ក្រុងប៉ោយប៉ែត ៖ ស្ត្រីម្នាក់បានយកពស់ថ្លាន់២ក្បាលទៅប្រគល់ឱ្យប៉ូលិសនៅអធិការ ដ្ឋានក្រុងប៉ោយប៉ែតកាលពីព្រឹកថ្ងៃទី២ កុម្ភៈ និងប្រាប់ថា គាត់ចាប់បាននៅខាងក្រោយភូមិរបស់គាត់។ ស្ត្រីរូបនោះឈ្មោះអៀម ម៉ាប់ អាយុ៤៤ឆ្នាំ មានទីលំនៅក្នុងភូមិគីឡូម៉ែត្រលេខ៤ សង្កាត់ប៉ោយប៉ែត។ ចំពោះពស់ថ្លាន់ទាំង២ក្បាលនោះទំងន់ប្រហែល២០គីឡូក្រាម និងមួយក្បាលៗមានប្រវែងប្រហែល៣ម៉ែត្រ តែពស់ញីធំជាងពស់ឈ្មោល។ តាមការរៀបរាប់របស់ស្ត្រីនោះឱ្យដឹងថា គាត់ និងកូនប្រុសឈ្មោះម៉ៅ ទី អាយុ១២ឆ្នាំ បានចាប់ពស់ទាំង២ក្បាលកាលពីម៉ោង៦ល្ងាច ថ្ងៃទី១ កុម្ភៈ នៅខាងក្រោយភូមិរបស់គាត់នៅពេលគាត់ដើររកអុស។ គាត់ជួបពស់ទាំង២ក្បាលពេលកំពុងស្គារគ្នា។
លោកអនុសេនីយ៍ឯកអ៊ុំ សុផល អធិការនគរបាលក្រុងពេលទទួលពស់ទាំង២ក្បាលពីស្ត្រីរូបនោះ លោកមានការត្រេកអរ ហើយបានជូនប្រាក់ចំនួន១៣មឺុនរៀលដល់គាត់ជាការលើកទឹកចិត្ត ព្រោះប្រសិនបើធ្លាក់ដល់ដៃឈ្មួញនឹងក្លាយជាចំណី ឬក៏ត្រូវគេនាំយកទៅលក់នៅក្រៅប្រទេសមិនខាន។ ស្ត្រីឈ្មោះអៀម ម៉ាប់ មុនពេលត្រឡប់ទៅផ្ទះវិញត្រូវលោកអធិការណែនាំកុំឱ្យចាប់ពស់ទៀត ដោយលោកពន្យល់ថា សត្វព្រៃគួរតែនាំគ្នាអភិរក្ស ព្រោះបច្ចុប្បន្នកាន់តែជិតដាច់ពូជហើយ ដោយសារតែឈ្មួញខិលខូចលួចនាំចេញទៅលក់នៅក្រៅប្រទេស។ ពស់ទាំង២ក្បាលនោះលោកអធិការប្រាប់ថា លោកនឹងប្រគល់ឱ្យផ្នែកមេព្រៃយកទៅអភិរក្សក្នុងតំបន់ធម្មជាតិ វិញក្រោយពេលធ្វើកំណត់ហេតុរួច ៕
http://kohsantepheapdaily.com.kh/art...02-191842.html