ប្រាសាទព្រះវិហារ ៖ ស្ថានការណ៍យោធានៅតំបន់ប្រាសាទព្រះវិហាររបស់ខ្មែរនៅថ្ងៃទី១ កុម្ភៈ ទោះបីមានសភាពស្ងាត់ស្ងៀម តែកំរិតនៃការឡើងកំដៅហាក់ដូចជាកើនឡើងជាលំដាប់ បន្ទាប់ពីមានប្រតិកម្មយ៉ាងក្តៅគគុកមួយបានកើតឡើងកាលពីថ្ងៃទី ២៦ មករា កន្លងទៅរវាងកងទ័ពខ្មែរជាម្ចាស់ផ្ទះជាមួយទ័ពសៀមឈ្លានពាន ដែលឱ្យភាគីកម្ពុជារុះរើខ្លោងទ្វារវត្តកែវសិក្ខាគិរីស្វារៈហៅ វត្តប្រាសាទព្រះវិហារដែលខ្មែរបានសាងសង់ឡើងនៅទីនោះតាំងពី ឆ្នាំ១៩៩៨មក។ តាមរបាយការណ៍ព័ត៌មាននាវេលារសៀលថ្ងៃទី១ កុម្ភៈ ឱ្យដឹងថា ស្ថានការណ៍ យោធានៅតំបន់ប្រាសាទព្រះវិហារថ្វីដ្បិតតែមិនមានអ្វីកើតឡើងដោយ ការផ្ទុះអាវុធដាក់គ្នាក៏ពិតមែន តែយុទ្ធសាស្ត្រប្រយុទ្ធត្រូវបានកងទ័ពទាំងពីរភាគី កម្ពុជា-សៀមប្រចាំទីនោះឱ្យដឹងថា ជិតមួយសប្តាហ៍មកហើយដែលពួកគេពុំបានដេកពួនទេ គឺត្រៀមជើងការ២៤ម៉ោងលើ២៤ម៉ោង និងស្ថិតនៅក្នុងលេណដ្ឋានជាការត្រៀមលក្ខណៈប្រយុទ្ធយ៉ាងប្តូរ ផ្តាច់។
មន្ត្រីយោធាជាន់ខ្ពស់កម្ពុជាប្រចាំនៅប្រាសាទ ព្រះវិហារបានឱ្យដឹងនៅ រសៀលថ្ងៃទី១ កុម្ភៈ ថា ពេលនេះសៀមបានប្រើល្បិចកលជាច្រើនក្នុងការចល័តទ័ពជាច្រើនរយ នាក់ និងដឹកជញ្ជូនអាវុធដាក់នៅក្នុងទឹកដីរបស់ពួកគេដែលនៅទល់មុខ តំបន់ប្រាសាទព្រះវិហាររបស់យើង ។ ជាមួយនេះ បានធ្វើឱ្យស្ថានការណ៍យោធារឹតតែឡើងកំដៅយ៉ាងខ្លាំងរវាងទ័ព កម្ពុជា និងទ័ពសៀម តែមន្ត្រីយោធាខ្មែរដដែលបានបញ្ជាក់ថា ដោយឡែកភាគីកម្ពុជាដែលជាម្ចាស់ផ្ទះពេលនេះក៏បានកំណត់យ៉ាងច្បាស់ ថា បើទោះជាទ័ពសៀមមានមហិច្ឆតាប្រើល្បិចដឹកជញ្ជូនអាវុធ គ្រាប់ និងកងទ័ពដាក់នៅក្បែរតំបន់ប្រាសាទព្រះវិហាររបស់ខ្មែរប៉ុនណាក៏ ដោយ ក៏កងទ័ពកម្ពុជាមិនញញើត និងមានប្រៀបឈ្នះជាដរាប ។ បើទោះបីជាទ័ពសៀមចិត្តជាអ្នកឈ្លានពានចង់ចូលមកក្នុងអធិប តេយ្យភាពរបស់ខ្មែរម៉ោងណាក៏បានដែរ កងទ័ពខ្មែរសម័យតេជោពិតជាមិនរួញរាក្នុងសិទ្ធិស្វ័យការពារ ខ្លួន និងការពារទឹកដីសូម្បីតែមួយមិល្លីម៉ែត្រក៏មិនឱ្យបាត់បង់ឡើយ ។
សូមបញ្ជាក់ថា បន្ទាប់ពីមានកំដៅកាន់តែខ្លាំងនៅតំបន់ប្រាសាទព្រះវិហារ អាជ្ញាធរខេត្តព្រះវិហាររួមជាមួយគណៈបញ្ជាការសមរភូមិទិសទី១ ប្រាសាទព្រះវិហារ កំពុងជំរុញឱ្យប្រជាពលរដ្ឋរស់នៅតាមជើងភ្នំដងរែកក្បែរតំបន់ ប្រាសាទ ព្រះវិហារជំលៀសខ្លួនចាកចេញ និងមានការប្រុងប្រយ័ត្ន។ ដោយឡែកគ្រួសារទ័ពដែលរស់នៅលើខ្នងភ្នំដងរែកក្នុងតំបន់ជាំតែ -បុសស្បូវចំនួន៩០គ្រួសារ បន្ទាប់ពីជំលៀសឱ្យចុះមករស់នៅជាបណ្តោះអាសន្នចំណុចថ្មធំ ស្ថិតក្នុងភូមិវាលធំ ឃុំជាំក្សាន្ត ស្រុកជាំក្សាន្ត ហើយនិងមានផ្តល់អំណោយជាសំភារប្រើប្រាស់ និងស្បៀងអាហាររបស់សាខាកាកបាទក្រហមខេត្តនៅព្រឹកថ្ងៃទី១ កុម្ភៈ ផងដែរ ។
* ទាហានសៀមលើកទង់ជាតិរបស់ខ្លួន នៅផ្ទះក្រហម
ទាក់ទិននឹងសភាពការណ៍ក្តៅតាមព្រំដែនក្រុម ទាហានឈុតខ្មៅទី២៣ ក្នុងស្រុកកាន់ថាឡាក់ ខេត្តស៊ីសាកេតរបស់ថៃបានយកទង់ជាតិថៃបង្ហូតឡើងត្រង់បរិវេណ ក្បែរផ្ទះក្រហម ដើម្បីតបតនឹងកម្ពុជា ។ ចំពោះករណីដែលប្រុងយកទង់ជាតិទៅដោតនៅបរិវេណខ្លោងទ្វារចូល វត្តកែវសិក្ខាគិរីស្វារៈស្ថិតក្នុងសភាពតានតឹងរវាងទាហាន កម្ពុជា និងថៃដែលត្រៀមកំលាំងទល់មុខគ្នា ។ តាមកាសែតថៃឱ្យដឹងថា ករណីទង់ជាតិកម្ពុជាដែលដោតនៅខ្លោងទ្វារចូលវត្តកែវសិក្ខា គិរីស្វារៈនៅមិនទាន់ដកចេញទេ។ ដូច្នេះដើម្បីជាការតបតទង្វើរបស់កម្ពុជាទាហានថៃ បានយកទង់ជាតិទៅដោតនៅបរិវេណក្បែរវត្តដែលជាតំបន់មានជំលោះ ។
ចំណែកនៅស្រុកខូកស៊ូង ខេត្តស្រះកែវ បណ្តាអ្នកភូមិណងចន្ទ បាននាំយកវត្ថុតាងតំបន់សទៅជួបនាយករដ្ឋមន្ត្រីថៃក្នុងថ្ងៃទី១ កុម្ភៈ ដោយតំបន់សនោះស្ថិតនៅបរិវេណបង្គោលឡាក់ទី៤៦ ដែលជនជាតិថៃទាំង៧នាក់ត្រូវចាប់ខ្លួន ។ ទោះជាយ៉ាង ណាក៏ដោយ ក៏ស្ថានការណ៍នៅបរិវេណព្រំដែនក្នុងតំបន់ខាងលើមានសភាពប្រក្រតី មិនតានតឹងផ្នែកកងទ័ពឡើយ ។ ដោយឡែកនៅបរិវេណព្រំដែនត្រង់បរិវេណប្រាសាទតាមាន់ធំ បច្ចុប្បន្នទាហានកម្ពុជាកំពុងរឹតបន្តឹងផ្នែកសន្តិសុខ និងប្រឆាំងទាហានឈុតខ្មៅសៀមដែលព្យាយាមដោតទង់ជាតិនៅផ្នែកខាង ត្បូងប្រាសាទ ។ តាមរបាយការណ៍បញ្ជាក់ថា ទាហានសៀមឈុតខ្មៅប្រហែល៦០នាក់ ក្នុងកងពលទី២៦ ដែលប្រចាំការនៅទីនោះបានព្យាយាមដោតទង់ជាតិរបស់គេរួមជាមួយ ប្រជាជនថៃមួយចំនួនទៀត ប៉ុន្តែត្រូវទាហានកម្ពុជារារាំង ហើយភាគីសៀម ក៏បានផ្អាក ។
កាសែតដដែលបន្តទៀតថា ស្ថានការណ៍ព្រំដែនត្រង់ប្រាសាទតាមាន់ធំ និងប្រាសាទតាក្របីជាចំណុចព្រំដែនរវាងខេត្តឧត្តរមានជ័យ និងខេត្តសុរិន្ទបច្ចុប្បន្នកំពុងបង្កើនសភាពតានតឹងព្រោះ ក្នុងអំឡុងពេលព្រឹកថ្ងៃទី១ កុម្ភៈ កងទ័ពនៃភាគីទាំង២កំពុងបង្កើនកំលាំង ។ លោកអាប់ភីស៊ីត វេចាជីវ៉ា នាយករដ្ឋមន្ត្រីថៃបានទទួលរបាយការណ៍ពីលោកឧត្តមសេនីយ៍ប្រាវិត វង្សសុវណ្ណ រដ្ឋមន្ត្រីក្រសួងការពារជាតិពីស្ថានការណ៍នៅបរិវេណប្រាសាទព្រះវិហារ ថា មានការបង្ហូតទង់ជាតិថៃ និងកំពុងពង្រឹង កំលាំងទ័ពដាក់គ្នា ។
* នាយករដ្ឋមន្ត្រីថៃទាមទារឱ្យកម្ពុជារុះរើ វត្តកែវសិក្ខាគីរីស្វារៈចោល
យោងតាមកាសែតបាងកកប៉ុស្តិ៍នៅថ្ងៃទី១ កុម្ភៈ ផ្សាយឱ្យដឹងថា រដ្ឋាភិបាលថៃក្រោមការដឹកនាំរបស់លោកអាប់ភីស៊ីត វ៉េចាជីវ៉ា ពេលនេះកំពុងបង្កើន និងជំរុញការទាមទាររបស់លោកឱ្យកម្ពុជារុះរើចេញវិញនូវ ទង់ជាតិរបស់ខ្លួន ដែលដាក់បង្ហូតនៅខ្លោងទ្វារវត្តកែវសិក្ខាគិរីស្វារៈ ហើយអ្វីដែលកាន់តែធ្ងន់ធ្ងរទៀតនោះ គឺលោកក៏ជំរុញឱ្យមានការបំផ្លាញវត្តកែវសិក្ខាគិរីស្វារៈ ចោលផងដែរ។ ការទាមទារនោះរបស់លោកអាប់ភីស៊ីត ត្រូវបានបញ្ចូលទៅក្នុងសេចក្តីថ្លែងការណ៍មួយដែលចេញដោយក្រសួង ការបរទេសថៃចំពេលកំពុងមានរបាយការណ៍អំពីការបង្កើនកំលាំងទ័ពនៅតាម បណ្តោយព្រំដែនរវាងប្រទេសថៃ និងប្រទេសកម្ពុជា ។
ក្រសួងការបរទេសថៃនិយាយក្នុងសេចក្តីថ្លែង ការណ៍មួយថា ថៃសូមអះអាងថា វត្តកែវសិក្ខាគិរីស្វារៈគឺស្ថិតនៅលើទឹកដីថៃ ហើយពេលនេះទាមទារឱ្យកម្ពុជាកំទេចចោលទាំងវត្ត និងទង់ជាតិកម្ពុជាដែលដាក់បង្ហូតពីលើវត្តនេះ។
ជាមួយគ្នានេះ កាលពីថ្ងៃទី៣០ មករា កន្លងមក លោកអាប់ភីស៊ីត អះអាងសាជាថ្មីទៀតថា ដីទំហំ៤,៦គីឡូម៉ែត្រក្រឡា ក្បែរប្រាសាទព្រះវិហារជាអធិបតេយ្យភាពរបស់ថៃ ។ ការអះអាងបែបនេះរបស់លោកអាប់ភីស៊ីត នឹងធ្វើឱ្យស្ថានការណ៍នៅតាមព្រំដែនកម្ពុជា-ថៃក្នុងតំបន់ ប្រាសាទព្រះវិហារកាន់តែតានតឹងថែមទៀត ។
* សន្តិសុខនៅស្ថានទូតកម្ពុជាប្រចាំក្រុង បាងកកត្រូវបានរឹតបន្តឹងយ៉ាងខ្លាំង
ប៉ូលិសក្នុងទីក្រុងបាងកក បានបង្កើន និងរឹតបន្តឹងសន្តិសុខនៅជុំវិញស្ថានទូតកម្ពុជាប្រចាំទីក្រុង បាងកក ដើម្បីទប់ស្កាត់ការផ្ទុះឡើងឧប្បត្តិហេតុផ្សេងៗដែលអាចកើតឡើងជា យថាហេតុ ។ ប្រធានការិយាល័យប៉ូលិសក្រុងបាងកក លោក Jakthip Chaijinda និយាយថា រូបលោកបានបញ្ជាដល់អង្គភាពប៉ូលិសឱ្យដាក់ពង្រាយកំលាំងបន្ថែម នៅបរិវេណជុំវិញស្ថានទូតកម្ពុជា ។
ការបង្កើន និងរឹតបន្តឹងផ្នែកសន្តិសុខនៅជុំវិញស្ថានទូតកម្ពុជា ក្នុងទីក្រុងបាងកក ធ្វើឡើងក្រោយពីមានលេចឮព័ត៌មានពីភាពតានតឹងថ្មីរវាងប្រទេសថៃ និងប្រទេសកម្ពុជា ក្រោយពីលោកនាយករដ្ឋមន្ត្រីអាប់ភីស៊ីត ទាមទារឱ្យកម្ពុជារុះរើចោលវត្តកែវសិក្ខាគិរីស្វារៈ ។ តាមប្រភពព័ត៌មានពីកាសែទបាងកកប៉ុស្តិ៍ថា ការរឹតបន្តឹងសន្តិសុខនៅស្ថានទូតកម្ពុជា គឺដើម្បីទប់ស្កាត់ការធ្វើវិច្ឆេទកម្មដែលអាចបង្កឡើងជាយថា ហេតុដោយភាគីទី៣ ដែលប៉ុនប៉ងធ្វើឱ្យភាពតានតឹងនៅតំបន់ព្រំដែនកម្ពុជា-ថៃកើនឡើង កាន់តែខ្លាំង ។
* ប្រមុខយោធាថៃគាំទ្រការចរចាជា មធ្យោបាយដោះស្រាយជំលោះ
ប្រមុខយោធាថៃ ឧត្តមសេនីយ៍ប្រាយុទ្ធ ចានអ៊ូចា បានអះអាងកាលពីថ្ងៃទី១ កុម្ភៈ ថា មធ្យោបាយល្អបំផុតដើម្បីដោះស្រាយបញ្ហាជំលោះព្រំដែនជាមួយកម្ពុជា គឺមានតែតាមរយៈការចរចាជាផ្លូវការប៉ុណ្ណោះ ។ កាសែតបាងកកប៉ុស្តិ៍នៅថ្ងៃទី១ កុម្ភៈ នោះបានផ្សាយព័ត៌មានដោយដកស្រង់សំដីលោកប្រាយុទ្ធ ដែលថ្លែងថា វាមានសារសំខាន់បំផុត ដែលបញ្ហារវាងថៃ និងកម្ពុជាត្រូវបានដោះស្រាយតាមរយៈការចរចាដោយគណៈកម្មាធិការ ព្រំដែនចំរុះកម្ពុជា-ថៃ ហើយឥឡូវនេះក្រសួងការបរទេសថៃបាន ព្យាយាមរៀបចំឱ្យមានកិច្ចប្រជុំថ្មី ។
លោកឧត្តមសេនីយ៍ប្រាយុទ្ធ ថ្លែងទៀតថា នៅថ្ងៃទី១ កុម្ភៈ នេះ ស្ថានការណ៍នៅតាមបណ្តោយព្រំដែននៅតែមានសភាពស្ងប់ស្ងាត់ដូចធម្មតា ចំណែកខាងភាគីកម្ពុជាមានវិធានការសន្តិសុខដូចថៃដែរ ប៉ុន្តែមិនមានន័យថា ភាគីទាំង២អាចធ្លាក់ចូលក្នុងការប៉ះទង្គិចគ្នានោះទេ ។ អ្នកវិភាគនិយាយថា កម្ពុជាតែងតែចង់រស់ នៅប្រកបដោយសុខសន្តិភាពជាមួយប្រទេសជិត ខាងទាំងអស់ ប៉ុន្តែប្រសិនបើមានសង្គ្រាមឈ្លាន ពានមកលើកម្ពុជានោះ កម្ពុជាមានជំរើសតែមួយ គត់ គឺត្រូវតែប្រយុទ្ធដើម្បីការពារអធិបតេយ្យ ភាព និងបូរណភាពទឹកដី ហើយជាការពិតណាស់ អ្វីដែលនឹងកើតឡើងវានឹងអាចកើតឡើង ៕
http://kohsantepheapdaily.com.kh/art...01-191814.html