រាជធានីភ្នំពេញ ៖ ក្រុមអ្នកលេងដាវ និងកាំបិតប័ុងតោ២នាក់ត្រូវកំលាំងប៉ូលិសប៉ុស្តិ៍ចោមចៅ ឃាត់ខ្លួនរួចកសាងសំណុំរឿងបញ្ជូនទៅកាន់ផ្នែកព្រហ្មទណ្ឌប៉ូលិស ខណ្ឌដង្កោ ដើម្បីចាត់ការបន្ត បន្ទាប់ពីជនទាំងពីរនាក់នោះ ធ្វើសកម្មភាពដេញកាប់យុវជនម្នាក់បណ្តាលឱ្យរបួសដេរចំនួន៣៦ ថ្នេរ ។ ហេតុការណ៍នោះបានកើតឡើងកាលពីវេលាម៉ោង៨និង១០នាទីយប់ ថ្ងៃទី២ កុម្ភៈ ឆ្នាំ២០១១ នៅក្បែររោងភាពយន្តផ្សារកាណាស៊ីធី ភូមិចោមចៅ សង្កាត់ចោមចៅ ខណ្ឌ ដង្កោ រាជធានីភ្នំពេញ ។
ប្រភពបានឱ្យដឹងថា ក្រុមអ្នកលេងខាងលើម្នាក់ឈ្មោះអ៊ូ ចិន្តា អាយុ២០ឆ្នាំ និងម្នាក់ទៀតឈ្មោះហ៊ិន ឆៃ អាយុ២០ឆ្នាំ អ្នកទាំងពីរជាជាងពិតាន ស្នាក់នៅផ្ទះជួលភូមិកើតហេតុខាងលើ ។ ចំណែកឯយុវជនរងគ្រោះឈ្មោះជា សុភាព អាយុ២៣ឆ្នាំ កម្មកររោងចក្រ មានទីលំនៅផ្ទះជួលផ្សារកាណាស៊ីធី រងរបួសក្បាលមួយកាំបិត ចង្កា១កាំបិត ដៃស្តាំ១កាំបិត កែងដៃឆ្វេង១កាំបិត និងជង្គង់មួយកាំបិត ដេរចំនួន៣៦ថ្នេរ កំពុងសំរាកព្យាបាលនៅមន្ទីរពេទ្យ។
តាមប្រភពព័ត៌មានបានឱ្យដឹងថា មុនពេលកើតហេតុ ជនរងគ្រោះរួមជាមួយមិត្តភក្តិប្រុស និងស្រី៥នាក់ទៀតបាននាំគ្នាដើរចេញពីផ្ទះជួលទៅដើរកំសាន្ត នៅម្តុំរោងភាពយន្តខាងលើ ។ លុះមួយសន្ទុះក្រោយមក ជនរងគ្រោះបានទៅទិញអំពៅសាងហូប បន្ទាប់មកដើរត្រឡប់ទៅផ្ទះជួលវិញ ស្រាប់តែមានយុវជនទំនើងដែលអ្នកលេងដាវ និងកាំបិតប៉័ងតោចំនួនពីរនាក់ស្ទុះរត់ទៅដេញកាប់ខ្លួនទាំង កំរោលបណ្តាលឱ្យរងរបួសយ៉ាងធ្ងន់ធ្ងរ បន្ទាប់មកក្រុមនេះបាននាំគ្នាគេចខ្លួនបាត់អស់ ។
ប្រភពដដែលបានបន្តថា ក្រោយពេលមានហេតុការណ៍នេះ កើតឡើងគេឃើញកំលាំងប៉ូលិសប៉ុស្តិ៍ចោមចៅបានចុះទៅកាន់កន្លែង កើតហេតុធ្វើការស្រាវជ្រាវចាប់ខ្លួនជនទាំងពីរនាក់ ខណៈដែលក្រុមនេះកំពុងពួនសំងំនៅក្នុងផ្ទះជួល។ ប៉ូលិសនិយាយថា ហេតុការណ៍នោះកើតឡើងដោយគ្មានមូលហេតុដែលជនរងគ្រោះកំពុងតែដើរ ដោយមិនដឹងខ្លួន ស្រាប់តែត្រូវយុវជនទំនើងស្ទុះទៅកាប់ទាំងកំរោលតែម្តង ហើយតាមការសន្និដ្ឋានក្រុមនេះ ទំនងជាមានទំនាស់ជាមួយអ្នកផ្សេងដែលមានភិនភាគស្រដៀងជនរងគ្រោះ ទើបជនទំនើងទាំងនេះស្មានថា ជាសត្រូវរបស់ខ្លួនក៏កាប់ដើម្បីសងសឹកតែម្តង ។ ពេលនេះជនអ្នកលេងទាំងពីរត្រូវបានសាកសួរនឹងកសាងសំណុំ រឿង ដើម្បីបញ្ជូនទៅកាន់តុលាការ។ ចំណែកឯជនរងគ្រោះកំពុងសំរាកព្យាបាលរបួសនៅមន្ទីរពេទ្យឯកជន ៕
http://kohsantepheapdaily.com.kh/art...203-19111.html