ក្រុងប៉ោយប៉ែត ៖ ស្ត្រីមានផ្ទៃពោះ៥ខែ ម្នាក់ស្ថិតក្នុងបន្ទប់ជួលនៃលំនៅឋានរបស់ប្រជាពលរដ្ឋដែលសង់ ជាប់គ្នា២ល្វែង នៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត បានក្លាយជាចំណីព្រះអគ្គីយ៉ាងអាណោចអាធ័ម ដោយសារទ្វារជាប់សោរកច្រកចេញមិនរួចកាលពីវេលាម៉ោង១០និង ៤៥នាទីយប់ថ្ងៃទី២ កុម្ភៈ ចំណែកកូនប្រុសរបស់នាងអាយុ៣ឆ្នាំម្នាក់ទៀតត្រូវ បានអ្នកជិតខាងជួយសង្គ្រោះចេញ ពីអណ្តាតភ្លើងទាន់ពេលវេលា ដោយហែកទ្វារស័ង្កសីយ៉ាងប្រផិតប្រផើយជាទីបំផុត ។
លំនៅឋាន ២ល្វែងនឹងបន្ទប់ជួលនោះជារបស់ម្ចាស់តែមួយ ហើយល្វែងខាងម្ចាស់រស់នៅពុំត្រូវបានឆេះទាំងស្រុងនោះទេ គឺគ្រាន់តែឆេះអស់ជញ្ជាំងមួយចំហៀង និងផ្នែកខាងក្រោយបន្តិចបន្តួចតែប៉ុណ្ណោះ ចំណែកឯល្វែងមួយទៀត ដែលខណ្ឌជាបន្ទប់ជួលជាប់ៗគ្នានោះ មាន៦
បន្ទប់ ត្រូវបានក្លាយជាផេះផង់ទាំងស្រុង ហើយស្ត្រីដែលមានផ្ទៃពោះ៥ខែ ស្នាក់នៅក្នុងនោះក៏បានស្លាប់យ៉ាងអាណោចអាធ័ម ព្រោះតែភ្លើងឆេះរួញមើលលែងយល់ថា ជាអ្នកណាទៅហើយ។ សពស្ត្រីរងគ្រោះឈ្មោះកែវ វណ្ណា អាយុ២៩ឆ្នាំ ជាជាងដេរខោអាវ ស្នាក់នៅបន្ទប់ជួលកន្លែងកើតហេតុ មានប្តីឈ្មោះជាម បញ្ញា អាយុ៣០ឆ្នាំ ជាសន្តិសុខនៅហាងខារ៉ាអូខេ
ពន្លឺនាគទិព្វ ។ ខណៈព្រះអគ្គីភ័យកំពុងឆាបឆេះគេឃើញរថយន្តពន្លត់អគ្គីភ័យ របស់ក្រុមហ៊ុនកាស៊ីណូ២គ្រឿង ព្រមជាមួយកងកំលាំងប៉ូលិស ប៉េអឹមក្រុង ចូលទៅធ្វើអន្តរាគមន៍បាញ់ពន្លត់យ៉ាងញាប់ដៃញាប់ជើង ក្រោមសម្រែកទ្រហោយំរបស់បុរសជាប្តីស្វែងរកប្រពន្ធ និងកូនប្រុសតូច យ៉ាងកងរំពងគួរឱ្យរន្ធត់ដែលកំពុងតែតតេះតតះក្នុងបន្ទប់ជួល យ៉ាងលំបាកបំផុត ។
បុរសជាប្តីបានប្រាប់ថា ពេលហេតុការណ៍កើតឡើង ខ្លួនមិននៅក្បែរប្រពន្ធនោះទេ គឺរវល់នៅយាមកាមឯហាងខារ៉ាអូខេ
ពន្លឺនាគទិព្វ នោះ។ លុះពេលអណ្តាតភ្លើងត្រូវបានពន្លត់ទាំងស្រុងខ្លួនបានសុំឱ្យ សមត្ថកិច្ចជួយដើរវែករកប្រពន្ធ និងកូនប្រុសរបស់ខ្លួនអាយុ៣ឆ្នាំ ម្នាក់ទៀតដែលបាត់ក្នុងហេតុការណ៍អគ្គីភ័យ ប៉ុន្តែភ្លាមៗនោះរកឃើញតែសពប្រពន្ធក្លាយជាចំណី ភ្លើងឡើងរួញក្រញង់ទៅហើយ ។ ចំណែកកូនប្រុស សំណាងល្អត្រូវបានអ្នកស្នាក់នៅបន្ទប់ជួលជាប់គ្នាជួយហែក ស័ង្កសីទ្វារយកចេញមកក្រៅទាន់ពេលវេលា ខណៈអណ្តាតភ្លើងកំពុងឆាបឆេះនោះ ៕
http://kohsantepheapdaily.com.kh/art...02-233534.html