រាជ ធានីភ្នំពេញ ៖ ផ្សារធំៗខ្លះក្នុងរាជធានីមានផ្សារធំថ្មី ផ្សារអូរឫស្សី និងផ្សារអូឡាំពិកបានក្លាយជាទីស្ងាត់ជ្រងំដោយសារតែតូបលក់ដូរ ទាំងអស់ត្រូវបានបិទទ្វារ។ មិនមែនតែផ្សារ ធំៗទាំងនេះទេ ដែលបិទការលក់ដូរ នៅតាមផ្សារផ្សេងៗទៀតក៏មានស្ថានភាពដូចគ្នានេះដែរ។ បញ្ហានេះបានក្លាយជារឿងធម្មតាមួយ ដែលឱ្យតែដល់ថ្ងៃចូលឆ្នាំចិន វៀតណាមផ្សារធំៗទាំងនេះ និងក្រុមហ៊ុនផ្សេងៗដែលធ្លាប់តែបើក មនុស្សចេញចូលមិនដាច់ និងមានសភាពអ៊ូរអរនោះបែរជាស្ងាត់ជ្រងំ ។
អាជីវករមួយរូបបាននិយាយថា ការប្រកបមុខរបររកស៊ី ត្រូវតែប្រកាន់ទំនៀមទំលាប់ដើម្បីឱ្យរកស៊ីមានបានក្នុងឆ្នាំថ្មី ។ ដូច្នេះបន្ទាប់ពីថ្ងៃសែនហើយតាមទំនៀមទំលាប់គឺត្រូវសំរាកនៅក្នុង ផ្ទះឱ្យបានមួយថ្ងៃជួបជុំបងប្អូន ហើយបន្ទាប់មកទើបអាចដើរកំសាន្តបាន។ ការប្រកាន់ខ្ជាប់ទំនៀមទំលាប់តាមជំនឿជនជាតិចិនតាំងពីបុរាណមកនោះ បានធ្វើឱ្យជនជាតិចិននៅគ្រប់ទីកន្លែង រកស៊ីមានបានធូរធារគ្រប់ៗគ្នា។ ដូច្នេះហើយមិនថាតែជនជាតិចិនសុទ្ធនោះទេដែលប្រកាន់ទំនៀមទំលាប់ នេះ សូម្បីតែអ្នកជាប់សែស្រឡាយចិន ក៏បាននាំគ្នាគោរពប្រតិបត្តិដែរ ។ ហេតុនេះហើយទើបបច្ចុប្បន្ននេះពិធីបុណ្យចូលឆ្នាំចិនពេលនេះ មើលទៅស្រុកខ្មែរ ឬរាជធានីសុទ្ធតែចិន ។
មិនមែនតែផ្សារធំៗទេ ដែលបិទទ្វារផ្អាកសកម្មភាពធ្វើអាជីវកម្ម សូម្បីតែហាងតូចធំឬកន្លែងលក់ដូរផ្សេងៗទៀតក៏បិទទ្វារដែរ។ អ្វីដែលគួរឱ្យកត់សំគាល់ផងដែរនោះ គឺសាលារៀនគ្រប់ភូមិសិក្សាទាំងរដ្ឋ ទាំងឯកជនក៏មិនមានដំណើរការរៀនសូត្រដែរ ដូចជាសាលារដ្ឋជាដើម។ ទោះបីកាលវិភាគសិក្សាមិនបានរាប់បញ្ចូលជាថ្ងៃឈប់សំរាកក៏ដោយ ក៏ជាស្វ័យប្រវត្តិមិនមានសកម្មភាពរៀនសូត្រនោះទេ។ គ្រូបង្រៀនមួយរូបបាននិយាយថា សាលាអត់បានឱ្យសិស្សឈប់ទេ តែសិស្សភាគច្រើនបំផុតពួកគេមិនមកសាលារៀនតាំងពីថ្ងៃសែនមក ហើយលោកគ្រូអ្នកគ្រូខ្លះក៏សែនដែរ ទើបការសិក្សាមានសភាពរហេតរហូត។ លុះចូលមកដល់ថ្ងៃទី៣ កុម្ភៈ ជាថ្ងៃដែលចិនហៅថា ថ្ងៃ
ឈីវអ៊ិត គឺគ្រប់សាលាគ្មានសកម្មភាពតែម្តង។ ដោយសារសកម្មភាពតាមទីផ្សារត្រូវផ្អាកសាលារៀនក៏គ្មានសិស្សមក រៀន បានធ្វើឱ្យតាមដងផ្លូវនានាក្នុងរាជធានីភ្នំពេញ មិនចោទជាបញ្ហាកកស្ទះចរាចរណ៍ឡើយ ហើយស្ថានភាពផ្លូវទូលាយជាងថ្ងៃធម្មតាដែលតែងតែកកស្ទះនៅវេលា ព្រឹកនិងល្ងាចនោះ៕
http://kohsantepheapdaily.com.kh/art...203-18441.html