ខេត្តកំពង់ឆ្នាំង ៖ បុរសមានជំងឺប្រចាំកាយម្នាក់បានត្រដរខ្យល់ ខណៈធ្វើដំណើរតាមរថយន្តក្រុងពីខេត្តពោធិ៍សាត់ ឆ្ពោះទៅរាជធានីភ្នំពេញ លុះមកដល់ចំណុចភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង ក៏ស្រាប់តែរកកល់ដាច់ខ្យល់ ។ ប្រពន្ធឃើញដូច្នេះក៏បានឃាត់រថយន្តឱ្យឈប់ ហើយក៏បានដាក់ប្តីគាត់ចុះ និងបន្តិចក្រោយមក បុរសនោះក៏បានដាច់ខ្យល់ស្លាប់ទៅ នៅតាមចិញ្ចើមផ្លូវ ។ ហេតុការណ៍នេះធ្វើឱ្យមានការភ្ញាក់ផ្អើលនាវេលាម៉ោង១និង៤៥នាទី រសៀលថ្ងៃទី២ កុម្ភៈ ។ មនុស្សម្នាបានចោមរោមមើលបុរសដែលស្លាប់ក្នុងរង្វង់ដៃប្រពន្ធ ដោយខ្លះបានចូលរួមជួយឧបត្ថម្ភជាប្រាក់ទៀតផង ។
ស្ត្រីជាប្រពន្ធបានរៀបរាប់ថា រូបគាត់ឈ្មោះហ៊ុន តឹង អាយុ៤២ឆ្នាំ ចំណែកប្តីគាត់ឈ្មោះផាត់ ផល អាយុ៣៨ឆ្នាំ ។ ប្តីគាត់មានជំងឺប្រចាំកាយ គឺខូចផ្នែកតម្រងនោម បានសំរាកព្យាបាលនៅមន្ទីរពេទ្យភ្នំពេញបានធូរស្រាលមួយរយៈ ពេទ្យក៏ឱ្យទៅផ្ទះវិញ ។ ផ្ទះគាត់ស្ថិតនៅភូមិអន្លុងហាប ឃុំកោះជុំ ស្រុកកណ្តៀង ខេត្តពោធិ៍សាត់ ។ នៅថ្ងៃទី២ កុម្ភៈ នេះ ពេទ្យភ្នំពេញបានឱ្យគាត់នាំប្តីទៅពិនិត្យជាថ្មី ទើបគាត់នាំប្តីជិះរថយន្តក្រុងចេញពីពោធិ៍សាត់ ទៅភ្នំពេញ ដើម្បីចូលមន្ទីរពេទ្យពិនិត្យជំងឺជាថ្មី ។ លុះមកដល់ខេត្តកំពង់ឆ្នាំង ប្តីគាត់បានត្រដរខ្យល់ ឃើញដូចនេះ គាត់ក៏បានឱ្យរថយន្តក្រុងឈប់ដើម្បីដាក់ប្តីគាត់ចុះ ហើយបានបន្តិច ប្តីក៏ដាច់ខ្យល់ស្លាប់តែម្តង ។ ប៉ូលិសបានចាត់ចែងហៅរថយន្តពេទ្យដឹកសពបុរសនោះទៅដាក់នៅវត្ត ខ្សាមជាបណ្តោះអាសន្ន រង់ចាំរថយន្តដឹកសពបន្តទៅផ្ទះឯខេត្តពោធិ៍សាត់វិញ ៕
http://kohsantepheapdaily.com.kh/art...02-190216.html