ខេត្តក្រចេះ ៖ ទារកអាយុ១០ខែម្នាក់បានស្លាប់ក្នុងអណ្តាតភ្លើង ខណៈពេលដែលម្តាយដាក់ឱ្យដេកក្នុងអង្រឹង ហើយក៏ត្រូវភ្លើងចង្ក្រានរាលឆេះផ្ទះគ្មានសល់ ។ ហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី១ កុម្ភៈ ទៅលើលំនៅឋានរបស់ពលរដ្ឋក្រីក្រមួយមានទីតាំងនៅភូមិស្រែស្តៅ សង្កាត់អូរឫស្សី ក្រុងក្រចេះ ខាងក្រោយបន្ទាយអង្គភាពវរសេនាតូចលេខ២ ។ លោកអនុសេនីយ៍ទោ ភិន ម៉ុល នាយប៉ុស្តិ៍រដ្ឋបាលសង្កាត់អូរឫស្សី បានឱ្យដឹងថា ផ្ទះរបស់គ្រួសាររងគ្រោះដែលជួបឧប្បត្តិហេតុនេះមានទំហំ៤ម៉ែត្រ គុណ៦ម៉ែត្រ ធ្វើពីឈើប្រក់ស្បូវ ជញ្ជាំងស្លឹកងាយឆាបឆេះបំផុត ។ មហន្តរាយនេះបណ្តាលឱ្យបាត់បង់សំភារប្រើប្រាស់ទាំងស្រុង រួមទាំងអង្ករ១បាវ លុយចំនួន៤០ម៉ឺនរៀល ព្រមទាំងជីវិតទារកម្នាក់អាយុ១០ខែផងដែរ ។
បុរសជាប្តីឈ្មោះយឹម សយ អាយុ៤១ឆ្នាំ ជាមន្ត្រីបានរៀបរាប់ឱ្យដឹងថា ប្រពន្ធរបស់គាត់ឈ្មោះណន សល់ អាយុ៤២ឆ្នាំ មានកូនចំនួនបីនាក់ ទាំងកូនតូចរងគ្រោះ។ កាលពីថ្ងៃកើតហេតុគាត់ជាប់រវល់នៅអង្គភាព ឯប្រពន្ធរបស់គាត់បានបំបៅកូនឱ្យដេកក្នុងអង្រឹងលើផ្ទះ ហើយដាក់ដាំបាយទុកចោលរួចក៏ដើរទៅទិញគ្រឿងសម្លនៅចំងាយប្រមាណ ជិត២រយម៉ែត្រពីផ្ទះ។ ពេលនោះភ្លើងចង្ក្រានដែលខ្ទាតដោយកំលាំងខ្យល់បក់ឡើង រាលឆេះផ្ទះ ដោយមិនមាននរណាជួយទាន់ឡើយបណ្តាលឱ្យកូនតូចឈ្មោះសុខ នី ភេទប្រុស មានអាយុទើបតែ១០ខែដែលម្តាយបានដាក់ឱ្យដេកក្នុងអង្រឹងបាន ស្លាប់ក្នុងអណ្តាតភ្លើងយ៉ាងអាណោចអាធ័មបំផុត។
ចំណែកកូនពីរនាក់ទៀតដែលមានអាយុ៣ឆ្នាំ និង៩ឆ្នាំ បានរត់ចេញផុតពីអណ្តាតភ្លើងទាន់ពេល ។ តាមប្រភពព័ត៌មានពីប្រជាពលរដ្ឋជិតខាងបានឱ្យដឹងថា កន្លងមកគ្រួសាររងគ្រោះខាងលើនេះ ឧស្សាហ៍ទុកកូនតូចៗចោលនៅផ្ទះជាញឹកញាប់ណាស់ ហើយកាលពីថ្ងៃកើតហេតុប្រជាពលរដ្ឋបានស្ទុះចូលទៅជួយយកទារក ដែលដេកក្នុងអង្រឹងដែរ តែមិនអាចចូលបានដោយសារតែអណ្តាតភ្លើងឆេះសន្ធោសន្ធៅរួចទៅ ហើយ ៕
http://kohsantepheapdaily.com.kh/art...02-191125.html