ខេត្តកំពង់ស្ពឺ ៖ យុវជនម្នាក់បានត្រូវកំលាំងកងរាជអាវុធហត្ថស្នាក់ការវាល ធំចាប់ឃាត់ខ្លួនកាលពីថ្ងៃទី២ កុម្ភៈ នៅក្នុងភូមិវាលធំ ឃុំត្រែងត្រឈឹង ស្រុកភ្នំស្រួច ពីបទបង្ករបួសស្នាមធ្វើឱ្យគូភាគីម្ខាងរងរបួសហើយត្រូវបាន ដឹកចូលគ្លីនិកឯកជនមួយនៅក្នុងឃុំនោះដើម្បីសង្គ្រោះបន្ទាន់។ លោកអនុសេនីយ៍ឯក ឌិត ផារិន នាយការិយាល័យបទល្មើសស្រាវជ្រាវនៃកងរាជអាវុធហត្ថខេត្ត បានឱ្យដឹងថា យុវជនដែលត្រូវឃាត់ខ្លួននេះឈ្មោះចាន់ វណ្ណឌី អាយុ១៨ឆ្នាំ មានទីលំនៅក្នុងភូមិខាងលើ។
យុវជនរូបនេះ ស្ថិតក្នុងចំណោមបក្សពួក៦នាក់ ដែលផឹកសីុនៅក្នុងភូមិវាលធំនេះ កាលពីវេលាម៉ោងប្រមាណ១០និង៣០នាទីយប់ ថ្ងៃទី១ កុម្ភៈ តែដោយសារអស់សាច់ក្លែមក៏ប្រើឈ្មោះបូរី និងឈ្មោះឃុន មីនា ឱ្យទៅរកទិញថែម ។ លុះពេល២នាក់នេះទៅរកទិញសាច់ក្លែមក្នុងភូមិក៏ជួបក្រុម ម្ខាងទៀតដែលកំពុងហូបចុកដូចគ្នាដែរ និងមានចាក់ភ្លេងច្រៀងខារ៉ាអូខេផង ក៏ស្រាប់តែមានទំនាស់គ្នាដោយពាក្យសំដីទៅវិញទៅមក និងក្លាយជាទំនាស់ទ្រង់ទ្រាយធំ ។
បន្តិចក្រោយមកគេឃើញបក្សពួករបស់២នាក់ដែល ឱ្យមករកទិញសាច់ក្លែមនោះមកដល់ដែរ រួចស្ទុះទៅដកឈើចន្ទល់ទ្វារ ចន្ទល់បង្អួចវាយទៅលើក្រុមម្ខាងទៀត ដែលកំពុងផឹកស៊ីហើយច្រៀងខារ៉ាអូខេនោះ បណ្តាលឱ្យរបួសធ្ងន់ធ្ងរ២នាក់ គឺឈ្មោះសំ សឿន ភេទប្រុស អាយុ៣២ឆ្នាំ និងឈ្មោះឡៃ រឿន ភេទ ប្រុស អាយុ៣១ឆ្នាំ ហើយត្រូវបាននាំយកទៅសង្គ្រោះនៅគ្លីនិក ។ ប្រភពដដែលបានឱ្យដឹងទៀតថា បក្សពួកទាំង២ក្រុមនេះ រស់នៅក្នុងភូមិ-ឃុំជាមួយគ្នា ហើយជនបង្កត្រូវបានកសាងសំណុំរឿងបញ្ជូនទៅសាលាដំបូងខេត្ត រួមជាមួយវត្ថុតាង ចំណែកបក្សពួកកំពុងតាមរកចាប់ខ្លួនបន្ត៕
http://kohsantepheapdaily.com.kh/art...03-035751.html