ខេត្តស្ទឹងត្រែង ៖ ក្រុមក្មេងទំនើង៣នាក់បានដេញវាយតប់គ្នារត់ចូលក្នុងហាងខារ៉ាអូខេ រាត្រីសប្បាយៗ មានទីតាំងស្ថិតនៅក្នុងភូមិស្ពានថ្ម សង្កាត់ស្ទឹងត្រែង ក្រុងស្ទឹងត្រែង កាលពីវេលាម៉ោង១១និង៥នាទីយប់ថ្ងៃទី១ កុម្ភៈ ។ ហេតុការណ៍ដេញវាយគ្នាយ៉ាងអនាធិបតេយ្យនេះក្រុមក្មេងទំនើង ទាំងនោះបានយកដំបងឈើជ្រុងវាយកំទេចម៉ូតូស៊េរីទំនើបដែលគេទុកក្នុងហាងអស់ ៣គ្រឿង ធ្វើឱ្យមានការភ្ញាក់ផ្អើលដល់ប្រជាពលរដ្ឋរស់នៅក្បែនោះ ។
លោកសាយ ស៊ុន ម្ចាស់ហាងខារ៉ាអូខេ រាត្រីសប្បាយៗបានឱ្យដឹងថា មុនពេលកើតហេតុជន ម្នាក់ក្នុងចំណោម៣នាក់ឈោ្មះយ៉ុង បានមកសួរ រកឈ្មោះស៊ី ណាត ជាមេការខារ៉ាអូខេ តែគាត់ បានឆ្លើយថា មិននៅទេ ហើយពួកគេក៏បានដើរ ចេញទៅវិញ ។ លុះមួយសន្ទុះក្រោយមកស្រាប់ តែឃើញពួកគេដេញវាយជនម្នាក់ទៀតរត់ចូលមកក្នុងហាង របស់គាត់ហើយក៏មានការប្រវាយប្រតប់ គ្នា និងវាយកំទេចម៉ូតូ៣គ្រឿងរបស់ភ្ញៀវក្នុងហាងរបស់គាត់ថែមទៀត ។
លោកសាយ ស៊ុន បានបន្តថា ពេលជនទាំង៣នាក់កំពុងវាយកំទេចម៉ូតូ សមត្ថកិច្ចកងរាជអាវុធហត្ថម្នាក់នៅក្បែរនោះបានផ្ទុះអាវុធចំនួន ២គ្រាប់ដើម្បីគំរាម ហើយពេលឮស្នូរកាំភ្លើងពួកគេបានរត់គេចខ្លួនបាត់អស់។ ក្នុងពេលកើតហេតុនោះ គាត់ជាម្ចាស់ហាងក៏បានរាយការណ៍ដល់សមត្ថកិច្ចប៉ូលិសឱ្យមកជួយអន្តរាគមន៍ ផងដែរ តែទំរាំមកដល់ក្រុមក្មេងទំនើងទាំងនោះបានរត់បាត់អស់ទៅហើយ។ ចំណែកប៉ូលិសបាន ត្រឹមតែធ្វើកំណត់ហេតុ និងដឹកម៉ូតូទាំង៣គ្រឿង មកកាន់ស្នងការដ្ឋាននគរបាលខេត្ត ។
មន្ត្រីប៉ូលិសបានឱ្យដឹងថា ម៉ូតូ៣គ្រឿង ដែលត្រូវក្រុមក្មេងទំនើងវាយកំទេចនោះ១-ម៉ូតូម៉ាក ហុងដា ស៊េរី២០១០ ពណ៌ខ្មៅ គ្មានស្លាកលេខ កម្មសិទ្ធិរបស់ឈ្មោះស៊ី ណាត ភេទស្រី ជាមេការ ខារ៉ាអូខេរាត្រីសប្បាយៗបែកចង្កៀងមុខក្រោយ និងក្បាំងខាងស្តាំ។ ២-ម៉ូតូម៉ាកហុងដា ស៊េរីឆ្នាំ២០១០ ពណ៌ខ្មៅ ពាក់ស្លាកលេខ 1A-3807 ស្ទឹងត្រែង កម្មសិទ្ធិរបស់ឈ្មោះចាយ ភេទប្រុស ជាភ្ញៀវមកច្រៀងកំសាន្តបែកចង្កៀងខាងមុខ និង៣ -ម៉ូតូម៉ាកហុងដា ស៊េរីឆ្នាំ២០១១ ពណ៌ខ្មៅ ពាក់ស្លាកលេខ 1A-4882 ស្ទឹងត្រែង កម្មសិទ្ធិរបស់ឈ្មោះពៅ ភេទប្រុស ជាភ្ញៀវមកច្រៀងកំសាន្តបែកចង្កៀងខាងមុខ ។ មន្ត្រីប៉ូលិសបានបន្តឱ្យដឹងទៀតថា ក្មេងទំនើងទាំងនោះគឺជាមុខសញ្ញាចាស់ធ្លាប់អុកឡុកក្នុងក្រុងស្ទឹងត្រែង ក្នុងនោះមានម្នាក់ឈ្មោះយ៉ុង ធ្លាប់ជាប់ពន្ធនាគារម្តងរួចមកហើយ ហើយពេលចេញវិញបាន២ថ្ងៃក៏បានធ្វើការអុកឡុកទៀត។ បច្ចុប្បន្ន សមត្ថកិច្ចប៉ូលិសកំពុងស្វែងរកចាប់ខ្លួនក្រុមក្មេងទំនើងទាំងនោះ ដើម្បីយកមកផ្ទន្ទាទោសតាមច្បាប់ ៕
http://kohsantepheapdaily.com.kh/art...03-190241.html