បាត់ដំបង ៖ វាជារឿងគួរឲ្យហួសចិត្តនៅពេលដែលរដូវសែនចូលឆ្នាំចិន-វៀតណាមឈាន ចូលមកដល់ ស្រាប់តែប៉ូលិសបានដៃដេញចាប់បង្រ្កាបបានជ្រូកខ្វៃប្រជាពលរដ្ឋ១ ក្បាល ដែលដឹកបម្រុងយកទៅសែន ជូនដូនតានារដូវបុណ្យទាន។ ទោះជាប្រជាពលរដ្ឋអង្វរយ៉ាងណា លើកដៃសំពះយ៉ាងណា ក៏ប៉ូលិសរូបនោះគ្មានធម៌មេត្តាដែរ លុះត្រាតែបង់ប្រាក់២០ម៉ឺនរៀលទើបអនុញ្ញាតឲ្យយកជ្រូកខ្វៃនោះទៅ សែនបាន។
ការដេញបង្រ្កាបនោះបានកើតឡើងកាលពីវេលាម៉ោង ៨និង៤៥ ថ្ងៃទី២ ខែកុម្ភៈ ឆ្នាំ២០១១ នៅចំណុចភូមិវត្តតាមឹម ឃុំវត្តតាមឹម ស្រុកសង្កែ ខេត្តបាត់ដំបង គឺធ្វើឡើងដោយប៉ូលិសម្នាក់ ដែលគេស្គាល់ថាឈ្មោះ ផា បានដេញចាប់ប្រជាពលរដ្ឋម្នាក់ដែលដឹកជ្រូកខ្វៃតាមផ្លូវបម្រុងយក ទៅសែនជូនដូនតា។ ប៉ុន្តែពេលធ្វើដំណើរបានត្រឹមតែពាក់កណ្ដាលផ្លូវក៏ត្រូវប៉ូលិស រូបនោះ កាក់ជាប់និងឃាត់ជ្រូកខ្វៃមិនអនុញ្ញាតឲ្យបន្តដំណើរទៅទៀតបានទេ ដោយគេសំអាងថាគ្មានលិខិតអនុញ្ញាតដឹកជ្រូកខ្វៃមួយក្បាលនោះ។
បុរសជាម្ចាស់ជ្រូកខ្វៃឈ្មោះបូ បានមានប្រសាសន៍ប្រាប់កម្ពុជាថ្មីថា រូបគាត់បានចិញ្ចឹមជ្រូកចំនួន៦ ក្បាលនៅនឹងផ្ទះ ហើយដល់រដូវចូលឆ្នាំចិន-វៀតណាម ក៏នឹកឃើញចង់សែនជូនដូនតា ក៏បានខ្វៃជ្រូកមួយ ក្បាល រួចដឹកពីផ្ទះទៅកន្លែងសែននៅផ្ទះបងប្អូន។ ប៉ុន្តែជាអកុសលស្រាប់តែធ្វើដំណើរបានត្រឹមពាក់កណ្ដាល ផ្លូវត្រូវប៉ូលិសឈ្មោះផា ឃាត់ជ្រូកខ្វៃនោះជាប់ ដោយគេអះអាងថា ចាប់តាមបញ្ជារបស់លោកលឹម ភឿនជា អ្នកម៉ៅការកុងស៊ីនៅក្រុងបាត់ដំបង។ លោកបានបន្តថា នៅពេលចាប់ភ្លាមៗលោកបានលើកដៃអង្វរសុំឲ្យ ប៉ូលិសរូបនោះអនុគ្រោះ ប៉ុន្តែគេនៅតែមិនព្រម រួចរឹបអូសជ្រូកខ្វៃមួយក្បាលនោះ យកទៅរក្សាទុកនៅអធិការ ដ្ឋាននគរបាលស្រុកសង្កែ។ ជនរងគ្រោះបានបន្តថា ប៉ូលិសរូបនោះបាននិយាយថាលុះត្រាតែបង់ប្រាក់ឲ្យលោកប៉ូលិស ជំនាញរូបនោះ ចំនួន២០ម៉ឺនរៀល ទើបអនុញ្ញាតឲ្យជ្រូកខ្វៃនោះមានសេរីភាពឡើងវិញ។
ដោយមិនចង់មានទំនាស់ ជនរងគ្រោះជាម្ចាស់ជ្រូកខ្វៃក៏បានប្រគល់ប្រាក់ចំនួន២០ម៉ឺនរៀល ឲ្យលោកប៉ូលិសរូបនោះ ទើបបានយកជ្រូកខ្វៃទៅសែនព្រេនជូនដូនតានារដូវបុណ្យចូលឆ្នាំ ចិន-វៀតណាមនោះបាន៕
http://www.kampucheathmey.com/local-...-02-23-54.html