ប៉ោយប៉ែត ៖ រថយន្តប្រភេទដឹកទំនិញសណ្ដោងមួយគ្រឿង ត្រូវបានឆេះខ្ទេចម៉ដ្ឋអីវ៉ាន់ និងរថយន្ត នៅច្រកប៉ោយប៉ែត ត្រង់ចំណុចក្លោងទ្វារខាងភាគីថៃដែលកំពុងធ្វើដំណើរចូលទឹកដី កម្ពុជា។ ការឆេះនោះ គឺបណ្ដាលឲ្យចរាចរចេញចូលនៅច្រកនោះត្រូវបានផ្អាកជាបណ្ដោះអាសន្ន ដោយសារតែរថយន្តដែលត្រូវឆេះ នោះនៅកណ្ដាលផ្លូវតែម្ដង។
ហេតុការណ៍ឆេះរថយន្តនោះបានកើតឡើងកាលពីវេលាម៉ោង ១និង៣០នាទី ថ្ងៃទី០១ ខែកុម្ភៈ ឆ្នាំ២០១១ នៅត្រង់ចំណុចក្លោងទ្វារព្រំដែនថៃ នៃច្រកអន្តរជាតិប៉ោយប៉ែត។
សាក្សីនៅកន្លែងកើតហេតុនិយាយថា ការឆេះរថយន្តប្រភេទសណ្ដោងផ្ទុកទៅដោយកង់រថយន្តនោះ បណ្ដាលមកពីកម្មករផ្សារដែកនៅក្លោងទ្វារព្រំដែនថៃនោះ បានផ្សារដំបូលហើយព្រាយផ្កាភ្លើងធ្លាក់ចូលក្នុង រថយន្តដែលកំពុងធ្វើដំណើរឆ្លងកាត់កន្លែងនោះ។ មួយរំពេចក្រោយមកក៏កើតជាអគ្គិភ័យមួយលេបត្របាក់ រថយន្តដែលផ្ទុកសំបកកង់រថយន្តថ្មីៗនាំចូលមកពីប្រទេសថៃ ជារបស់ក្រុមហ៊ុន ត្រូពិកកាណា របស់សមាគម កម្ពុជា-ចិន។
ការឆេះរថយន្តនៅកណ្ដាលក្លោងទ្វារ(ខាងភាគីថៃ)ច្រកអន្តរជាតិប៉ោយប៉ែតនេះ បណ្ដាលឲ្យចរាចរត្រូវបានបិទមួយរយៈពេល៕
http://www.kampucheathmey.com/local-...-07-59-10.html