតចំងាយ៧០ ម៉ែត្រពីរថយន្ត ។ ហេតុការណ៍នេះបានកើតឡើងនៅវេលាម៉ោង៣ និង៤៣នាទីរសៀលថ្ងៃទី២ កុម្ភៈ ឆ្នាំ២០១១ លើផ្លូវជាតិលេខ៦ ភូមិឈ្នួរ ឃុំឈ្នួរមានជ័យ ស្រុកសិរីសោភ័ណ ។
មន្ត្រីប៉ូលិសបានឱ្យដឹងថា ជនរងគ្រោះជិះម៉ូតូឈ្មោះយិន វុទ្ធី ភេទប្រុស អាយុ២៥ឆ្នាំ នៅភូមិគោកច្រាប ឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ និងអ្នករួមដំណើរឈ្មោះម៉ៅ ភេទប្រុស អាយុ២៥ឆ្នាំ ជាកម្មកររោងម៉ាស៊ីនកិនស្រូវ មានស្រុកកំណើតនៅខេត្តពោធិ៍សាត់ ។ ឯអ្នកបើកបររថយន្តបង្កហេតុឈ្មោះ YOUN JANG YOUN ភេទប្រុស អាយុ៤២ឆ្នាំ ជាជនជាតិកូរ៉េ ស្នាក់នៅភូមិសាលាកន្សែង ឃុំស្វាយដង្គំ ស្រុកសៀមរាប ខេត្តសៀមរាប ។
តាមសាក្សីដែលឃើញផ្ទាល់ភ្នែកបានប្រាប់សមត្ថ កិច្ចថា មុនពេលកើតហេតុគេឃើញរថយន្តបើកយ៉ាងលឿនក្នុងទិសដៅពីកើតទៅ លិច ស្របពេលនោះជនរងគ្រោះបានជិះម៉ូតូចេញពីរោងម៉ាស៊ីនកិនស្រូវឆ្លង ផ្លូវជិតផុតទ្រូងថ្នល់ទៅហើយ ក៏ត្រូវរថយន្តវាក់ជាន់ហ្វ្រាំងរេចង្កូតមកបុកអ្នកជិះម៉ូតូទាំង២ នាក់ពេញមួយទំហឹងបណ្តាលឱ្យមនុស្សផ្លោងខ្ទាតទៅបោកនឹងកញ្ចក់រថ យន្តរងរបួសយ៉ាងធ្ងន់ធ្ងរ ចំណែកម៉ូតូខ្ទាតចំងាយ៧០ម៉ែត្រពី មុខរថយន្ត ។ ក្រោយពេលកើតហេតុ ជនរងគ្រោះទាំង២នាក់ត្រូវបានសាច់ញាតិដឹកយកទៅមន្ទីរពេទ្យ ដើម្បីសង្គ្រោះបន្ទាន់ ។
មន្ត្រីប៉ូលិសបានឱ្យដឹងទៀតថា អ្នកបើកបរម៉ូតូមានភាពស្រវឹងបើកម៉ូតូឆ្លងផ្លូវខ្វះការប្រុង ប្រយ័ត្ន ។ ចំណែកជនជាតិកូរ៉េ ក៏មានសភាពស្រវឹងស្រាដែរ ព្រោះគេបានសារភាពថា រូបគេទើបមកពីកន្លែងកម្មវិធីជប់លៀងសែនចូលឆ្នាំ ចិនកូរ៉េ ។ បច្ចុប្បន្ន វត្ថុតាងបង្កគ្រោះថ្នាក់ខាងលើ ត្រូវបានសមត្ថកិច្ចយកទៅរក្សាទុកនៅស្នងការដ្ឋាននគរបាលខេត្ត ដើម្បីមានវិធានការតាមច្បាប់ ។ នេះជាការបើកបរស្រវឹងទាំងអស់គ្នាទើបខ្វះស្មារតីប្រុងប្រយ័ត្ន ៕
http://kohsantepheapdaily.com.kh/art...03-194548.html